“Kyabuntu kyonso kiyampe ne kya kupānwa kyonso kibwaninine kitambanga kūlu, kitūkanga kudi Shandya bitōkeji bya mūlu.” (Yakoba 1:17) Na bubine, kino kisonekwa kisambilanga pa buntu bwa Tata wetu wa mūlu, Yehova Leza. Inoko, mu byabuntu bivule bipēne Leza ku bantu, kudi kimo kikatampe kupita byonso. Le i kyabuntu’ka? Binenwa bya Yesu biyukane bidi mu Yoano 3:16, bitulombola’mba: “Mwanda Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.”

Na bubine kyabuntu kya Leza kya wandi Mwana wa bunka​—kyo kyabuntu kikatakata kupita byonso byoketudi batambule, mwanda i kitunyongolole ku bupika bwa bubi, bununu, ne lufu. (Ñimbo ya Mitōto 51:5; Yoano 8:34) Nansha shi tulonge namani, i kutupu kintu nansha kimo kyotubwanya kulonga na bukomo bwa batwe bene pa kwinyongolola mu buno bupika. Inoko, kupityila ku buswe bwandi bukatampe, Leza i mwitupe kyokya kine kyotwadi tusakilwa pa kunyongololwa mu buno bupika. Yehova i mupe bantu ba kikōkeji lukulupilo lwa būmi bwa nyeke na kupāna Yesu Kidishitu, wandi Mwana wa bunka bu kinkūlwa. Na bubine, le kinkūlwa i kika? Mwanda waka kidi na mvubu? Ne i muswelo’ka otubwanya kumwena’mo?

Kinkūlwa i mfutwa ifutwanga pa kukūla bintu byadi bijimine nansha pa kunyongololwa mu bupika. Bible ushintulula’mba ba Adama ne Eva, bambutwile betu babajinji, bāpangilwe babwaninine na kyepelo kya kwikala’ko nyeke mu paladisa pano pa ntanda na babo bana bobadi ba kubutula mwenda mafuku. (Ngalwilo 1:26-28) Ino i kya bulanda, mwanda bājimije bino byonso’bi na kuleka kukōkela Leza​—penepa bāikala ba bubi. Mwapya tunga? Bible ulondolola’mba: “Monka mwātwelele bubi mu ino ntanda kupityila ku muntu umo ne lufu kupityila ku bubi, ne lufu nalo lwasambakana ku bantu bonso mwanda bonso balongele bubi.” (Loma 5:12) Pa kyaba kya kupyanika bandi bana būmi bubwaninine, ino Adama wēbapyanikile’nka bubi ne byobya bilupuka’ko, ke lufu kadi.

Kinkūlwa kifutwanga mungya mvubu ya kintu kijimine. Adama paāpelele kukōkela Leza ku kusaka, wālongele bubi, penepa wājimija būmi bwa bu muntu mubwaninine​—ke būmi bwa Adama kadi. Kukwatañana na Bible, kino kyālengeje lutundu lwa Adama lumunwe na bubi ne lufu. O mwanda kwadi kusakilwa būmi bwa muntu mukwabo mubwaninine​—ke bwa Yesu kadi​—bupānwe bu kitapwa pa kusaka’mba tunyongololwe mu buno bupika. (Loma 5:19; Efisesa 1:7) Kinkūlwa kyāpēne Leza na buswe kyo kilengeje bantu bekale na lukulupilo lwa kukamona byobya byājimije ba Adama ne Eva​—ko kunena’mba būmi bwa nyeke mu paladisa pano pa ntanda.​—Kusokwelwa 21:3-5.

Kukwatañana na byobya bivuija kino kyabuntu, i kimweke patōka’mba kyabuntu kya Leza kya kinkūlwa, kine kilengeje bantu bakamone būmi bwa nyeke, kyo kyabuntu kikatakata kupita byonso. Pa kuyuka mvubu ya kino ‘kya kupānwa kibwaninine,’ tutalei mu miswelo ya pa bula mokikwatañene na myanda itukwasha tupāne byabuntu biyampe, monka mokilombwedilwe mu kishinte kibadikile.

 Kyabuntu kyotwabila. Bantu bāpangilwe na mutyima wa kwikala’ko nyeke ne nyeke. (Musapudi 3:11) Nansha batwe bene byoketubwanyapo kuvuija kino kyumwa, inoko kinkūlwa i kilengeje tukekale’ko nyeke. Bible unena’mba: “Mwanda mpalo ipala bubi i lufu, ino kyabuntu kipāna Leza i būmi bwa nyeke mudi Kidishitu Yesu Mfumwetu.”​—Loma 6:23.

Kivuija bisakibwa byetu. Bantu kebabwanyapo kufuta kinkūlwa. Bible unena’mba: “Ke-buntu bukūdi bwa muya wabo i buleme, i bwa kuleka bitupu nyeke e mo kyendele.” (Ñimbo ya Mitōto 49:8) O mwanda twadi tusakilwa bukwashi bwa Leza pa kunyongololwa ku bupika bwa bubi ne lufu. Inoko “kupityila ku bunyongolodi bwa kinkūlwa kyafutyile Kidishitu Yesu,” Leza wetupele enka kyokya kyotwadi tusakilwa.​—Loma 3:23, 24.

Pa kitatyi kifwaninwe. Bible witulombola’mba: “Potwadi tukidi babipya-mambo, Kidishitu wetufwidile.” (Loma 5:8) Kinkūlwa byokyetupelwe “potwadi tukidi babipya-mambo,” kino kitukulupija’mba Leza witusenswe bininge nansha byotudi ba bubi. Kadi kitupa lukulupilo lwa mu mafuku a kumeso nansha byotulwa na makambakano alupukile ku bubi.

Kimwekeja kukanina kuyampe kwa mutyima ne kubulwa kwisakila. Bible ulombola kine kyātonwene Leza apāne wandi Mwana bu kinkūlwa amba: “Pano e pasokokēle buswe bwa Leza kotudi, mwanda Leza watumine wandi Mwana wa bunka mu ino ntanda amba tumwene būmi ponka padi aye. Buswe bwine budi namino, ke kunenapo amba batwe twamusenswe Leza, ino amba aye wetusenswe.”​—1 Yoano 4:9, 10.

I muswelo’ka obwanya kulombola’mba ufwijanga’ko pangala pa kyabuntu kikatakata kupita byonso? Vuluka, binenwa bya Yesu bidi mu Yoano 3:16 bilombola’mba enka yewa “ulombola lwitabijo” mudi aye ye ukapanda. Mungya Bible, lwitabijo i “kutengela na kikulupiji byobya byokulupile.” (Bahebelu 11:1) Pa kwikala na kino kikulupiji bilomba kwikala na buyuki bwa binebine. O mwanda tukulomba witūdile’ko kitatyi kya kwifunda myanda ya Yehova Leza, Mwine upēne kino ‘kya kupānwa kibwaninine,’ ne kujingulula byobya byobwanya kulonga pa kusaka’mba ukamone būmi bwa nyeke kupityila mu kitapwa kya kinkūlwa kya Yesu.

Ubwanya kwifunda bino byonso na kubandaula myanda ya mu Bisonekwa idi pa www.pr2711.com. Batumoni ba Yehova bakasangela kukukwasha. Tukulupile amba shi wifunde ino myanda ne kumwena mu kino kyabuntu kikatakata, nabya kukabulwepo kunena’mba: “Nafwija’ko Leza kupityila kudi Yesu Kidishitu Mfumwetu!”​—Loma 7:25.