Niniwe uvua tshimenga tshikulu tshia bukalenge bua bena Ashû. Tshivua tshimenga tshia bukole tshivua ne nzubu minene mimpe ne ntempelo, njila minene ne bimanu binene. Nahuma muprofete muena Ebelu wakakula bua tshimenga etshi bu ‘tshimenga tshidi tshimatshisha mashi a bantu panshi.’​—Nahuma 3:1.

Bualu ebu mbulelela, bualu bimfuanyi bidibu bazole ku nzubu wa Saneheliba mu Niniwe bidi bileja muvua bena Ashû ne tshikisu. Tshimue tshia ku bimfuanyi ebi tshivua tshileja muvuabu batula ludimi lua muena buloko uvuabu batshintshimike panshi. Bimfuanyi ebi bidi bileja ne: bavua bakokela bantu bavuabu bakuata ku bupika ku mionji misuikila ku ndobo ivua mipayika ku mishiku anyi ku diulu diabu. Bimfuanyi bikuabu bivua bileja batangidi ba bapika bela mitu ya bamfumu babu ya bungi mu nshingu bienze bu shene ya mu nshingu ivua ikemesha.

Mukebuludi wa malu a bena Ashû diende Henry Sayce udi umvuija malu a tshikisu avua bena Ashû benza pavuabu bakuata tshimenga kampanda wamba ne: “Bavua bakosa mitu ya bantu ba mu tshimenga tshivuabu bakuata bayikunguija; bavua buosha bansongalume ne bansongakaji ne muoyo anyi babatuta ne tshikisu tshionso; bavua bapopela bantu balume ku mitshi ne babumbusha makoba a pa mbidi ne muoyo, babatubula mêsu anyi babakosa bianza, makasa, matshi ne diulu.”

Nzambi uvua muambile bena Yuda ne: ‘Panuasa nzubu mupiamupia, nenuenze kabidi ka tshibumba ku mutu kua nzubu, nunku muntu kaponyi panshi, ne mashi ende kaikadi ku nzubu yenu.’ (Dutelonome 22:8) Ka tshibumba aka kavua ne mushinga wa bungi, bualu mêku a bena Yuda ba mu tshikondo tshivuabu bafunda Bible, bavua batamba kusombela pa mitu ya nzubu yabu.

Mitu ya bungi ya nzubu ya bena Isalele ivua ne ka tshibumba. Mutu wa nzubu uvua muaba muimpe uvua bantu basombela bua kuota munya, kupitshisha kapepe anyi kuenzelapu midimu ya kumbelu. Uvua muaba muimpe wa kuladila mu tshikondo tshia luya. (1 Samuele 9:26) Tshidime uvua mua kumishilapu ntete kumpala kua kuyituabu anyi kumishilapu tumuma tua mfigi anyi tua mvinyo.​—Yoshua 2:6.

Bavua kabidi batendelela Nzambi mulelela anyi mpingu pa mutu pa nzubu apa. (Nehemiya 8:16-18; Yelemiya 19:13) Mupostolo Petelo wakabanda pa mutu pa nzubu munda munya bua kusambila. (Bienzedi 10:9-16) Bobu benzapu dileji ne mitshi ya mvinyo anyi malala a mabue, pa mutu pa nzubu apa padi palua muaba muimpe wa kuikishila.

Mukanda kampanda udi wamba ne: nzubu ya bena Isalele ivua ne bibandilu bivua bifikisha pa mutu pa nzubu, bibandilu ebi bivua “pambelu pa nzubu kadi munda mua lubanza.” Nunku muntu uvua mua kumbuka pa mutu pa nzubu kayi ubuela mu nzubu to. Bualu ebu budi bupetangana ne didimuija dia Yezu didi ditangila mushindu uvua bantu mua kunyema mu tshimenga tshivuabu ne bua kubutula. Yezu udi wamba ne: “Muntu udi pa mutu pa nzubu katuluki bua kuangata bintu bidi mu nzubu muende.”​—Matayi 24:17.