Udi musue kumanya bulelela pa bidi bitangila Nzambi, mmumue ne: tshidiye, malu adiye munange ne adiye mukine ne tshidi disua diende anyi? Yehowa Nzambi udi uleja tshidiye menemene mu Bible Dîyi diende. Ki mmuntu yonso udi mua kubala Bible ne kumvua bimpe bulelela budimu to. Bua tshinyi? Bualu kumvua bimpe bulelela ebu ndiakalenga dinene didi muntu yonso kayi mua kupeta to. Tukonkononayi tshivua Yezu muambe bua bualu ebu.​—Bala Matayi 11:25.

Mvese eu udi utuadija ne mêyi aa: “Dîba adi Yezu wakamba ne:.” Kadi tshivua Yezu usua kuamba tshivua pamuapa mu diumvuangana ne malu avua afuma ku dienzeka. Uvua ufuma ku dibela bantu bavua babenga kumuitaba ba mu bimenga bisatu bia mu Galela muvuaye muenze malu a kukema. (Matayi 11:20-24) Udi mua kudiebeja ne: ‘mmunyi muvua muntu mua kumona bishima bia Yezu kadi ubenga kuitaba bulelela buvuaye ulongesha?’ Dibenga kumvua dia bantu didi dilondeshila tshidi muoyo wabu.​—Matayi 13:10-15.

Yezu uvua mumanye ne: bua kumvua bulelela bua Nzambi budi mu Bible tudi dijinga ne malu abidi aa: diambuluisha dia kudi Nzambi ne mushindu udi muoyo wetu. Yezu udi wamba ne: “Tatu wanyi, Mukalenge wa diulu ne buloba, ndi nkutumbisha kumpala kua bantu, bualu udi musokoke bena meji ne bamanyi ba mukanda malu aa, kadi udi mualeje bana batekete.” Udi mumone bua tshinyi diumvua dia bulelela bua mu Bible ndiakalenga dinene anyi? Yehowa udi ne bukenji bua kusungula bantu badiye mua kuleja bulelela buende bualu udi “Mukalenge wa diulu ne buloba.” Kadi kabiena bisua kuleja ne: Nzambi udi ne kansungasunga mu bualu ebu to. Ntshinyi tshidi tshimusaka bua kuleja bamue bulelela bua mu Bible ne kubenga kubuleja bakuabu?

Yehowa mmusue bantu badi ne budipuekeshi kadi ki mbena lutambishi to. (Yakobo 4:6) Udi usokoka “bena meji ne bamanyi ba mukanda” bulelela, mbuena kuamba ne: bena meji ba pa buloba apa ne bamanyi ba mukanda badi badieyemena ne baditumbisha, kadi kabayi basue bua abambuluishe. (1 Kolinto 1:19-21) Kadi udi uleja bulelela buende kudi “bana batekete,” mbuena kuamba ne: bantu badi balua kudiye ne muoyo mujima baleja budipuekeshi bu bana. (Matayi 18:1-4; 1 Kolinto 1:26-28) Yezu Muana wa Nzambi, uvua pende mumanye bantu ba mushindu eu. Bena lutambishi ba bungi ne bamfumu ba bitendelelu bavua balonge bikole, kabavua bumvue bimpe mukenji wa Yezu to, kadi anu balobi bena budipuekeshi ke bavua bawumvue. (Matayi 4:18-22; 23:1-5; Bienzedi 4:13) Anu mu tshiotshi tshikondo atshi, bamue babanji ne bamanyi ba mukanda bavua baleje budipuekeshi bulelela bakalua bayidi ba Yezu.​—Luka 19:1, 2, 8; Bienzedi 22:1-3.

Tuanji kualukila ku lukonko luetu lua ntuadijilu lua ne: Udi musue kumanya bulelela pa bidi bitangila Nzambi anyi? Biobi nanku, nebikukoleshe bua kumanya ne: Nzambi kena wanyisha bantu badi badimona bu bena meji ba pa buloba apa. Kadi, udi wanyisha bantu badi bena meji ba pa buloba apa bamona bu bantu tshianana. Wewe mulonge Dîyi dia Nzambi ne meji mimpe ne mutshima wa budipuekeshi, newikale munkatshi mua bantu badi Yehowa upesha diakalenga dia kumvua bulelela buende. Kumvua bulelela ebu nekukusankishe bikole mpindieu ne nekukufikishe ku “muoyo wa bushuwa,” tuamba ne: muoyo udi kawuyi ne ndekelu mu bulongolodi bupiabupia bua buakane budi Nzambi mulaye bukadi pa kulua. *​—1 Timote 6:12, 19; 2 Petelo 3:13.