Leka Kushiyañanya Kukukwashe

VUMIJA MU

Leka Kushiyañanya Kukukwashe

Le kwitabijepo amba Yesu wādi mufundiji mukatampe wāikele’ko pano pa ntanda? Padi kodi mulonge bukomo bwa kwiula miswelo imoimo yaādi ufundija, kimfwa kwingidija bipangujo ne byelekejo. Ino, kodi mulangulukile ne pa kulombola kwaālombwele divule kwishila kwa bintu mu bufundiji bwandi?

Bantu bavule balombolanga kwishila kwa bintu pobesamba. Ubwanya nobe kulonga kino ne kulangulukila’po kwine mpika. Kimfwa ubwanya kunena’mba, “banene amba bipa byonso i byele, inoko bino i kibishi.” Nansha amba, “wādi mwana utalala, ino pano kaesambenga bininge na bantu.”

Mu myanda pamo bwa ino, ukokeja kunena mwanda nansha mulangwe; Kupwa washiyañanya’o na kwingidija binenwa pamo bwa ino, inoko, shako, nansha kumutamba mukwabo. Nansha padi ubwanya kulombola kwishila na kubweja’ko myanda nansha na kukomeneja mulangwe. Kitatyi kyowisamba uno muswelo, binenwa bikevwanwa munenenwanga kadi bibwanya kukwasha bakwabo bevwanije byonena.

Nansha kushiyañanya bintu byokekwikalangapo muswelo umo mu ndimi nansha mu bibidiji bimobimo, ino i biyampe tuyuke mvubu yako. Mwanda waka? Mwanda tutananga kushiyañanya kuvule mu Kinenwa kya Leza kya ku bukomo bwa mushipiditu. Yesu wāingidije kuno kushiyañanya kitatyi kivule. Vuluka bino binenwa bya amba: “Nansha bantu pa kwakija kinanu kebekiputyilapo na musu, mhm, [ino] bekībīka ponka pa kibīko kya kinanu.” “Nkiīle kwiifutulula [mukanda wa bijila], mhm, [ino] nekīfikijije.” “Kemwaivwene byo kyadi kinenwa kadi ku ba pa kalā’mba: ‘Kokētañana makoji, mhm.’ Ino ami nami nemunena’mba; Yewa wakutala mwanamukaji . . . ” “Kyadi kinenwe’mba: ‘Dīso difwile pa dīso dikwabo ne dīno nadyo monka.’ Ino ami nami nemunena’mba: Kemutwala na mubi lupata mhm, [ino] wakukukupila kutama kumo nabya mwalwije ne kukwabo.”—Mat. 5:15, 17, 27, 28, 38, 39.

Mu mikanda mikwabo ya mu Bible mudi kushiyañanya kwa uno muswelo. Kukakukwasha wivwanije mwanda nansha kukomeneja muswelo mulumbuluke wa kulonga kintu kampanda. Shi wi mbutwile, langulukila pa kuno kushiyañanya: “Bānwe bashabo nenu, kemukibasomba bāna benu ku bukalabale; [ino] mwibatamijei biyampe monka mu madingi, ne mu lufundijo lwa [Yehova].” (Ef. 6:4) Shi mutumibwa Polo wāsonekele’tu amba shabana (nansha inabana) ufwaninwe kutamija mwana mu madingi a Leza, ādi’nka a kwikala madingi a tunangu ne a bine. Ino mulangwe wāikele patōka pa kushiyañanya mwanda na kunena’mba, ‘kemukibasomba bāna benu ku bukalabale; ino mwibatamijei biyampe monka mu madingi, ne mu lufundijo lwa Yehova.’

Polo wābwejeje’ko mu uno shapita amba: “Ke-kuntu kwikwata kwetu kekudipo kwa ku ngitu ne ku mashi, ehe, [ino] i kwa . . . ku bibumbo bya bushipiditu bya bubi bya momwa mūlu.” (Ef. 6:12) Padi kuno kushiyañanya kubakukwasha wivwanije amba udi na bulwi bukatampe. Ke bwa kulwapo na bantu, ino i bwa kulwa na bibumbo bya mishipiditu mibi.

MWENA MU KUSHIYAÑANYA

Mu uno mukanda umo onka wa mu Bible wa Efisesa, ukatana’mo mavese makwabo mavule engidije’mo Polo kushiyañanya. Kulangulukila pa kuno kushiyañanya kuketukwasha twivwanije mulangwe wa Polo ne kuyuka padi biyampe byobya byotufwaninwe kulonga.

Ubwanya kutana nsangaji ne kumwena mu kubandaula tabulo ulombola kushiyañanya kumokumo kudi mu Efisesa Shapita 4 ne 5. Potanga kushiyañanya ko-konso, langulukila pa bobe būmi. Wiipangule amba: ‘Le bine ngidi na ngikadilo’ka? Le noñanga namani mu ino myanda nansha mu mikwabo idi pamo bwa ino? Bantu bakwabo babwanya kunena’mba, le noñanga namani pa milangwe ibidi mishile?’ Shi kuno kushiyañanya kubakukwasha ujingulule’mba kudi pantu posakilwa kushinta, nabya longela monka. Leka kushiyañanya kukukwashe.

