“NZAMBI udi Nyuma,” kena umueneka ku mêsu kua bantu to. (Yone 4:24) Kadi Bible udi wamba ne: bamue bantu bakadi bamone Nzambi mu mushindu kampanda. (Ebelu 11:27) Mmunyi mudibi mua kuenzeka? Udiku bulelela mua kumona “Nzambi udi kayi umueneka” anyi?​—Kolosayi 1:15.

Tudifuanyikijabi ne muntu udibu balele muikale mpofu. Dibenga kumona diende didiku mua kumupangisha bua kumanya malu adi bantu badi bamunyunguluke benza anyi? Tòo. Mpofu utu umvua malu mu mishindu ya bungi idi imuambuluisha bua kumanya bantu, bintu ne malu adi enzeka muaba udiye. Mpofu mukuabu wakamba ne: “Nansha muntu kayi umona ne mêsu, kadi udi anu mua kumanya malu adi enzeka muaba udiye.”

Bia muomumue, nansha muudi kuyi mua kuenza mudimu ne mêsu ebe a ku mubidi bua kumona Nzambi, udi mua kuenza mudimu ne “mêsu a muoyo” webe bua kumumona. (Efeso 1:18) Tukonkonone mishindu isatu idi mua kukuambuluisha.

Mpofu utu misangu ya bungi ulenga ne umvua bikole, mushindu eu utu umuambuluisha bua kumanya malu adiye kayi mua kumona. Bia muomumue, udi mua kuenza mudimu ne bimue bitupa bia mubidi webe bua kutangila bintu bidi bikunyunguluke bua kumona Nzambi udi kayi umueneka uvua mubifuke. Bible udi wamba ne: “Bualu ngikadilu yende idi kayiyi imueneka, mmumue ne: bukole buende bua tshiendelele ne Bunzambi buende, idi imueneka bimpe katshia buloba buafukibua, bualu badi bayijinguluila ku bintu bidi bifukibue.”​—Lomo 1:20.

Tshilejilu, ela meji bua muaba utudi basombele. Ki mbafuke buloba bua tuetu kusombapu patupu, kadi mbua tuikalapu ne disanka. Tutu tumvua bimpe bitambe padi kapepe kimpe katututa, kamunya katubuela, tumvua butamu bua bimuma anyi tuanyisha misambu mimpe ya nyunyi. Malu aa onso kaenaku aleja meji a bungi, bulenga ne muoyo wa kupa bidi nabi Mufuki wetu anyi?

Mmalu kayi audi mua kulonga bua Nzambi ku diambuluisha dia bintu biudi umona mu diulu ne pa buloba? Kakuyi mpata, diulu didi dileja bukole bua Nzambi. Bamanyi ba malu a sianse ba matuku aa kabena baleja anu ne: diulu didi dialabale bikole, kadi badi baleja kabidi ne: dialabala edi didi dienzeka mu lubilu lukole menemene. Paudi utangila muulu butuku, diebeja ne: bukole budi buenza bua diulu dialabale ne lubilu lukole nunku mbufumine kuepi? Bible udi utuambila ne: Mufuki udi ne ‘bukole bua bungi.’ (Yeshaya 40:26) Bifukibua bia Nzambi bidi bitujadikila ne: udi “Wa Bukole Buonso” ne nyeye “udi munene mu bukole.”​—Yobo 37:23.

Mamu mukuabu uvua ne bana babidi bavua ne mêsu bitayitayi udi wamba ne: “Diakula nabu ke mushindu muimpe udi ubambuluisha bua kulonga. Paudi upatuka pambelu utungunuke ne kubambila diakamue malu audi umona ne umvua. Wewe ke mêsu abu.” Bia muomumue, nansha mudiku ‘kakuyi muntu ukadi mumone Nzambi musangu nansha umue,’ Yezu Muana wa Nzambi “udi mu tshiadi tshia Tatu ke udi muakule bua bualu buende.” (Yone 1:18) Bu muvua Yezu tshifukibua tshia kumpala tshia Nzambi, ne Muana umuepele mulela wa Nzambi, wakalua “mêsu” etu mu diulu. Kudiye ke kutudi mua kumanyina bimpe malu adi atangila Nzambi udi kayi umueneka.

Mona malu makese avua Yezu uvua muenze bidimu bipite bungi ne Tatuende mumvuije bua Nzambi:

• Nzambi udi wenza mudimu kayi ulekela. “Tatu wanyi udi wenza mudimu too ne mpindieu.”​—Yone 5:17.

