Dimue dia ku masambila a kumpala atu ba bungi balonga ndisambila dia Tatu wetu, divua Yezu mulongeshe bayidi bende. Disambila adi didi mu tshidibu batamba kubikila ne: Dipungila Dipiadipia. Disambila adi didi dibanga ne: “Tatu wetu udi mu diulu, dîna diebe dijidibue [anyi badinemeke].” (Matayi 6:9) Kadi dîna dia Nzambi didibu bakudimune mu Tshiluba ne: “Yehowa” anyi misangu mikuabu ne: “Yahweh,” kadiena ditamba kusanganyibua mu nkudimuinu ya Tshiluba ya Dipungila Dipiadipia to. Kadi mu nkudimuinu eyi, mudi mêna a nzambi ya dishima, bu mudi Zeuse, Hême, ne Atemise. Nunku kabenaku mua kutela dîna dia Nzambi mulelela Muena Bible anyi?​—Bienzedi 14:12; 19:35; 2 Timote 3:16.

 Bakudimunyi ba Bible wa mu Anglais bu mudi Lancelot Shadwell ne Frederick Parker bakela meji ne: mbimpe bapingaje dîna dia Nzambi mu Dipungila Dipiadipia. Bua tshinyi tudi tuamba ne: mbimpe “badipingaje”? Bualu bakaleja ne: dîna dia Nzambi divuamu ku ntuadijilu, kadi bakadiumbusha pashishe. Bua tshinyi bakafika ku diamba nanku?

 Shadwell ne Frederick bavua bamanye ne: ku ntuadijilu mikanda mifunda ku tshianza ya tshidibu batamba kubikila ne: Dipungila Dikulukulu, ivuabu bafunde nangananga mu tshiena Ebelu ivua ne dîna dia Nzambi misangu binunu bia bungi. Nunku bakadienzeja bua kumanya bua tshinyi mu mikanda mifunda ku tshianza ya Dipungila Dipiadipia ivuabu nayi bavua bumbushe mbikidilu yonso wa dîna dia Nzambi. a Shadwell wakamona kabidi ne: pavua mikanda mifunda ku tshianza ya Dipungila Dipiadipia yambulula biambilu bivua bimanyike bikole bia mu Dipungila Dikulukulu, bu mudi “muanjelu wa Yehowa,” batentudi ba Dipungila Dipiadipia mu tshiena Greke bavua bushuwa bapingaje miaku bu mudi Kyrios, udi umvuija “Mukalenge” pa muaba wa dîna dia Nzambi.​—2 Bakalenge 1:3, 15; Bienzedi 12:23.

 Nansha kumpala kua Shadwell ne Parker kupatulabu nkudimuinu yabu mu Anglais, bakudimunyi bakuabu bakavua baluje dîna dia Nzambi mu nkudimuinu yabu ya Dipungila Dipiadipia, kadi anu miaba mikese tshianana. b Pavua Parker mupatule nkudimuinu wa muaku ku muaku wa Dipungila Dipiadipia (A Literal Translation of the New Testament) kumpala kua 1863, bidi bimueneka ne: kakuvua mukudimunyi mukuabu wa Anglais uvua mualuje dîna dia Nzambi miaba ya bungi mu Dipungila Dipiadipia dikavuaku to. Lancelot Shadwell ne Frederick Parker bavua banganyi?

 Lancelot Shadwell (1808-1861) uvua ndumbulula. Uvua muana wa tatu Lancelot Shadwell mfumu tshindondi wa mu Angleterre. Muana uvua mu tshitendelelu tshia mu Angleterre. Nansha muvuaye witaba dilongesha dia Busatu bunsantu, uvua unemeka dîna dia Nzambi; udibikila ne: “YEHOWA ndîna dia butumbi.” Mu nkudimuinu wende wa Evanjeliyo wa Matayi ne wa Mâko (The Gospels of Matthew, and of Mark), wakatela dîna dia “Yehowa” misangu 28 mu mvese, ne misangu 465 mu mamanyisha.

