Danielle ma en achiel kuom Joneno mag Jehova e piny South Africa nokwanyo bag ma wi kastama moro nowilgo e otel moro mimadhoe kahawa. E i bagno, ne nitie wallet man gi pesa kod credit cards. Nikech Danielle ne dwaro dwoko gigi ne wuon-go, notemo manyo adres kata namba simo mar ng’atno e i kadgo to ne ok oyudo. Noyudo mana nying ng’at moro nono e kadgo. Notemo manyo ng’at ma noyudo nyingeno kotiyo gi akauntne mar bengi ma oae nono. Kata kamano, ne ok owe wachno gi kanyo. Noneno ni koro ogoch ne daktari ma nambane ne ni e risit ma noyudo e bagno. Nyako ma ne omako simbe e reception noyie tude gi wuon bagno.

 Ng’atno nobwok ka noyudo simo moa e ofis daktari kinyise ni Danielle noyudo bagne kendo ne odwaro dwokonego. Ka nobiro kawo bagneno, noyudo Danielle gi wuon-gi mi omosogi. Danielle gi wuon-gi notiyo gi thuolono e lerone ng’atno gimomiyo ne gitimo matek mondo giyude. Ne gilerone ni kaka Joneno mag Jehova, gitemo mondo gidag ka luwore gi puonj mag Muma. Mano e momiyo ne gidwaro bedo joratiro.​—Jo-Hibrania 13:18.

 Bang’ seche moko e odiechieng’no, ng’atno noorone Danielle gi wuon-gi ote e simo ka ogoyonegi erokamano kuom dwokone bag kod wallet. Nondikonegi kama: “Agoyonu erokamano kuom kinda ma ne utimo mondo umanya. Ne amor ahinya romo kodu kaachiel gi joodu kendo wiya ok bi wil gi kaka ne unyisa ng’wono kod hera. Daher golo chiwo mondo anyisgo erokamano moa e chunya. Ang’eyo ni un bende uchiworu e yo moro mondo uti ne Nyasachu. Timbeu nyiso ni un joma beyo mana kaka Danielle notimo kuom dwokona bagna. Amedo goyonu erokamano. Nyasaye mondo oguedh kinda ma utimo e tiyone.”

 Dweche moko bang’e, wuon Danielle noromo gi ng’atno kendo ng’atno nolerone gima notimore ka en be nokwanyo kibeti moro matin molal. Nowachone ni seche ma nong’iepo e duka moro, noneno kibeti kolwar piny. Ka ne oyudo miyo ma ne wuon kibetino kendo dwokonego, nolero ne miyono gimomiyo notimo kamano. Nowacho ne miyono ni en bende osetimnega kamano. Ng’atno wacho kama: “Bedo jaratiro kata mana matin kendo bedo ng’ama ng’won nyalo miyo ngima obed mayot ne ji duto ma idakgo e gweng’u.”