1, 2. Bua tshinyi bidi bikengela tuakule bua mushindu wa kusamba bantu badi ne kanyinganyinga? (Tangila tshimfuanyi tshia ntuadijilu tshia tshiena-bualu.)

SUSI wakamba ne: “Bu pabuipi ne tshidimu tshijima panyima pa lufu lua muanetu wa balume, tuvua ne kanyinganyinga kakole katambe.” Muanetu wa balume mukuabu uvua mukajende mufue lufu lua tshikoso wakamba ne: uvua umvua “mubidi usama mu mushindu udi kawuyi kumvuija.” Bia dibungama, bantu ba bungi batu bumvua kanyinganyinga ka mushindu eu. Mu tshisumbu tshia bena Kristo lelu, bana betu ba balume ne ba bakaji ba bungi kabavua batekemene ne: bananga babu bavua mua kufua kumpala kua Armagedone to. Pamuapa muntu kampanda uudi munange mmufue, anyi udi mumanye muntu udi ne kanyinganyinga. Bikalabi nanku, udi mua kudikonka ne: ‘Mmunyi mudi muntu udi ne kanyinganyinga mua kupeta busambi?’

² Bamue bantu badi bamba ne: mputa ya kanyinganyinga idi mua kudiumina mu bule bua matuku. Kadi bitu anu nanku anyi? Mukaji mukamba kampanda wakamba ne: “Ngakamona ne: mbikumbane menemene bua kuamba ne: bualu budi muntu kampanda wenza tshikondo atshi ke budi buambuluisha bua kujikija kanyinganyinga.” Bua mputa wetu muena dîna eu kumayi, bitu bilomba tshikondo bule  kampanda ne kumutabalela. Bia muomumue, bua kujikija kanyinganyinga kadi naku muntu, bitu bilomba tshikondo bule kampanda ne kumutabalela. Ntshinyi menemene tshidi mua kuambuluisha bantu badi ne kanyinganyinga bua kukakepesha?

3, 4. Ntshinyi tshidi tshitujadikila ne: Yehowa udi umvua kanyinganyinga katudi naku?

³ Tatu wetu wa luse, Yehowa, ke muntu munene udi utusamba ne busambi butudi nabu dijinga. (Bala 2 Kolinto 1:3, 4.) Yeye udi tshilejilu tshitambe bunene tshia muntu udi uditeka pa muaba wa bakuabu, ne udi ulaya bantu bende ne: “Meme, meme mene, nyeye udi unusamba.”​—Yesh. 51:12; Mis. 119:50, 52, 76.

⁴ Tatu wetu wa dinanga ukadi pende mufuishe bantu badiye munange, bu mudi batendeledi bende aba: Abalahama, Izaka, Yakoba, Mose ne mukalenge Davidi. (Nom. 12:6-8; Mat. 22:31, 32; Bien. 13:22) Bible udi utuleja ne: Yehowa udi bushuwa muindile ne muoyo kuulu kuulu dituku diabishaye balume ba lulamatu aba ku lufu. (Yobo 14:14, 15) Tshikondo atshi, nebikale ne disanka ne makanda a mubidi mapuangane. Yehowa uvua kabidi mufuishe Muanende muanabute. Bible udi wamba ne: Yezu ke muntu uvua Nzambi “nangananga mutambe kunanga.” (Nsu. 8:22, 30, NWT) Mbikole bua tuetu kufuanyikija muvuabi bitonde Yehowa bua kumona Muanende ufua lufu lubi.​—Yone 5:20; 10:17.

5, 6. Mmunyi mudi Yehowa utusamba?

⁵ Tudi ne bua kuikala ne dishindika dikole dia ne: Yehowa neatuambuluishe. Nunku tudi ne bua kuikala misangu yonso tudiumvua badilekelele bua kumusambila ne kumuleja kanyinganyinga kakole katudi naku. Ndikoleshibua ku muoyo kayipu dia kumanya ne: Yehowa mmumanye mutudi tudiumvua ne udi utusamba ne busambi butudi nabu dijinga! Mmunyi mudiye wenza nanku?

⁶ Umue mushindu udi Yehowa utusamba nku diambuluisha dia nyuma wende muimpe. (Bien. 9:31) Yezu wakalaya ne: bantu bonso bavua mua kulomba Tatu wetu nyuma wende muimpe wa bukole, ne uvua ne bua kubapeshaye. (Luka 11:13) Susi utukadi batele udi wamba ne: “Kuvua misangu ya bungi ituvua tutua binu, tulomba Yehowa busambi. Misangu yonso ituvua tudiumvua bashale nkaya, ditalala dia Nzambi divua bushuwa dilame mioyo yetu ne lungenyi luetu.”​—Bala Filipoyi 4:6, 7.

