KU BANKASAMPE
11: Bukankamane
MOBUSHINTULWILA
Bantu bakankamane kebanyemangapo kaji. Inoko, basangelanga kwingila bininge mwanda wa kuvuija bisakibwa byabo ne kukwasha bantu bakwabo—nansha shi kaji kobengila kamonwa bu ka bulebule.
MWANDA WAKA KIDI NA MVUBU?
Bikande, bitūke, kudi bintu bivule bya kulonga mu būmi. Mu ntanda mwampikwa bantu bavule basenswe kwingila bininge, kwikala nkanka kudi na kamweno kodi.—Musapudi 3:13.
“Ndi mujingulule amba shi wingila bininge, ukemona na mvubu ne kwikala na nsangaji ku mutyima. Na bubine ino nsangaji inengejanga nsanswe mingilo. Kwikala na kibidiji kya kwingila bininge kukakukwasha wikale na bumuntu buyampe.”—Reyon.
MUSOÑANYA WA MU BIBLE: “Mu mingilo yonso e mudi kadīlo.”—Nkindi 14:23.
BYA KULONGA
Tamija mumweno muyampe pa mingilo na kulonda ano matabula atelelwe kunshi’ku.
Wifunde mwa kulongela bintu senene. Wikale wingilanga mingilo ya pa lubanza, ulonga devwala ya ku masomo, nansha wingila kaji ko-konso ka makasa, longa’byo na mutyima umo. Pa kusaka’mba uvuije mingilo senene, kimba’ko miswelo ya kwiilumbulula—kwiilonga bukidibukidi kadi biyampe. Poenda utamija bwino, po pene ukasangela bininge mwingilo obe.
MUSOÑANYA WA MU BIBLE: “Lelo umona muntu mupyasakane mu mingilo yandi? Aye ukemana ku meso a balopwe; kakemanapo ku meso a bantu ba bitupu, ehe.”—Nkindi 22:29.
Mona bintu mobikadile. Mu myanda mivule, shi uvuija senene biselwa byobe, nabya bantu bakwabo bakamwena’mo. Kimfwa, shi wingilanga mingilo ya pa lubanza na bukankamane, nabya ukangula ba mu kisaka kiselwa.
MUSOÑANYA WA MU BIBLE: “Nsangaji ya kupāna itabukile ya kupebwa.”—Bilongwa 20:35.
Longa bivule. Pa kyaba kya kulonga’tu bintu bityetye, tompa kulonga bivule kupita byobakulombele kulonga. Mu uno muswelo, udi na lupusa pa bobe būmi—uloñanga bivule, pa kubulwa’mba bakuningile, ino i na kusaka kwa abe mwine.—Mateo 5:41.
MUSOÑANYA WA MU BIBLE: “Kutyina’mba wakalonga kilongwa kiyampe na kutononwa, ino poso muswidile mutyima obe abe mwine.”—Filemone 14.
Ikala na bujalale. Bantu bakankamane ke bazozepo, kadi kebibalombengapo’nka kwingila mansá mavule bininge. Badi na bujalale, basangelanga mingilo mikomo ne kwitūdila’ko kitatyi kya kukōkolokwa.
MUSOÑANYA WA MU BIBLE: “Dikasa diyule kutalaja dipityile būya makasa abidi mayule mwingilo ne kupanga luvula.”—Musapudi 4:6.
Tala'po Bidi ne Bino:
KITEBA KYA MULAMI
Muswelo wa Kusangela Mwingilo Mukomo
Tala miswelo imo ileta’mo Bible madingi a kamweno a kutana nsangaji ne kuloelelwa mu mwingilo obe.
LANGUKAI!
Mwa Kwingidijija Kitatyi Kyobe na Tunangu
Muswelo muyampe wa kwingidija kitatyi kyobe biyampe i kubandaula būmi bobe mu miswelo ibidi. Le ayo mine i miswelo’ka?
BIPANGUJO BYA BANKASAMPE
Le Nkaleka Namani Kutundululatundulula Bintu?
Tala madingi a mwa kulekela kutundululatundulula bintu!
