FUNDIJAI BENU BANA

Le I Ñeni’ka Yotubwanya Kuboila Kudi ba Petelo ne Ananaisa Bābepele?

Monka moyukile, bubela i kunena bintu byoyukile amba ke byabinepo. Le kodi ne mubepe bubela?— * Enka ne batame bamo basenswe Leza bābepele. Padi uyukile muntu utelelwe mu Bible wābepele. Dijina dyandi i Petelo, umo wa mu batumibwa ba Yesu 12. Twivwanei mānga ilombola kine kyaābepele bubela.

Yesu pa kupwa kukwatwa, wāselelwe ku njibo ya mupidishitu mukatampe. Mwādi mu bukata bwa bufuku. Petelo watwela mu kipango kya njibo ya mupidishitu kumuyuka mpika. Na kitōkeji kya mudilo, mwana-mukaji mwingidi wa mupidishitu mukatampe wajiula Petelo. Wamunena’mba, “abe nobe wadi ne Yesu.” Petelo pa kukwatwa moyo watuna.

Bible unena’mba, kitatyi pa kupita’po “ungi mwana-mukaji nandi wamumona.” Wamunena amba: “Ne uno’u nandi wadi ne Yesu.” Kadi Petelo watuna monka. Kupwa’tu kwa kakitatyi katyetye, bakwabo baenda kudi Petelo kebamunena amba: “I binebine nobe nanshi udi waku abo.”

Petelo watuyuka. Penepa musunsa wa busatu, wabepa amba: “Ami nkiyūkilepo muntu’o.” Ntombolwe wadila. Yesu watala Petelo, ne Petelo nandi wavuluka’mba mansá matyetye kumeso, Yesu wamunene amba: “Nzolo pa kadidile nobe ukampelelela dinga? disatu.” Petelo wapona panshi kadila. Bine wēalakenye bininge!

Le kintu pamo bwa kino kibwanya kukufikila?— Padi udi ku masomo, ubaivwana bana ba masomo besambila pa Batumoni ba Yehova. Umo wanena’mba, “kebemunangapo ndalapo.” Mukwabo wabweja’ko amba, “kebalwilangapo yabo ntanda.” Ino bangi nabo abanena’mba, “na bubine ke bene Kidishitupo, mwanda kebafetengapo Noele.” Kupwa umo waiya kodi kakwipangula’mba, “le kudipo Kamoni wa Yehova?” Le ukanena bika?—

Kumeso kwa kino kintu kulongeka ufwaninwe kwiteakanya mwanda wa kuleta malondololo mayampe.  Petelo kādipo mwiteakanye. Wābepele bubela kitatyi kyobāmuningile! Inoko, wēalakenye bininge pa bintu byaālongele, kadi Leza wāmulekele.

Ananaisa, umo wa mu bana ba bwanga ba Yesu babajinji, nandi wābepele bubela. Ino Leza kāmufwidilepo lusa aye ne wandi mukaji Safaila. Safaila wēkupile kudi wandi mulume na kubepa bubela. Tutalei mwanda waka Leza kālekēlepo ba Ananaisa ne Safaila.

Mafuku dikumi Yesu pa kupwa kushiya batumibwa ne kujokela kudi Leza momwa mūlu, kintu kya bantu 3000 bābatyijibwe mu Yelusalema. Bantu bavule bātambile ku matanda a kulampe mwanda wa kusoba Masobo a Pentekosa, kadi pa kupwa kwikala bana ba bwanga ba Yesu, bāsakile kushala kitatyi kilampe mwanda wa kwifunda bivule pa lwitabijo lwabo lupya. O mwanda bana ba bwanga bamo ba Yesu bāingidije lupeto lwabo mwanda wa kwibatakanya.

Ananaisa ne wandi mukaji bāpoteje bintu byabo mwanda wa kusokola lupeto lwa kukwasha nalo bapya bābatyijibwe. Kitatyi kyākatūdile Ananaisa lupeto kudi batumibwa wānene’mba, luno lo lupeto lonso lwalupuka ku bintu byonapoteja. Ino kebyādipo bya bine! Wāfile’ko lupeto lumo! Leza wākweshe Petelo ebiyuke, ebiya Petelo wanena Ananaisa amba: “Kubepelepo bantu, mhm, nanshi ubabepela Leza.” Ponka’po, Ananaisa wapona panshi ne kufwa wafwa! Kintu kya mansá asatu pa kupita’po, wandi mukaji watwela. Pa kubulwa kuyuka byafikila wandi mulume, nandi wabepa ne kupona panshi wafwa.

Ñeni mikatampe yotuboila’ko i ino: Kwisamba bubinebine kudi na kamweno! Bine, batwe bonso tufwaninwe kuboila’ko ñeni! Inoko, batwe bonso tuloñanga bilubo, na kampata kitatyi kyotudi bankasampe. Le kusangelepo pa kuyuka’mba Yehova ukusenswe kadi ukakulekela na mwaālekele Petelo?— Ino vuluka’mba tufwaninwe kwisamba bubinebine. Kadi shi ketudi balonge kilubo kikatampe kya kubepa bubela, tufwaninwe kulomba ne kuzenza Leza etulekele. Kino kyokyālongele Petelo, ne kulekelwa walekelwa. Shi tulonge bukomo bwa kuleka kubepa nansha dimo, Leza uketulekela netu!

Tanga mu obe Bible

Mateo 26:69-75

Bilongwa 2:38-42; 4:32-37; 5:1-11

[Kunshi kwa dyani]

[Kifwatulo pa paje 14]

[Kifwatulo pa paje 14]

[Kifwatulo pa paje 15]