MMUNYI mudibu bakudimune Musambu wa 83:18 mu Bible webe? Mu Mukanda wa Nzambi mbakudimune mvese eu ne: ‘Bua bamanye biabu ne: wewe nkayebe, ngudi muidike dîna dia Yehowa, udi Mutambe Bunene wa pa mutu pa buloba bujima.’ Ke mudibu bamukudimune kabidi mu imue Bible. Kadi mu Bible ya bungi mbumushe Yehowa, bapingaje “Maweja,” “Mukalenge” anyi “Mfumu.” Ntshinyi tshidi ne bua kuikala mu mvese eu? Dîna dia tshianana anyi dîna dia Yehowa?

Mvese eu udi wakula bua dîna. Mu tshiena-Ebelu tshia kale muvuabu bafunde tshitupa tshinene tshia Bible, kudi anu dîna dimuepele didi mu mvese eu. Batu badifunda ne: יהוה (YHWH) mu maleta a tshiena-Ebelu. Mu Tshiluba, batu bakudimuna dîna edi ne: “Yehowa.” Dîna edi ditu anu mu mvese umu’eu anyi? Tòo. Ditu mu Mifundu ya tshiena-Ebelu ya kale misangu yamba kutua ku 7 000.

Dîna dia Nzambi didi ne mushinga kayi? Tangila disambila dia tshilejilu divua Yezu mushiye. Didi dituadija nenku: ‘Tatu wetu udi mu diulu, banemeke dîna diebe.’ (Matayo 6:9) Matuku makese pashishe, Yezu wakasambila Nzambi ne: ‘Tatu, utumbishe dîna diebe.’ Nzambi wakandamuna kumbukila mu diulu ne: ‘Ngakaditumbisha, nenditumbishe kabidi.’ (Yone 12:28) Bidi bimueneka ne: dîna dia Nzambi didi ne mushinga wa bungi. Kadi bua tshinyi bamue bakudimunyi ba Bible bakumusha dîna edi mu Bible ne kupingajabu bia tshianana?

Bidi bimueneka ne: kudi malu abidi manene adi menzeje nanku. Tshia kumpala, bantu ba bungi batu bamba ne: kabiena bikengela kukuata mudimu ne dîna dia Nzambi bualu katuena bamanye mushindu wa kudishindumuna to. Tumanye ne: bavua bafunda tshiena-Ebelu tshia kale kakuyi maleta majikuke. Ke bua tshinyi kakuena muntu lelu udi mua kuamba mushindu uvua bantu ba kale bashindumuna YHWH. Kadi dipanga kudishindumuna didi mua kutukandika bua kukuata mudimu ne dîna dia Nzambi anyi?  Tshilejilu, kakuena muntu udi mumanye muvuabu bashindumuna dîna dia Yezu mu bikondo bia kale to: bavua mua kuikala badishindumuna Yeshua anyi imue misangu Yehoshua. Pabi, bantu ba pa buloba bujima batu babikila Yezu mu mishindu mishilangane, bamubikila mu tshia kuabu. Kabena belakana mua kumutela anu bualu ki mbamanye mushindu uvuabu bashindumuna dîna diende kale to. Bia muomumue, wewe muye muaba mukuabu, badi mua kushindumuna dîna diebe mushindu mukuabu. Nunku, dibenga kumanya muvuabu bashindumuna dîna dia Nzambi ku kale kadiena mua kutupangisha bua kuenza nadi mudimu to.

Bualu buibidi butu bufikisha misangu ya bungi ku diumusha dîna dia Nzambi mu Bible budi butangila tshilele tshia bena Yuda tshia kale. Ba bungi ba kudibu batu bela meji ne: ki mbimpe kutela dîna dia Nzambi to. Tshidibi, tshilele etshi ntshishindamene pa ngumvuilu mubi wa mukenji wa mu Bible udi wamba ne: ‘Kutedi dîna dia Yehowa, Nzambi webe tshitelatela, bua Yehowa kêna ubingisha muntu udi utela dîna diende tshitelatela.’​—Ekesode 20:7.

Mukenji eu udi ukandika ditela dibi dia dîna dia Nzambi. Kadi udiku ukandika ditela dîna dia Nzambi ne kanemu konso anyi? Tòo. Bafundi ba Bible wa mu tshiena-Ebelu (“Dipungila Dikulukulu”) bavua bantu ba kueyemena ne bavua balonda mikenji ivua Nzambi mupeshe bena Isalele wa kale. Bakafunda dîna dia Nzambi misangu ya bungi. Tshilejilu, divua mu misambu ya bungi ivua misumba ya batendeledi imba ne dîyi dikole. Yehowa Nzambi wakambila too ne batendeledi bende bua kumubikila mu dîna diende, ne bena lulamatu bakatumikila dîyi edi. (Yoele 2:32; Bienzedi 2:21) Ke bualu kayi, bena Kristo lelu kabena belakana bua kutela dîna dia Nzambi ne kanemu, anu muvua Yezu muditele.​—Yone 17:26.

Bakudimunyi ba Bible batu benza tshilema tshinene padibu bafunda mêna a tshianana pa muaba wa dîna dia Nzambi. Badi benza bua Nzambi amueneke bu udi kule menemene ne kayi bu muntu to, pabi eku Bible ulomba bantu bua kudia ‘bulunda bujalame ne Yehowa.’ (Musambu 25:14) Anji ela meji kudi mulunda webe wa pa muoyo. Mmunyi munudi mua kuikala balunda banene wewe kuyi mumanye dîna diende? Bia muomumue, padibu basokoka bantu dîna dia Nzambi Yehowa, mmunyi mudibu mua kudia nende bulunda? Pashishe, padi bantu kabayi batela dîna dia Nzambi, kabena bamanya kabidi diumvuija diadi dia mushinga to. Kadi dîna dia Nzambi didi diumvuija tshinyi?

 Nzambi nkayende wakumvuija dîna diende kudi musadidi wende wa lulamatu Mose. Pavua Mose muebeje Nzambi dîna diende, wakamuandamuna ne: ‘Nengikale tshingikala.’ (Ekesode 3:14, NW) Bible wa Rotherham udi ukudimuna mêyi aa ne: “Nengikale tshingikala musue kuikala.” Nunku Yehowa udi mua kulua tshionso tshidiye musue kuikala bua kukumbaja malu ende.

Bu wewe ne mushindu wa kulua tshionso tshiudi musue kuikala, uvua mua kuenzela balunda bebe tshinyi? Bikala umue wa kudibu usama bikole, udi mua kulua munganga munene ne kumuondopa. Mukuabu yeye kayi ne mfranga, udi mua kulua mubanji munene bua kumuambuluisha. Kadi mu kuamba bulelela, udi ne mikalu mu malu audi mua kuenza. Tuetu bonso tudi ne mikalu. Paudi wenda ulonga Bible, neukeme bua kumona mudi Yehowa ulua tshionso tshidi tshikengedibua bua kukumbaja malu adiye mulaye. Bitu bimusankisha kabidi bua kuambuluisha aba badi bamunange ne bukole buende. (2 Kulondolola 16:9) Bantu badi kabayi bamanye dîna dia Yehowa ki mbamanye ngikadilu yende milenga eyi nansha.

Bidi bimueneka patoke ne: dîna dia Nzambi didi ne bua kuikala mu Bible. Kumanya diumvuija dia dîna edi ne kuditela patudi tumutendelela nekutuambuluishe bikole bua kushemeja malanda ne Tatu wetu wa mu diulu Yehowa. *