7, 8. Ntshinyi tshidi tshitujadikila ne: Yezu neatusambe?

⁷ Pavua Yezu pa buloba, wakidikija bimpe menemene ngikadilu milenga ya Tatuende ku bivuaye wamba ne wenza. (Yone 5:19) Yehowa wakatuma Yezu pa buloba bua kusamba “mitshima ya badi batamba kunyingalala” ne “bonso badi mu madilu.” (Yesh. 61:1, 2; Luka 4:17-21) Bantu bavua bamanye ne: Yezu uvua mumanye dikenga diabu ne uvua bushuwa musue kubambuluisha.​—Eb. 2:17.

⁸ Patshivua Yezu muana wa tshitende, uvua pamuapa mufuishe balunda bende pa muoyo ne bena mu dîku diabu. Tshilejilu, bidi bimueneka ne: tatuende mudishi, Jozefe, uvua mua kuikala mufue patshivua Yezu muana. * (Bala dimanyisha.) Ela meji muvuabi mua kuikala bikole bua muana uvua utabalelangana eu kutantamena kanyinganyinga kavuaye yeye, mamuende ne bana babu ba balume ne ba bakaji naku.

9. Mmunyi muvua Yezu muleje ne: uvua uditeka pa muaba wa bakuabu pakafua Lazalo?

⁹ Pavua Yezu uyisha, wakaleja ne: uvua  bushuwa umvuila bantu ne uditeka pa muaba wabu. Tshilejilu, pavua mulunda wende wa pa muoyo Lazalo mufue, Yezu wakumvua kanyinganyinga kakole kavua naku Mariya ne Mâta. Kanyinganyinga kavuaye mumvue pavuaye muditeke pa muaba wabu kakamufikisha too ne ku didila nansha muvuaye mumanye ne: uvua ne bua kubisha Lazalo ku lufu.​—Yone 11:33-36.

10. Ntshinyi tshidi tshitujadikila lelu ne: Yezu mmumanye mutudi tudiumvua?

¹⁰ Mmunyi mudi mêyi a Yezu a busambi avuaye musambangane nawu kale mua kutuambuluisha lelu? Bible udi uleja patoke ne: Yezu ki mmushintuluke to. Udi wamba ne: “Yezu Kristo udi muomumue makelela, lelu ne bua kashidi.” (Eb. 13:8) Badi bamubikila ne: “Mulombodi Munene udi ufikisha ku muoyo” bualu udi utuambuluisha bua tuetu kupeta muoyo wa kashidi. Yezu mmumanye kabidi kanyinganyinga ka muntu ne muntu, ne “mmukumbane bua kuambuluisha bantu badibu bateta.” (Bien. 3:15; Eb. 2:10, 18) Nanku tuikale bajadike ne: Yezu utshidi anu umvua bibi padi bantu bakuabu ne kanyinganyinga. Mmumanye kanyinganyinga kabu, ne mmukumbane bua kubasamba “pa dîba dikumbane.”​—Bala Ebelu 4:15, 16.

11. Mmvese kayi itu itamba kukusamba wewe?

¹¹ Muyuki udi wakula bua kanyinganyinga kakole kavua naku Yezu pavua Lazalo mufue, ngumue wa ku miyuki idi mu mvese ya bungi idi mu Dîyi dia Nzambi idi ikolesha. Kabiena bitukemesha to, bualu “malu onso avuabu bafunde kale bavua baafunde bua kutulongesha, bua tupete ditekemena ku diambuluisha dia dinanukila dietu ne dia busambi bua mu Mifundu minsantu.” (Lomo 15:4) Wewe ne kanyinganyinga, udi pebe mua kupetela busambi buimpe mu mvese bu mudi idi ilonda eyi:

• ‘Yehowa udi pabuipi ne bantu badi ne mitshima itamba kunyingalala, udi usungila badi ne mitshima ya majiya.’​—Mis. 34:18, 19.

• ‘Mu divulangana dia matata munda muanyi, busambi buebe budi busankisha mutshima wanyi.’​—Mis. 94:19.

