Ne onyuola Ciudad Obregón e piny Mexico, kendo an nyathi mar abich kuom nyithindo ochiko. Ne wadak oko mar taondno kama wuonwa ne nigi puodho moro matin. Ne en kama ber dakie ahinya, kendo ne wadak gi mor kod kue. Gima lit en ni ka ne an jahigni abich, kodh yamo moro noketho puothwa mochunowa dar mondo wadhi e taon machielo.

 Wuonwa nochako yudo pesa mabup. To gie kindeno bende e ma nochako mer asasa. Mano nokelo tungni e kindgi gi minwa to kod wan bende. Ne wachako madho ndawa ma ne wakwaloga kuom wuonwa. Ne ahango madho kong’o ka ne ajahigni auchiel kende. Mapiyo bang’ mano, jonyuolna nopogo dak kendo timbena nomedo bedo marach.

 Minwa nodhi tedo ne dichwo machielo, kendo ne odhi kodwa. Ng’atno ne ok miyega pesa, to pesa ma noyudo e tich be ne ok nyalo pidhowa. An kaachiel gi owetena ariyo madongo ne watimo duto ma wanyalo mondo wayud kaka wakonyore, kata kamano, pesa ma ne wayudo ne tin ma ok nyalo romo gik mochuno duto. Nachako goyo ne ji wuochegi rangi, uso makati, gasede, tamtam, kod gik mamoko. Bende, ne adhiga kama joma omewo witoe yugi ka amanyo chiemo.

 Ka najahigni apar, ng’at moro nokawa mondo ati kode kama iwitoe yugi. Omiyo, naweyo skul kendo nadar odwa. Ng’atno ne chulaga pesa matin ne siling’ mia achiel odiechieng’ kodiechieng’, kendo nomiyaga chiemo mokwanyo e yugi. Nadak e ot moro ma nabaso abasa gi gik ma ne akwanyo e yugi. Chokora wetena nohero tiyo gi weche modwanyore, kod timbe terruok. Ng’enygi ne tiyo gi yedhe ma mero ji kendo ne gimadho kong’o. Mago nobedo kinde matekie mogik e ngimana, naywakga otieno kotieno ka atetni nikech luoro. Bedo ni nadhier kendo ne somba tin ne miyo abedo gi wich-kuot ahinya. Nadak kama ne iwitoe yugino kuom higni adek, kae to bang’e nadar adhi e taon machielo e piny Mexico. Ka an kuno, nachako tiyo e puothe ka apono maua gi pamba, bende, nabetoga niang’ kendo nakunyoga rabuon.

 Higni ang’wen bang’e, ne adok Ciudad Obregón. Waywa moro ma ajuoga nomiya rum moro e ode mondo adagie. Nachako leko gik maricho richo kendo ne an gi parruok mang’eny ahinya ma agombo dera. Chieng’ moro nalemo niya: “Ruoth, ka intie adier, agombo ng’eyi mondo atini nyaka chieng’. Daher ng’eyo din milamie gadier.”

 Naheroga wach Nyasaye ahinya. Kendo kata ka ne pod atin, ne adhiga e kanise mang’eny, kata kamano, chunya nojok kodgi giduto te. Onge kata achiel kuomgi ma nokonya tieko riyo ma ne an-go mar ng’eyo Nyasaye. Moko noketo pachgi ahinya kuom pesa, to moko be joma ne dhiye nohero timbe terruok ahinya.

 Ka najahigni 19, chwor nyaminwa moro nonyisa gima Joneno mag Jehova nonyise ni Muma wacho e wi tiyo gi sanamu e lamo. Nosomona Wuok 20:4, 5. Ndikono wacho ni ok onego wati gi sanamu e lamo. Wes mar 5 wacho niya: “Kik ikulrinegi kata kik wuondi milamgi, nimar an Jehova Nyasachu, an e Nyasaye kende monego ulam.” Kae to nopenja ni, “Ere kaka Nyasaye nyalo kwerowa ni kik wati gi sanamu, ka en to otiyo kod sanamu e timo honni?” Wachno nokawa gi wuoro. Bang’ mano, ne wapuonjore gik mang’eny e Muma. Wechego ne mora ahinya ma kata thuolo ma ne an-go ne ok roma.

 Bang’e, notera e chokruok mar Joneno mag Jehova. Gik ma nawinjo kod gik ma ne aneno nomora ahinya. Nyaka nyithindo matindo ne chiwo paro, kendo moko be ne timo migepe e jukwaa! Nawacho e chunya ni, ‘To jogi ipuonjo mamit ma nadeni!’ Kata obedo ni yie wiya ne bocho kendo najwang’ora, Jonenogo norwaka gi mor. Bang’ chokruogno, joot moro nogwela mondo achiem kodgi!

 Puonjruok Muma gi Joneno nomiyo afwenyo ni Jehova Nyasaye en Wuoro ma jahera kendo ma dewo ji bed ni gimewo kata gidhier, gi a e oganda mane, gisomo kata ok gisomo. Kuom adier, ok obuon ng’ato ang’ata. (Tich Joote 10:34, 35) Mosmos nachako loyo riyo ma ne an-go mar ng’eyo Nyasaye. Kendo koro ne ok achayora kaka chon.

 Nachako timo lokruok madongo e ngimana. Naweyo madho ndawa, madho kong’o asasa, kendo naweyo wacho weche mochido. Chuny malit ma ne an-go nochako dok chien kendo lekga maricho bende nochako dok chien mosmos. Paro ma ne an-go ni an ng’at manono mana nikech somba ne tin kod gik maricho ma nakaloe, nochako lal mosmos.

 An gi dhako mohero Jehova kendo okonya e weche mathoth. Sani an jarit-alwora kendo alimoga kanyakla mopogore opogore ka ajiwogi kendo apuonjo Jokristo wetena ma gin kaka joodwa. Nikech teko ma Muma nigo mar loko kit ngima ji kod puonj mabeyo ma Nyasaye chiwo, tinde wiya ok kuod gi kaka achalo.