Dibishibua dia Yezu ku lufu diakakankamija bayidi bende ne diakabapesha tshisumi. Mupostolo Paulo yeye nkayende wakendakana mu Asie Mukese ne mu Mediterane wenda ulongolola bisumbu, ukolesha bena Kristo bua kushalabu bashindame mu ditabuja kumpala kua buluishi bukole. Nansha muvuaku ntatu eyi, buena Kristo buakatungunuka ne kuya kumpala ne bantu ba bungi bakalua bena Kristo.

Bakela Paulo mu buloko. Kadi nansha mu buloko amu wakafunda mikanda bua kukankamija ne kubela bisumbu bia bena Kristo. Wakabadimuija bua butontolodi buvua ne bua kujuka mu bisumbu. Ku diambuluisha dia nyuma muimpe wa Nzambi, Paulo wakadianjila kumona ne: “mbua ya ditu idi ne luonji” idi yakula “malu makonyangale,” ivua ne bua kubuela munkatshi muabu “bua kukoka bayidi mu nyima muabu.”​—Bienzedi 20:29, 30.

Ku ndekelu kua bidimu lukama bia kumpala, butontolodi buakatuadija. Mu tshikondo atshi, Yezu ukavuabu babishe ku lufu wakapesha mupostolo Yone Buakabuluibua bua malu avua ne bua kuenzeka mu matuku atshilualua. Anu muvua Yone mufunde, kakuvua baluishi anyi balongeshi ba dishima bavua mua kupangisha Nzambi bua kukumbaja disua diende dia ku ntuadijilu bua buloba ne bantu. “Tshisamba tshionso, muakulu wonso ne bantu bonso” bavua ne bua kumvua lumu luimpe lua Bukalenge bua Nzambi. (Buakabuluibua 14:6) Buloba nebulue Mparadizu, ne muntu yonso udi musue kuenza disua dia Nzambi neikalamu!

Kuenaku mumone ne: etshi ‘ndumu luimpe’ anyi? Biobi nanku, longa malu a bungi adi atangila mukenji wa Nzambi bua bantu anu mudiwu mu Bible ne mudiwu mua kukuambuluisha lelu ne mu matuku atshilualua.

Udi mua kudibadila nkayebe Bible ku Enternete mu www.pr2711.com. Mu site eu, udi kabidi mua kubala broshire eyi: La Bible​—Quel est son message?; Lumu luimpe lua kudi Nzambi; ne mukanda wa Bible utu ulongesha tshinyi menemene? ne mikanda mikuabu idi ileja mutudi mua kueyemena Bible ne kutumikila mibelu idimu mu dîku dietu ne mu nsombelu wetu. Anyi udi mua kulomba Ntemu wa Yehowa bua akuambuluishe bua kumanya malu makuabu.

​—Malu mangatshila mu Bienzedi, Efeso, Filipoyi, Kolosayi, Filemona, 1 Yone, Buakabuluibua.