Patutu tufuisha muntu utudi banange, tutu tudila bualu tudi bamujimije. Nansha muvua Yezu munange Lazalo, kavua mupuekeshe binsonji bualu Lazalo uvua mufue to. Wakadila bualu uvua uditeka pa muaba wa balela ba Lazalo ne balunda bende, anu mudibi bileja mu muyuki udi wakula bua bualu ebu udi mu mukanda wa Yone.​—Yone 11:36.

Pavua Yezu mumvue kumpala ne: Lazalo uvua usama, kakaya diakamue bua kumuondapa to. Bible udi wamba ne: “Pakumvuaye ne: [Lazalo] uvua usama, wakashala matuku abidi muaba uvuaye.” (Yone 11:6) Bua tshinyi Yezu wakanengakana? Wakenza nanku bualu uvua ne tshivuaye wipatshila. Wakamba ne: “Disama adi ki ndia lufu to, kadi ndilue bua butumbi bua Nzambi, bua Muana wa Nzambi atumbishibue bua bualu buadi.” (Yone 11:4) Nunku, Yezu uvua ujinga kukuata mudimu ne lufu lua Lazalo “bua butumbi bua Nzambi.” Mushindu kayi? Yezu ukavua pa kuenza tshishima tshinene pa kujula mu lukita mulunda wende ukavua mufue.

Pavua Yezu uyukila ne bayidi bende musangu au, wakafuanyikija lufu ne tulu. Ke bualu kayi wakabambila ne: uvua ‘uyaku bua kubisha Lazalo.’ (Yone 11:11) Bua Yezu, kujula Lazalo ku lufu kuvua anu bu mudi muledi ubisha muanende ku tulu. Nunku lufu lua Lazalo kaluvua bualu buvua mua kumunyingalaja to.

Kadi tshivua tshifikishe Yezu ku dipuekesha binsonji ntshinyi? Muyuki udi wakula bua bualu ebu udi ufila kabidi diandamuna. Pavua Yezu mupetangane ne Mariya muanabu ne Lazalo ne mumumone yeye ne bantu bakuabu badila, “wakashikunkila munda muende, kupampakanaye.” Pavua Yezu mumone muvuabu ne kanyinganyinga, biakamusama ku muoyo, kumufikishabi ku ‘dishikunkila munda muende.’ Ke bualu kayi “Yezu wakapuekesha binsonji.” Yezu wakabungama bikole bua muvuaye mumone balunda bende banyingalala bikole.​—Yone 11:33, 35.

Muyuki eu udi uleja ne: Yezu udi ne bukole bua kupingajila bantu batudi banange muoyo ne makanda a mubidi mu bulongolodi bupiabupia budi kumpala. Udi kabidi utuambuluisha bua kumona ne: Yezu utu umvua anu mutu bantu bumvua padi lufu lua kudi Adama lukuata bantu badibu banange. Muyuki eu udi utulongesha kabidi ne: tudi ne bua kuditeka pa muaba wa bantu badi banyingalala bikole bua lufu lua bantu badibu banange.

Yezu uvua mumanye ne: uvua ne bua kubisha Lazalo. Kadi wakapuekesha binsonji bualu uvua munange balunda bende bikole ne uvua uditeka pa muaba wabu. Bia muomumue, kuditeka pa muaba wa bakuabu kudi mua kutusaka bua ‘kudila ne badi badila.’ (Lomo 12:15) Kuleja kanyinganyinga ka nunku, kakuena kuleja ne: muntu mmupangile ditabuja dia ne: bafue nebabishibue to. Nunku, Yezu mmushiye tshilejilu tshimpe tshia kuditeka pa muaba wa bantu badi bafuishe pavuaye mudile ne muoyo mujima nansha muvuaye mumanye ne: uvua ne bua kubisha Lazalo.