Mvita ya Armagedone, mmvita ya ndekelu yenzeka pankatshi pa Nzambi ne mbulamatadi ya bana ba bantu. Mbulamatadi eyi ne badi bayitua mpanda badi baluisha Nzambi nansha lele eu, bualu badi babenga kukokela bukokeshi buende. (Misambu 2:2) Mvita ya Armagedone neyituishe makalenga a bana ba bantu ku tshibungubungu.​—Danyele 2:44.

 Muaku “Armagedone” udi anu muaba umue mu Bible, mu Buakabuluibua 16:16. Mukanda wa Buakabuluibua udi wakula bua mêyi a buprofete a ne: Nebasangishe “Bakalenge ba pa buloba bujima budi bantu basombele” pamue “muaba udibu babikila mu tshiena Ebelu ne: Armagedone,” Bua “mvita ya dituku dinene dia Nzambi Wa Bukole Buonso.”​—Buakabuluibua 16:14.

 Mbanganyi baluangana ku mvita ya Armagedone? Yezu Kristo ne tshiluilu tshia mu diulu tshidiye ulombola nebatshimune baluishi ba Nzambi. (Buakabuluibua 19:11-16, 19-21) Mu baluishi ba Nzambi emu mudi bantu badi babenga bukokeshi buende ne kabayi bamuleja kanemu nansha.​—Yehezekele 39:7.

 Mvita ya Armagedone neyenzekele ku est kua Asie anyi? Tòo. Kayakuenzekela muaba umue to, kadi neyenzeke pa buloba bujima.​—Yelemiya 25:32-34; Yehezekele 39:17-20.

 Muaku Armagedone utubu bafunda kabidi ne: “Ha-Megido” (mu tshena Ebelu ne: Har Meghiddohnʹ) udi umvuija: “Mukuna wa Megido.” Megido uvua tshimenga tshia mu Isalela wa kale. Miyuki ya kale idi ileja ne: mvita minene ivua yenzekela pabuipi ne tshimenga atshi, ne imue ya kudiyi mmifunda mu Bible. (Balumbuluishi 5:19, 20; 2 Bakalenge 9:27; 23:29) Armagedone kena uleja muaba wetu muena-dîna uvua pabuipi ne tshimenga tshia Megido wa kale to. Kakuena mukuna munene kuntu aku to, ne bantu bonso balua kuluisha Nzambi kabakukumbana mu tshibandabanda tshia Yizelele to. Kadi Armagedone mmvita minene yenzeka pa buloba bujima, pankatshi pa Nzambi ne bisamba bidi bidisange bua kuluisha bukalenge buende bua musangu wa ndekelu.

 Nsombelu neikale mushindu kayi mu mvita ya Armagedone? Nansha mutudi katuyi bamanya mushindu wakuata Nzambi mudimu ne bukole buende, kadi neikale anu ne bia mvita bimue bimue bivuaye mubutule nabi bantu babi ku kale; mbia mvita bu mudi: mvula wa mabue, dikanka dia buloba, mvula wa tshipupu, kapia ne sufre, mipenyi ne masama. (Yobo 38:22, 23; Yehezekele 38:19, 22; Habakuka 3:10, 11; Zekâya 14:12) Baluishi ba Nzambi bakuabu nebashipangane bobu nkayabu bu muikalabu mu dilubakana dikole, ne nebalue kujingulula ne: nNzambi ke uvua ubaluisha.​—Yehezekele 38:21, 23; Zekâya 14:13.

 Armagedone neikale nshikidilu wa buloba anyi? Kakuikala nshikidilu wa dibulunge dietu dia buloba edi to, bualu buloba mmuaba udi bantu basomba bua kashidi. (Misambu 37:29; 96:10; Muambi 1:4) Armagedone kakubutula bantu bonso to, kadi neasungile bakuabu; bualu “musumba munene” wa batendeledi ba Nzambi neupanduke ku mvita ayi.​—Buakabuluibua 7:9, 14; Misambu 37:34.

 Imue misangu mu Bible batu batela muaku “buloba” bua kuakula bua dibulunge dietu dia buloba edi, ne misangu mikuabu bawutela bua kuakula bua bantu babi badi batombokele Nzambi. (1 Yone 2:15-17) Nunku, Armagedone neenze bua kuikala “nshikidilu wa buloba”, tuambe ne: ubutula bantu babi badi batombokele Nzambi.​—Matayi 24:3, MMM.

 Mvita ya Armagedone neyenzeke dîba kayi? Yezu wakamba bua “dikenga dinene” diajika ne mvita ya Armagedone ne: “Bua dituku adi ne dîba adi muntu nansha umue ki mmumanye, nansha banjelu ba mu diulu, nansha Muana, kadi anu Tatu.” (Matayi 24:21, 36) Bible udi uleja ne: Armagedone neatuadije mu tshikondo tshia dikalaku dia Yezu didi kadiyi dimueneka tshikavua tshituadije katshia ku tshidimu tshia 1914.​—Matayi 24:37-39.