Bua tshinyi bantu kabatshiena banemeka bakuabu?

TELEJA MU

BUA TSHINYI BIDI NE MUSHINGA BUA KUNEMEKA BAKUABU

Patudi tunemeka bakuabu, nsombelu kena mua kutamba kunyanguka pankatshi petu nabu to.

Lusumuinu lua mu Bible ludi luamba ne : “Diandamuna dia bupole didi dituyisha luonji, kadi dîyi dishile didi dilundula tshiji.” (Nsumuinu 15:1) Tuetu tuakula anyi tuenza malu katuyi ne kanemu, bidi mua kukebesha lutatu lunene, bualu bidi anu bu kuela esanse mu kapia.
Yezu wakamba ne: “Mukana mudi muamba anu malu adi mavulangane mu muoyo.” (Matayi 12:34) Tuetu tuakula katuyi ne kanemu, bidi mua kuleja meji atudi nawu bua bantu badi bashilangane netu ku dikoba, ku tshisa, ku tshisamba, anyi ku malu makuabu a mu nsombelu.

Bilondeshile bantu bapite pa 32 000 bavuabu bele nkonko mu matunga 28, bia pa lukama 65 bia bantu abu mbiambe ne: lelu bantu mbabule kanemu mu mushindu mubi be!

TSHIUDI MUA KUENZA

Nansha wewe mu kalasa anyi ku mudimu, nemeka bantu bonso, nansha nuenu bashilangane nabu ku mmuenenu wa malu. Keba bua kujingulula malu adibu bamba audi pebe mua kuitaba. Abi nebikuambuluishe bua kubenga kubabipisha anyi kubalumbuluisha.

“Lekelayi kulumbuluishangana bua kabanulumbuluishi penu.”—Matayi 7:1.

Enzela bakuabu malu muudi musue bua bakuenzele pebe. Wewe wenzela bantu malu mimpe ne makane, nebakuenzelawu pebe.

“Anu bu munutu basue bua bantu banuenzele malu, nubenzele pabu mushindu wa muomumue.”—Luka 6:31.

Ikala ufuilangana luse. Muntu yeye mukuambe dîyi dibi anyi mukuenzele bualu bubi, kuambi ne: udi ne meji mabi to.

“Busunguluji bua muntu budi butuyisha tshiji tshiende, ne mbulengele kudiye bua kulengulula tshilema.”—Nsumuinu 19:11.

TSHITU BANTEMU BA YEHOWA BENZA

Miaba yonso itu Bantemu ba Yehowa basombele anyi benzela midimu, batu banemeka bantu ne babasaka bua kunemekanganabu pabu.

Tutu tulomba bantu bonso bua kulonga nabu Bible, kadi katutu tubenzeja bua bitabe malongesha etu anyi ngenyi yetu to. Tutu tudienzeja bua kutumikila mubelu wa mu Bible wa kuyisha bantu mukenji “ne bupole ne kanemu kakole.”—1 Petelo 3:15; 2 Timote 2:24.

Katutu ne kansungansunga to, tutu tuakidila bantu ba miaba yonso badi basue kulonga Bible patubu balua mu bisangilu bietu. Tutu tudienzeja bua kubenga kuikala ne malu makole. Kadi tutu ‘tunemeka bantu ba mishindu yonso.’—1 Petelo 2:17.

Tutu tunemeka banene ba mbulamatadi badi bakokesha lelu. (Lomo 13:1) Tutu tutumikila mikenji yabu ne tufuta bitadi. Nansha mututu katuyi tubuelakana mu malu a tshididi, tutu tunemeka bukenji bua bakuabu bua kudiangatshila mapangadika mu malu a tshididi.

TABULUKAYI!