Le nobe ulombelanga? Bavule balombelanga, enka ne boba kebetabije Leza. Ino le mwanda waka bantu balombelanga? Bwipangudi bumo, bwalombwele amba kyaba kimo bantu makumi atano pa katwa mu Franse balombelanga nansha kulanguluka “mwanda’tu wa kwivwana senene.” Pamo bwa bantu bavule mu Bulaya, kebalombelangapo mwanda wa kutōta Leza. Ino kyobasaka’tu i “kutūkijibwa mutyima na milombelo.” Ino kadi, bantu bamo betabije balombelanga Leza enka shi kudi kyobakimba, batengele kulondololwa kiponka na ponka. —Isaya 26:16.

Le abe nobe? Le ulanga milombelo i muswelo’tu wa ku kukwasha upēlelwe? Shi ukulupile mudi Leza, le kumwenepo’mba milombelo idi na lupusa mu būmi bobe? Le umonanga bu milombelo yobe keilondololwangapo? Bible ubwanya ku kukwasha umone milombelo bu muswelo mulumbuluke wa kukufwenya kudi Leza, ke bu kintupo kya kukukwasha’tu wivwane senene.