Nansha padi ubwanya kwingidija tabulo mu butōtyi bwenu bwa kisaka. Dibajinji, bantu bonso ba mu kyenu kisaka babwanya kutanga mavese adi na kuno kushiyañanya. Penepa, umo mu bukata mwenu ubwanya kutela kipindi kibajinji kya kushiyañanya, kupwa washila bantu bakwabo ba mu kisaka mukenga wa kulombola kipindi kya bubidi kya kuno kushiyañanya. Kino kibwanya kulengeja kisaka kisambile pa muswelo okibwanya kwingidija biyampe kipindi kya bubidi. Na bubine, kubandaula kushiyañanya pamo bwa kuno, kubwanya kukwasha bankasampe ne batame bekale nyeke na mwiendelejo wa bwine Kidishitu mu kisaka ne konso kobenda.

Kitatyi kyoenda uyuka mvubu idi mu kushiyañanya myanda, ukabwanya kwikujingulula kitatyi kyonso kyowikomona mu Bible, kadi ukamona amba kubwanya kukukwasha bininge mu mwingilo obe wa bwine Kidishitu. Kimfwa, ukokeja kunenena muntu osapwila amba: “Bantu bavule banenanga amba muntu yense udi na muya keufu, ino tala binena’po Kinenwa kya Leza.” Nansha shi wifunda Bible na muntu, ubwanya kwipangula amba: “Bantu bavule mu uno mukenza bakulupile amba Leza ne Yesu i muntu umo; ino, le tubamone’mba Bible unena’po bika? Le abe ulanga’po namani?”

Bine, Bisonekwa bitulombola kushiyañanya kuvule kwa kwitufundija, kubwanya kwitukwasha tunangile mu dishinda dya Leza. Kadi tubwanya kwingidija kuno kushiyañanya mwanda wa kukwasha bantu bakwabo nabo bayuke bubinebine bwa mu Bible.

[Kifwatulo pa paje 3]

[Tabulo pa pajes 4, 5]

Kushiyañanya Kumo Kudi mu Efisesa Shapita 4 ne 5

Tompa kwingidija ino tabulo mu butōtyi bwenu bwa kisaka!

“Ketukikēkalapo . . . kupūlulwa ku bivula . . . ku budyumuku bwa bantu bwa buzazangi, monka mwikadile kubembeka kwa kyongo.”—4:14.

“[Ino] pa kwikala kwisamba byabinebine mu lusa tutamine monka mudi aye umbintu byonsololo, aye i mutwe, ke aye Kidishitu kadi.”—4:15.

‘Mizo idi ne ñeni yabo mibafītyijibwe, . . . mwanda wa kwiumija mityima yabo.’—4:18, 19.

“Ino bānwe kemwafundijibwepo aye Kidishitu namino, mhm, wivwane kīkale kadi mwamwivwene, ne kufundijibwa mudi aye.”—4:20, 21.

“Mupange bobwa bu-muntu bwa kala bwa owa muswelo wa kala.”—4:22.

“[Ino] . . . musambukilwe monka mu mushipiditu wa mutyima wenu, muvwale ne muntu mupya.”—4:23, 24.

“Wakwiba nandi ēbuleke bwivi bwandi.”—4:28.

“[Ino] aputumine mu mīngilo ya kwingila ne makasa andi kyokya kilumbuluke.”—4:28.

“Kemukīkala kuleka kinenwa kibole kulupuka mu kyakanwa kyenu.”—4:29.

“[Ino] kilumbuluke kyonka kyakwimutamija.”—4:29.

“Kadi mufundulei ko mudi bululu bonso, ne bukalabale, ne kufuna bulobo, ne lupotopoto, ne lubabo, ne kiji kyonsololo kumo.”—4:31.

“[Ino] mwikale ne kanye bānwe bene na bene, ne mutyima wa kukōka, mwikale kwilekela bānwe bene.”—4:32.

“Busekese, ne kujilula konso kwa bijila, ne kwabila kwine, kebikatelwa nansha dimo dine umbukata mwenu.”—5:3.

“[Ino] kufwija byakufwija.”—5:4.

“Mwadi fukutu.”—5:8.

“Ino pano ke mudi mwinya mudi Mfumwetu.”—5:8.

“Kemukīkala ne kipwano kya mīngilo ya fukutu.”—5:11.

“[Ino] kwiīdingila, e nabyako bidi.”—5:11.

“Ebiya, tūkanyai biyampe pa kunanga, kepamopo bwa bampikwa ñeni, mhm, poso bwa bañeni.”—5:15.

“[Ino] bwa bañeni; ne kumwenamo byakumwenamo mu myaka.”—5:15, 16.

“Penepo nanshi, kemukalembakanai.”—5:17.

“[Ino] yūkai monka mwikadile kiswa-mutyima wa [Yehova].”—5:17.

“Kemukakolwai vinyu, e mudi lūma.”—5:18.

“[Ino] mwikute enka Mushipiditu.”—5:18.

“Mwanda wa kunena’mba, ēfikijije’kyo kudi aye mwine kipwilo, ke kipwilo kya ntumbo, kyakubulwapo nansha ditonye, nansha mukafi, nansha kimo kikwabo kya kwikala namino.”—5:27.

“[Ino] kīkale kipandulwemo ne kyampikwa bulema.”—5:27.

“Ke-kuntu kekudipo muntu wa kwishikwa ngitu ya aye mwine.”—5:29.

“[Ino] wīdisha biyampe, ne kwiīlela senene, shē, pamo ponka mulongela Kidishitu ku kipwilo.”—5:29.

[Kifwatulo]

[Kifwatulo pa paje 6]

Le ukokeja kuvuluka kipindi kya bubidi kya kuno kushiyañanya?

KITEBA KYA MULAMI—KYA KWIFUNDA