• Nzambi mmumanye majinga etu. “Tatu wenu, mmumanye binudi nabi dijinga kumpala mene kua nuenu kumulombabi.”​—Matayi 6:8.

•  Nzambi udi utupesha biakudia. “Tatu wenu wa mu diulu, utu ubandishila bantu babi ne bantu bimpe dîba diende ne ulokeshila bantu bakane ne badi kabayi bakane mvula.”​—Matayi 5:45.

• Nzambi udi wangata yonso wa kutudi ne mushinga. “Kabatu bapana mishamisha ibidi ku dikuta dimue dia tshinjanja dia mushinga mukese anyi? Kadi nansha umue wa kudiyi kawena mua kupona panshi Tatu wenu kayi mumanye. Nansha nsuki mene ya ku mitu yenu mmibala yonso. Nunku kanutshinyi; nuenu nudi ne mushinga mupite wa mishamisha ya bungi.”​—Matayi 10:29-31.

Bampofu batu misangu ya bungi bumvua malu mu mishindu mishilangane ne ya bantu badi bamona bimpe. Mpofu kena wangata muaba udi dileji bu muaba mufike udi kawuyi butoke to, kadi bu muaba mutalale udi kawuyi nsese ya dîba. Anu bu mudi mpofu kayi mua kumona dileji anyi bukenke bua dîba, katuena mua kumanya Yehowa mu tuetu nkayetu to. Nunku, Yehowa wakatupesha muntu udi ne ngikadilu ne bumuntu anu bu biende menemene.

Muntu au nʼYezu. (Filipoyi 2:7) Yezu kavua muakule anu bua Tatuende patupu to, kadi wakatuleja kabidi mutu Nzambi. Filipo muyidi wa Yezu wakamuebeja ne: “Mukalenge, utuleje Tatu.” Yezu wakamuandamuna ne: “Udi mummone mmumone kabidi Tatu.” (Yone 14:8, 9) Mmalu kayi a Tatu audi mua “kumona” mu bienzedi bia Yezu?

Yezu uvua muntu wa musangelu, muena budipuekeshi ne wa kukuatshila malu. (Matayi 11:28-30) Ngikadilu yende mimpe ivua ikoka bantu kudiye. Uvua ukenga ne bavua bakenga ne usanka ne bavua basanka. (Luka 10:17, 21; Yone 11:32-35) Paudi ubala anyi uteleja miyuki ya Yezu idi mu Bible, difila wewe yonso ku biudi ubala ne enza bua malu audi ubala ikale malelela mu lungenyi luebe. Wewe muelangane meji bua mushindu uvua Yezu wenzela bantu malu, neukumbane bua kumona bimpe ngikadilu mimpe mitambe ya Nzambi ne neusemene pabuipi nende.

Mufundi kampanda wakamba pa bidi bitangila mushindu udi mpofu umanya malu adi enzeka pa buloba ne: “Mpofu udi umvua malu ndambu ndambu mu mishindu mishilangane (mumue ne: ulenga, ununkila, uteleja ne mu mishindu mikuabu), ne mu mushindu kampanda udi usangisha malu onso aa bua kupeta lungenyi.” Bia muomumue, paudi umona bintu bivua Nzambi mufuke, ubala malu avua Yezu muambe bua Tatuende ne ukonkonona muvua Yezu muleje ngikadilu ya Nzambi, paudi usangisha malu onso aa pamue, neujingulule bimpe mudi Yehowa. Neumumone bu muntu wetu mulelela eu.

Ke tshivua tshifikile Yobo uvua ne muoyo mu bikondo bia kale. Kumpala uvua wakula “malu avuaye kayi mujingulule bimpe.” (Yobo 42:3) Kadi panyima pa yeye mumane kutangila bimpe bifukibua bia Nzambi bidi bikemesha, biakamusaka bua kuamba ne: ‘Ngakumvua lumu luebe diambedi anu ku matshi, kadi mpindieu mêsu anyi akukumona.’​—Yobo 42:5.

Nansha wewe pebe udi mua kuamba nunku. ‘Biwakeba Yehowa, neumupete.’ (1 Kulondolola 28:9) Bantemu ba Yehowa nebikale ne disanka dia kukuambuluisha bua kukeba Nzambi udi kayi umueneka ne kumupeta.