Eyowa. Bible mmukanda udi ne meji uvuabu bafunde kale. Udi ne mandamuna a nkonko ya mushinga itu bantu badiela ne udi mua kukuambuluisha bua udiumvue bimpe ne upete ditalala dia munda. Mona imue nkonko ituye wandamuna.

1.   Mufuki utuku anyi? Bible udi wamba ne: Nzambi “wakafuka bintu bionso.” (Buakabuluibua 4:11) Bu mudi Nzambi muikale Mufuki, mmumanye tshitudi tukengela bua kumvua bimpe ne kuikala ne disanka.

2.   Nzambi utu untabalela anyi? Bible kena wamba ne: Nzambi udi kule ne bantu to, kadi udi wamba mudiye “kayi kule ne yonso wa kutudi.” (Bienzedi 17:27) Mmumanye malu adi akufikila ne mmusue kukuambuluisha bua utute diakalenga.​—Yeshaya 48:17, 18; 1 Petelo 5:7.

3.   Mmunyi mudi kumanya Nzambi mua kungambuluisha bua ndiumvue bimpe? Nzambi mmutufuke ne “dijinga dia malu a mu nyuma,” mmumue ne: tudi tuledibua ne dijinga dia kumanya tshidi muoyo utudi nawu umvuija ne kipatshila kawu. (Matayi 5:3) Dijinga dietu dia malu a mu nyuma didi ditusaka kabidi bua kumanya Mufuki wetu ne kudia nende bulunda. Nzambi kakushala muvunge maboko patudi tuditatshisha bua kumumanya to, bualu Bible udi wamba ne: “Semenayi pabuipi ne Nzambi ne yeye neasemene pabuipi nenu.”​—Yakobo 4:8.

 Bantu bungi kabuyi kubala mbafike ku dimona ne: kudia bulunda ne Nzambi nkubambuluishe bua bobu kuikala bimpe ne nkubaleje tshia kuenza bua kuikala kudiumvua bimpe. Kumanya Nzambi kakuakuenza bua kupetshi ntatu to, kadi meji ende adi mu Bible adi mua kukuambuluisha bua

•   Kuikala ne nsombelu wa disanka dia bungi mu dîku.

•   Kuikala mu ditalala ne bakuabu.

•   Kumanya mua kupita ne ntatu mishilashilangane bu mudi dibungama dikole, disamisha mutu bua malu a makuta, ne disama dia munanunanu.

 Bitendelelu bia bungi bidi bilongesha bantu ne Bible kabitu mu bulelela bitumikila malongesha adimu to. Kadi ntendelelu mulelela udi mulamate ku tshidi Bible wamba menemene neakuambuluishe bua kumanya Nzambi.