 Shadwell uvua mua kuikala mulonge dîna dia Nzambi pavuaye udimona mu Dipungila Dikulukulu mu tshiena Ebelu tshia ntuadijilu. Wakamba ne: bantu bavua bapingaje muaku Kyrios pa muaba wa dîna dia Nzambi mu nkudimuinu wa tshiena Greke wa Dipungila Dikulukulu abu “kabavua bakudimunyi bena bululame to.”

 Mu Matayi 1:20 ke muaba wa kumpala uvua Shadwell mutele dîna dia “Yehowa” mu nkudimuinu wende. Dimanyisha divuaye muele mu mvese au, didi dileja ne: “Muaku [Kyrios] udi mu mvese eu, ne mu mvese mikuabu ya bungi idi mu Dipungila Dipiadipia udi umvuija YEHOWA, dîna disunguluke dia Nzambi: bidi ne mushinga wa bungi bua kualuja muaku eu mu nkudimuinu wa mu Anglais.” Wakamba kabidi ne: “Tudi ne bua kuenza nanku bua kunemeka Nzambi. Mmudimanyishe nkayende mu dîna dia YEHOWA: tudi tuenza bimpe bikole bua kutela dîna edi patudi tuakula bua bualu buende.” Pashishe wakamba ne: “Mu nkudimuinu wetu wa Bible muanyishibue, anyi Bible wa roi Jacques dîna dia YEHOWA didimu miaba mikese . . . Pamutu pa dîna dia Nzambi disunguluke, tudi tubalamu ne: Mukalenge.” Wakaleja ne: “Mukalenge . . . ki mmuanzu mukumbane” wa tuetu kutela bua kuakula bua dîna dia Nzambi to, kusakidilaye ne: kudi mene bantu badi bamubikila yeye ne: “Mukalenge” mu ditunga diabu, anyi kuende.

 Shadwell wakapatula nkudimuinu wende wa Matayi mu 1859, ne nkudimuinu wa Matayi ne Mâko misambakaja mu 1861. Kadi mudimu wende wakashila apu. Wakafua ne bidimu 52 mu dia 11/1/1861. Nansha nanku, bionso bivuaye muenze kabiakaya mu mâyi to.

 Nkudimuinu wa Shadwell wa Matayi wakakoka ntema ya ngenda mushinga mukuabu wa mu Londres uvua ne makuta a bungi, dîna diende Frederick Parker. (1804-1888) Parker wakatuadija kukudimuna Dipungila Dipiadipia pavuaye ne bidimu bu 20. Parker uvua mushilangane ne Shadwell bualu yeye kakitaba dilongesha dia Busatu bunsantu to. Wakafunda ne: “Ekeleziya mujima wa muana [wa Nzambi] munanga . . . itabaku bulelela ne muoyo mujima . . . ne atendelelaku Yehowa Wa Bukole Buonso.” Parker pende wakamona ne: mikanda mifunda ku tshianza ya Dipungila Dipiadipia ivua itela Kyrios bua Mukalenge Nzambi ne Mukalenge Yezu yakenza bua bikale bikole bua kumona dishilangana didi pankatshi pa bantu babidi aba. Nunku wakasanka bikole pavuaye mumone ne: Shadwell uvua mukudimune Kyrios miaba mikuabu ne: “Yehowa.”

 Mmunyi muvua Parker mufike ku diumvua malu aa? Wakalonga tshiena Greke, kufundaye mikanda ya bungi ne trakte mu tshiena Greke. Uvua kabidi muena mu tshilongelu tshia Anglo-Biblical Institute tshivua tshiambuluisha bua kulonga mifundu ya mu Bible mifunda ku bianza bua kumona mua kupatula Bible mimpe menemene mu Anglais. Mu 1842, Parker wakatuadija kupatula nkudimuinu wende wa kumpala wa Dipungila Dipiadipia mu bitupa bia bungi ne misangu ya bungi. c

 Munkatshi mua bidimu ndambu, Parker uvua ufunda malu avua atangila nkonko bu mudi: “Ndîba kayi didi muaku Kyrios uleja Mukalenge Yezu, ne ndîba kayi didiwu uleja Mukalenge Nzambi?” “Bua tshinyi bantu batu batamba kutela Kyrios bu dîna, kadi ki mbu muanzu to?”