• “Mukalenge wetu Yezu Kristo yeye nkayende ne Nzambi Tatu wetu uvua mutunange ne mutupeshe busambi bua tshiendelele ne ditekemena dimpe ku diambuluisha dia ngasa wende, basambe mioyo yenu ne banukoleshe.”​—2 Tes. 2:16, 17. *​—Tangila dimanyisha.

12. Mmunyi mutudi mua kusamba bakuabu?

¹² Bantu badi ne tunyinganyinga badi mua kupetela kabidi busambi mu tshisumbu tshia bena Kristo. (Bala 1 Tesalonike 5:11.) Mmunyi mutudi mua kukolesha ne kusamba bantu badi ne ‘muoyo wa majiya’? (Nsu. 17:22) Vuluka ne: kudi ‘tshikondo tshia kupuwa ne tshikondo tshia kuakula.’ (Muam. 3:7) Mukaji mukamba kampanda diende Dalene, udi umvuija ne: bantu badi ne kanyinganyinga batu dijinga ne kuleja malu adi mabatonde ne mudibu badiumvua. Nunku, bualu bua mushinga mukole buudi mua kuenza nkubateleja kuyi ubakosa ku mêyi. Junia muena muanabu wa balume uvua mudishipe udi wamba ne: “Nansha muudi kuyi mua kumvua bimpe menemene kanyinganyinga kadibu naku, bualu bua mushinga budi ne: udi musue kumvua mudibu badiumvua.”

13. Ntshinyi tshitudi ne bua kuvuluka bua kanyinganyinga?

¹³ Tudi ne bua kuvuluka ne: tuetu bonso katutu tumvua kanyinganyinga ne tukaleja mu mushindu wa muomumue to. Imue misangu bitu bikole bua kumvuija menemene bukole bua kanyinganyinga katudi naku. Dîyi dia Nzambi didi diamba ne: ‘Mutshima wa muntu udi mumanye kanyinganyinga kawu, ne kakuena muntu  wa bende udi mua kujingulula disanka diawu.’ (Nsu. 14:10) Nansha muntu mumvuije menemene mudiye udiumvua, kabitu anu bipepele bua bantu bakuabu kumvuabu tshidiye usua kuamba to.

14. Ntshinyi tshitudi mua kuamba bua kusamba bantu badi ne kanyinganyinga?

¹⁴ Bidi mua kukola bua kumanya tshia kuambila muntu udi ne kanyinganyinga. Kadi Bible udi wamba ne: ‘Ndimi ya bena meji idi isankisha bantu.’ (Nsu. 12:18) Bantu ba bungi mbapete mêyi a kusambangana nawu mu broshire wa Padi muntu uudi munange ufua. * Kadi misangu ya bungi, bualu budi buambuluisha bikole buudi mua kuenza ‘nkudila ne badi badila.’ (Lomo 12:15) Gaby, uvua mufuishe bayende, udi wamba ne: imue misangu kudila ke wende mushindu wa kuleja mudiye udiumvua. Udi wamba kabidi ne: “Ke bualu kayi ntu mpeta busambi padi balunda banyi badila nanyi. Dîba adi, tshitu ndiumvua muikale ne kanyinganyinga nkayanyi to.”

15. Mmunyi mutudi mua kusamba bakuabu biobi bitukolela bua kubasamba buludiludi? (Bala kabidi malu adi mu kazubu ka ne: “ Mêyi mimpe a busambi.”)

¹⁵ Biobi bikukolele bua kuambila muntu mêyi a kumusamba nawu buludiludi, bidi mua kuikala bipepele bikole bua kumufundila mêyi pa karte, kumutumina mesaje ku Enternete, mu telefone anyi kumufundila mukanda. Udi mua kumufundila patupu mêyi a mu mvese kampanda adi akolesha, kutela ngikadilu kampanda wa pa buende uudi muvuluke wa muntu udi mufue, anyi kumuambila bualu kampanda bua disanka buuvua munange budi butangila muntu au. Junia udi wamba ne: “Kupeta mêyi makese adi akolesha mu mesaje anyi dibikila dia kupitshisha dîba ne bena Kristo nanyi kudi kungambuluisha bikole menemene. Bidibu bangenzela ebi bidi bindeja ne: mbannange ne badi bantabalela.”

