Daiane n’Ntemu wa Yehowa udi mu mudimu wa ku dîba ne ku dîba mu Brésil. Dimue dituku pavuaye uyisha ku telefone, wakayukila ne bena dibaka bakuabu bavua bitabe bua kulonga Bible. Bakambila Daiane ne: bavua ne bua kumuangala kuya mu kamusoko ka kule menemene muvua kamuyi nzembu ne muvua enternete kayi ukuatshika to. Bualu bukuabu, mu kamusoko aku kamuvua nansha Ntemu wa Yehowa to. Bua kutungunuka ne muyuki wabu wa malu a mu Bible, bena dibaka abu bakamupesha nimero ya telefone wa muaba wa kubikidilangana wa mbulamatadi. Bakapetangana bua dituku ne dîba dia kuikala kuyukila.

 Pakafika dituku divuabu bumvuangane adi, Daiane wakababikila ku telefone, bobu kuitaba. Mbingu ibidi yakalonda, bavua bayukile nende misangu isatu ku telefone.

 Pashishe, bena dibaka abu kabatshivua bitaba ku telefone to. Daiane kavua mutshioke to, wakatungunuka ne kubikila misangu isatu ku lumingu. Pavuaye apu, muntu yonso uvua witaba ku telefone, uvua uyukila nende malu a mu Bible. Nunku, wakatuadija kulongesha bantu ba bungi ba mu musoko au.

 Dituku dikuabu pavua Daiane ne bayende balongesha nsongalume mukuabu Bible ku telefone, mfumu wa tshitendelelu tshikuabu tshia mu musoko amu wakumvua malu avuabu bayukila. Wakalua kuimana ku luseke lua nsongalume au bua kumvua bimpe bivuabu bayukila. Mfumu wa tshitendelelu au wakalomba bua kuyukila ne Daiane ne bayende. Malu avuaye mumvue akamusankisha bikole, kufikaye ne ku dibalomba bua batuadije kumulongesha Bible.

 Patudi tuakula apa, Daiane ne bayende badi balongesha bantu basambombo ba mu musoko au Bible ku telefone; balongesha kabidi ne mfumu wa tshitendelelu au. Bamue balongi bakadi babuele mu bisangilu, babilodeshile ku telefone au. Mulongi mukuabu muenze too ne tshibasa tshia balongi kusombela padibu balonga Bible.

 Daiane ne bayende badi ne dianyisha dia bungi bua mpunga uvuabu bapete wa kutangalaja mukenji wa Bukalenge mu musoko wa kule au. Daiane udi wamba ne: “Yehowa udi mua kuenza bua muntu yonso ateleje lumu luimpe nansha yeye musombele miaba ya kule menemene.”