TSHIKONDO tshivuabu bafunda Bible, bavua bafila biuma mu dîku dia ba mukaji pakavua bena mêku onso abidi bitabe bua dibaka dienzeke. Bavua pamuapa bafila bintu bia mushinga mukole, nyama, anyi makuta. Misangu mikuabu, muntu uvua wenza mudimu kampanda pamutu pa yeye kufila biuma, anu muakenza Yakoba. Wakitaba bua kuenzela tatuende wa Lakele mudimu bidimu muanda mutekete bua kumupeshabu Lakele. (Gen. 29:17, 18, 20) Ntshinyi menemene tshivuabu bafidila biuma?

Mumanyi kampanda wa malu a mu Bible, diende Carol Meyers, udi wamba ne: “Biuma bivua bu difutu divua dipingana pa mudimu mukole uvua nsongakaji wenzela ba mu dîku diabu, mudimu uvua ne muaba munene mu mêku [a babidime].” Biuma bivua kabidi biambuluisha bua kukolesha malanda pankatshi pa mêku abidi akadi mpindieu masangisha muaba umue kudi dibaka. Bena mu mêku onso abidi aa bavua mua kuambuluishangana mu bikondo bia ntatu. Biuma bivua kabidi bijadika ne: uvuabu babifidile uvua ulue mukaji wa bende. Bijadika kabidi ne: tatuende kavua wambula kabidi bujitu buende to, kadi bayende ke uvua mpindieu ubuambula.

Pavuabu bafila biuma kabivua biumvuija ne: mukaji uvua tshintu tshivuabu mua kusumba peshi kupana to. Mu mukanda kampanda badi bambamu ne: “Dienzeja muntu bua kufila makuta bungi kampanda mu dîku dia bansongakaji peshi tshintu tshivua tshikumbanangana nawu, divua divuija diselangana mu Isalele anu bu dienda mushinga. Kadi bidi bimueneka ne: [biuma] bivua anu bu difutu divuabu bapesha bena mu dîku dia ba mukaji bua muanabu, kabivua bu bintu kampanda bivuabu bafila bua kusumba mukaji to.” (Ancient Israel​—Its Life and Institutions)

Lelu eu, mu amue matunga bantu batshidi anu ne tshilele tshia kufila biuma. Nunku padi baledi bena Kristo balomba biuma, badi benza muabu muonso bua ‘bantu bonso bamanye mudibu kabayi bena malu makole,’ kabayi balomba bintu bipitshidile to. (Filip. 4:5; 1 Kol. 10:32, 33) Padibu benza nanku, badi baleja mudibu kabayi “banangi ba makuta” peshi bena lukuka. (2 Tim. 3:2) Bualu bukuabu, padi baledi bena Kristo kabayi balombe biuma bipitshidile, mulume kakudimona muenzejibue bua kulepesha matuku a bobu kuselengana too ne papetaye makuta a kufila bua biuma to. Peshi kakudimona kabidi muenzejibue bua kulekela bumpanda-njila bualu bidi bikengela enze mudimu kua dinda ne kua dilolo bua kupeta makuta adiye mua kufila bua bintu bipite bungi bidibu balombe bua biuma to.

Mu imue miaba, mbulamatadi ukadi mukose bungi bua biuma bia kufila ku buku. Baledi bena Kristo badi miaba idibu bele mikenji ayi batu bayitumikila. Bua tshinyi? Bualu mu Dîyi dia Nzambi badi balomba bena Kristo bua ‘kukokela bakokeshi badi ku mutu’ ne kutumikila mikenji idi kayiyi ibengangana ne mikenji ya Nzambi to.​—Lomo 13:1; Bien. 5:29.