16. Mmushindu kayi mutambe buimpe wa kusambangana?

 ¹⁶ Masambila etu adi mua kuambuluisha bana betu bena Kristo badi ne tunyinganyinga. Tudi mua kusambila bua bualu buabu anyi mene kusambila nabu. Nansha mudibi mua kuikala bikole bua kuenza nanku bua muudi umvua mua kudila, disambila diebe dienza ne muoyo mujima didi mua kuikala busambi buvule. Dalene udi uvuluka ne: “Imue misangu pavua bana betu ba bakaji balua kunsamba, mvua mbalomba bikalabu bavua basue kuenza disambila. Pavuabu batuadija kusambila, ku ntuadijilu bavua batata bua kupeta tshia kuamba, kadi misangu yonso, panyima pa biambilu bikese, dîyi diabu divua dienda dikola ne bavua benza disambila divua dilenga ku muoyo bikole. Ditabuja diabu dikole, dinanga diabu, ne diditatshisha diabu mbikoleshe ditabuja dianyi.”

17-19. Bua tshinyi tudi ne bua kutungunuka ne kusambangana?

¹⁷ Mbikole bua kumanya bimpe bule bua tshikondo tshidi muntu mua kushala ne kanyinganyinga. Padi muntu ufuisha muntu kampanda udiye munange, balunda ne balela ba bungi ke batu balua ba kumpala bua kumusamba. Kadi pashishe badi bapingana ku malu abu a pa tshibidilu, eku badi ne kanyinganyinga bikale anu dijinga ne busambi. Nunku, ikala mudiakaje bua kubambuluisha. Bible udi wamba ne: ‘Mulunda utu wananga mu bikondo bionso, mmuanetu utu waleja bulela mu tshikondo tshia dikenga.’ (Nsu. 17:17) Tudi ne bua kusamba badi ne kanyinganyinga mu tshikondo tshionso tshidibu netu dijinga.​—Bala 1 Tesalonike 3:7.

¹⁸ Vuluka ne: kanyinganyinga kadi mua kukuata muntu diakamue dîba kayi dionso. Kadi mua kuikala kakebesha kudi bikondo bia mifikilu, misambu kampanda, foto, malu kampanda avua udi mufue wenza, anyi dipembu kansanga, dîyi, nansha muvu kampanda wa mu tshidimu. Padi mukaji mukamba anyi mulume udi mufuishe mukajende wenza bualu kampanda bua musangu wa kumpala nkayende, bu mudi kubuela mu mpuilu anyi mu Tshivulukilu, bidi mua kumusama ku muoyo bikole. Muanetu wa balume mukuabu udi ulonda ne: “Mvua mutekemene ne: mufikilu wanyi wa dibaka wa kumpala uvua mua kunkebela kanyinganyinga kakole, ne kabivua bipepele to. Kadi bana betu ba balume ne ba bakaji bakalongolola bua tuetu kusomba pamue ne balunda banyi ba pa muoyo bua tshidimonyi nkayanyi to.”

¹⁹ Vuluka ne: ki nganu mu bikondo bia pa buabi bitu bantu badi ne kanyinganyinga dijinga ne dikankamija to. Junia udi umvuija ne: “Misangu ya bungi, diambuluisha ne disombeshangana padiku kakuyi tshibilu tshia pa buatshi bidi mua kuambuluisha bikole. Bikondo kabiyi bilongolola bia nunku bidi ne mushinga wa bungi ne bidi bifila busambi buvule.” Bushuwa, katuena mua kujikija kanyinganyinga konso anyi bunkaya to, kadi tudi mua kusamba aba badi ne kanyinganyinga patudi tubenzela malu kampanda. (1 Yone 3:18) Gaby udi wamba ne: “Ndi bushuwa ne dianyisha kudi Yehowa bua bakulu ba dinanga bavua bangambuluishe bua kupita bimpe ne lutatu luonso lumvua nalu. Bavua bushuwa benze bua ndiumvue mu maboko a dinanga a Yehowa.”

20. Bua tshinyi milayi ya Yehowa idi itupetesha busambi buvule?

²⁰ Bidi bikolesha ku muoyo bua kumanya ne: Yehowa Nzambi wa busambi buonso neajikije kashidi tunyinganyinga tuonso tshikondo tshia dibisha dia bantu ku lufu. (Yone 5:28, 29) Nzambi udi ulaya ne: neajikije ‘lufu tshiendelele; ne Mukalenge Yehowa neakupule binsonji ku mêsu kua bantu bonso.’ (Yesh. 25:8) Pashishe, pamutu pa ‘kudila ne badi badila,’ muntu yonso pa buloba ‘neasanke ne badi basanka.’​—Lomo 12:15.