 Pavua Parker mumone nkudimuinu wa Shadwell wa Matayi wa mu 1859 ne miaba ivuaye mumvuije Kyrios, biakamujadikila ne: mu imue miaba ‘badi ne bua kukudimuna Kyrios ne: Yehowa.’ Ke yeye kuakajilula nkudimuinu wende mujima wa Dipungila Dipiadipia bua kubueja dîna dia “Yehowa” miaba yonso ivuaye umona ne: bivua bikengela kudibueja bilondeshile mifundu ya mu tshiena Greke. Ke bualu kayi nkudimuinu wende wa mu 1863 wa muaku ku muaku wa Dipungila Dipiadipia (A Literal Translation of the New Testament) uvua ne dîna dia Nzambi misangu 187 mu mvese. Bidi bimueneka ne: au ke nkudimuinu wa kumpala wa mu Anglais uvuabu bapatule ne dîna dia Nzambi mu Mifundu yonso ya mu tshiena Greke ya buena Kristo. d

 Mu 1864, Parker wakapatula pende mukanda mukuabu bua kufuanyikija Nkudimuinu wende wa Dipungila Dipiadipia ne Nkudimuinu muanyishibue. (A Collation of an English Version of the New Testament . . . With the Authorized English Version) Tshivuaye musambakajile bitupa bibidi bia Dipungila Dipiadipia mu mukanda umue tshivua bua kuleja miaba ne mushindu uvua nkudimuinu wende mushilangane ne nkudimuinu muanyishibue. e

 Bua kuleja mushinga udi nawu kupingaja dîna dia Nzambi, Parker wakaleja mvese ya bungi mu Nkudimuinu uvua muanyishibue (Authorized Version,) bu mudi Lomo 10:13 udi wamba ne: ‘Bualu bua muntu yonso watendekena dîna dia Mukalenge neapandishibue.’ Parker wakebeja ne: “Kuvuaku muntu uvua mua kujingulula ne: mu nkudimuinu muanyishibue, mvese eyi ivua yakula bua Yehowa ki mbua Muanende Yezu Kristo Mukalenge wetu, . . . anyi”?

 Parker wakatula makuta adibu babikila ne: livre binunu ne binunu bua kupatula trakte, mikanda, ne mifundu yende mikuabu ne kubienzela madisuisha. Tshikondo atshi, avua makuta a bungi be! Anu mu tshidimu tshimue, wakatula makuta au 800, lelu eu mmapite pa makuta a livre a bena Grande-Bretagne 100 000 (anyi ndola 132 000). Wakatumina kabidi bamfumu banene ba bitendelelu ne bantu bavuaye mumanye mikanda yende ya bungi tshianana bua bayikonkonone.

 Nkudimuinu ya Parker ya Dipungila Dipiadipia ne mikanda ivuaye mufunde, bavua bapatule anu mikese pa mabeji, ne bamanyi bakuabu ba malu a mu Bible bakayipepeja. Pavuabu benza nanku, bavua baleja ne: kabavua bangata mushindu uvua Parker, Shadwell, ne bantu bakuabu badienzeja ne muoyo mujima bua kupingaja dîna disunguluke dia Nzambi mu Dipungila Dipiadipia mu Anglais ne mushinga to.

 Tangila malu makuabu mu filme wa minite dikumi eu wa Dibandila nzubu wa bintu bia kale ku Warwick wa “Bible ne Dîna dia Nzambi.”