Tushete tuvuabu belela milambu mu ntempelo tuvua mu Lubanza lua bantu bakaji. Mukanda kampanda udi wamba ne: “Mu ntempelo muvua makunji ne bavua bateke tushete anyi ‘mpungi’ dikumi ne isatu ku makunji au muvuabu bela milambu.” Le temple, son ministère et ses services (angl.).

Bavua babikila tushete etu ne: mpungi bualu tuvua ne kumutu kukese kuinshi kunene. Kashete kuonso kavua ne waku mulambu, ne makuta avuabu bangatamu avua bua midimu misunguluke. Yezu uvua mu Lubanza lua bakaji pavuaye mumone muvua bantu ba bungi ne mukaji mukamba mupele bele milambu.​—Luka 21:1, 2.

Makuta avuabu bela mu tushete tubidi avua bua kufuta bitadi bia ntempelo bua tshidimu atshi ne tshidimu tshishale. Mufidi wa milambu yeye mufile mulambu mupite pa udibu balombe, bia pa mutu badi babiela mu tushete tudi tushale. Makuta a mu kashete kisatu too ne ka muanda mutekete avua bua nyunyi ya nkutshi, nkudimba, mitshi, musenga wa manananshi ne makopo a or. Kashete ka muanda mukulu kavua bua makuta a mulambu wa kubuikidila nawu bantu mibi. Mu kashete ka 9 too ne ka 12 bavua belamu makuta a milambu ya kufuta nayi tshibawu, ya nyunyi, ya Banazi ne ya bena nsudi. Kashete ka 13 kavua bua milambu ya budisuile.

Luka uvua mufunde Evanjeliyo udi ne dîna diande ne mukanda wa Bienzedi bia bapostolo. Luka udi wamba ne: uvua “mukebulule malu onso anu muvuawu kubangila ku ntuadijilu kuawu,” kadi bamue bamanyi badi babenga amue malu adi Luka muambe. (Luka 1:3) Ntshinyi tshidi tshileja ne: mmufunde malu malelela?

Luka udi wakula malu a kale adi bantu mua kudijadikila. Tshilejilu, udi wenza mudimu ne mianzu idi kayiyi mimanyike lelu bua kuakula bua bamfumu ba mbulamatadi ba mu Lomo. (Bienzedi 16:20, Kingdom Interlinear; 17:6; 19:31) Luka udi ubikila Helode Antipa ne: mulombodi wa distrike, ne Sêgiyo Paulo ne: mulombodi.​—Bienzedi 13:1, 7.

Mianzu idi Luka muenze nayi mudimu mmilelela ne idi ne mushinga wa bungi, kadi mianzu eyi kayitshiena mimanyike bualu pavuabu bashintulula teritware ya mu Lomo bavua bashintuluka kabidi mianzu ya balombodi. Bruce Metzger mumanyi wa malu a mu Bible udi wamba ne: Kadi “misangu yonso malu adibu bakuile mu Bienzedi aa adi amueneka malelela bilondeshile muaba uvuawu menzekele ne tshikondo tshidiwu menzeke.” William Ramsay mumanyi mukuabu udi ubikila Luka ne: “mumanyi wa malu a kale udi mulonde malu mu mushindu muimpe mutambe.”