MUTWE WA MWANDA WA PA KIBALU | Mwanda Waka Ufwaninwe Kusangela Bible?

Leza Uteakanyanga Mwa Kunyongolwela Bantu

Leza wālaile Abalahama muntu wa kikōkeji amba, “lukunwa” lwālailwe lukatamba ku lutundu lwandi. Kupityila ku luno lukunwa, bantu ba “mizo yonso” bakeselwa dyese. (Ngalwilo 22:18) Yakoba munkana Abalahama wāendele mwenda mafuku ku Edipito, kwine kwābaile kisaka kyandi ke muzo wa Isalela wa kala.

Mwenda mafuku mu Edipito, Felo wa kasusu wāmuna bene Isalela bupika kufika ne byālupwile Leza mupolofeto Mosesa, mwine wātambije muzo mu ntanda ne kupityila nao pa Kalunga Katyila kākalañene mu kingelengele. Kupwa, Leza wapa Isalela bijila, kubadila’mo ne Mbila Dikumi ya kwibaludika ne kwibakinga. Bino bijila byālombwele patōka bitapwa byakwela pa kulekelwa bubi bwabo. Mosesa pa kupebwa bukomo bwa mushipiditu na Leza, wāsapwila Isalela’mba Leza ukebatumina mupolofeto mukwabo. Uno mupolofeto wādi “lukunwa” lwālailwe.

Myaka 400 ne musubu pa kupita’po, Leza wālaya Mulopwe Davida amba yewa wa kwiya bu “lukunwa” lwālailwe mu Edena, ukaludika bulopwe bukalādila nyeke ne nyeke. Uno muntu i Meshiasa, Munyongolodi wātongelwe na Leza mwanda wa kukūla muzo wa muntu ne kwaluja Paladisa pano pa ntanda.

Leza wāsokwele bityebitye myanda mivule itala Meshiasa kupityila kudi Davida ne bapolofeto bakwabo. Bālaile amba ukekala mwityepeje ne amba mu buludiki bwandi kemukekalapo nzala, bukondame ne divita. Bantu bonso bakekala mu ndoe abo bene na bene ne na banyema bene kumo. Misongo, masusu ne lufu​—bine kebyādipo mu mpango mibajinji ya Leza​—bikekala kutupu’byo, kadi bantu bafwile bakajokela ku būmi pano pa ntanda.

Leza wālaile kupityila kudi mupolofeto Mika amba Meshiasa ukabutwilwa mu Betelema, ne kulaya kupityila kudi mupolofeto Danyele amba wādi wa kwipaibwa mwenda mafuku. Inoko, Leza wādi wa kusangula Meshiasa ne kumubikika bu Mulopwe momwa mūlu. Kadi Danyele wābadikile kumona’mba, Bulopwe bwa Meshiasa bukapingakena lonso pa maludiki makwabo onso. Lelo Meshiasa wāfikile na mokyālailwe?

​—Kukwatañana na Ngalwilo shapita 22-50, Divilu, ne Kupituluka, 2 Samwele, Mitōto, Isaya, Danyele, Mika, Zekadia 9:9.