“Kadi nenupete bukole panupuekela nyuma muimpe, ne nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.”​—Bienzedi 1:8, Nkudimuinu wa bulongolodi bupiabupia.

 ‘Kadi nuenu nenuangate bukole, panupuekela Nyuma Muimpe pambidi penu; nenuikale bamanyi banyi mu Yelushalema ne mu Yudaya yonso ne Samalea ne kunfudilu kua buloba.’​—Bienzedi 1:8, Mukanda wa Nzambi.

 Yezu wakalaya bayidi bende ne: nyuma muimpe wa Nzambi neabapeshe bukole bua kuyisha too ne ku miaba ya kule menemene ya pa buloba.

 “Nenupete bukole panupuekela nyuma muimpe.” Yezu uvua muambulule dîyi dikavuaye mulaye bayidi bende ne: pavuaye upingana mu diulu uvua ne bua kubatumina diambuluisha dia nyuma a wa Nzambi. (Yone 14:16, 26) Matuku 10 Yezu mumane kubanda mu diulu mu tshidimu tshia 33 P.Y., bayidi bende bakapeta nyuma muimpe uvuaye mubalaye au. (Bienzedi 2:1-4) Nyuma muimpe wa Nzambi wakabambuluisha bua kuenza bishima anyi bua kuakula mu miakulu mishilashilangane, wakabapesha kabidi bukole bua kuyisha bualu bua Yezu ne dikima dionso.​—Bienzedi 3:1-8; 4:33; 6:8-10; 14:3, 8-10.

 “Nenuikale bantemu banyi.” Muaku udibu bakudimune ne: “ntemu” udi uleja “muntu udi ujadika malu” anyi “bualu” budiye mumone anyi mumanye. Bu muvua bapostolo badimuenene nsombelu wa Yezu, bavua mua kujadika mianda ivua mienzeke pavuaye uyisha, pavuaye mufue, ne pavuaye mubishibue ku lufu. (Bienzedi 2:32; 3:15; 5:32; 10:39) Malu avuabu badimuenene akajadikila bantu bakuabu ba bungi ne: Yezu uvua Kristo Masiya mulaya. (Bienzedi 2:32-36, 41) Bantu bakitabuja bapostolo bakalua bantemu ba Yezu, bobu pabu bakayisha bakuabu bualu bua Yezu, bua lufu luende, ne bua dibishibua diende ku lufu.​—Bienzedi 17:2, 3; 18:5.

 “Too ne ku miaba ya kule menemene ya pa buloba.” Badi mua kukudimuna kabidi tshiambilu etshi ne: “too ne ku ntengu ya buloba” anyi “too ne ku matunga makuabu.” Mêyi a Yezu adi aleja tshipapu tshivua bayidi bende ne bua kuikala bantemu bende. Bavua ne bua kuya too ne mu Yudaya ne mu Samalea bua kuambila bakuabu malu avuabu bitabuje. Bavua ne bua kuyisha mu teritware munene bikole ne kuyisha bantu ba bungi kupita Yezu. (Matayi 28:19; Yone 14:12) Bidimu bu 30 Yezu mumane kuamba mêyi au, mupostolo Paulo wakafunda ne: lumu luimpe lua bualu bua Yezu lukavua luyishibue “munkatshi mua bifukibua bionso bidi muinshi mua diulu,” nansha mu miaba ya kule bu mudi Lomo, Pâtia (ku sud-est kua Mbuu wa Caspienne), ne mu Afrike wa ku nord.​—Kolosayi 1:23; Bienzedi 2:5, 9-11.

 Mukanda wa Bienzedi udi ubanga kumvuija malu amue amue adi ku ndekelu kua Evanjeliyo wa Luka. (Luka 24:44-49; Bienzedi 1:4, 5) Muyidi Luka mufundi wa mukanda au wakatuadija kulonda muvua Yezu mumuenekele bayidi bende pavuaye mubishibue ku lufu. (Bienzedi 1:1-3) Pashishe wakalonda muvua tshisumbu tshia bena Kristo tshienjibue ne tshitante kubangila mu 33 P.Y. too ne bu mu 61 P.Y.​—Bienzedi 11:26.

 Malu adi Bienzedi 1:8 wakuila adi aleja ne: bayidi ba Yezu bavua badiebeja ni Yezu uvua ne bua kubanga kukokesha bu Mukalenge wa Bukalenge bua Nzambi patshivuabu ne muoyo. (Bienzedi 1:8, 6) Yezu wakabandamuna ne: kabaditatshishi bikole bua kumanya tshikondo tshivua Bukalenge bujadikibua to. (Bienzedi 1:7) Kadi bavua ne bua kudifila bikole ku dimanyisha bualu bua Yezu “too ne ku miaba ya kule menemene ya pa buloba.” (Bienzedi 1:8) Lelu bena Kristo badi balonda pabu tshilejilu atshi, badi bayisha lumu luimpe lua Bukalenge bua Nzambi ne tshisumi.​—Matayi 24:14.

 Tangila filme muîpi eu bua kumona kadiosha ka mukanda wa Bienzedi.