SULA MAR 16
Ang’o ma Yesu Notimo ka En e Pinyka?
Ji mang’eny paroga ni Yesu en nyathi moro matin, janabi moro mariek, kata ng’at moro ma inego. Kata kamano, be nitie gik mamoko ma wanyalo puonjore kuome ka wanono ngimane e pinyka? E sulani, wadwaro nono moko kuom gik madongo ma ne Yesu otimo kod kaka gimulo ngimani.
1. Tich maduong’ ma ne Yesu timo ne en mane?
Tich maduong’ ma Yesu ne timo ne en ‘lando wach maber mar Pinyruodh Nyasaye.’ (Som Luka 4:43.) Ne olando wach maber ni Nyasaye ne dhi chungo Pinyruoth moro, kata sirkal ma ne dhi tieko chandruoge duto ma dhano nigo. a Yesu nolando wach maberno gi kinda kuom higni adek gi nus.—Mathayo 9:35.
2. Ang’o momiyo Yesu ne timo honni?
Muma lero ‘tije madongo, gik miwuoro, kod honni ma Nyasaye notimo kokalo kuom Yesu.’ (Tich Joote 2:22) Yesu notiyo gi teko mar Nyasaye e chiko yamo, pidho ji alufe, chango joma tuo, kendo chiero jomotho. (Mathayo 8:23-27; 14:15-21; Mariko 6:56; Luka 7:11-17) Honni ma ne Yesu timo ne nyiso maler ni Nyasaye e ma ne oore. Honnigo nyiso ni Jehova nigi teko mar tieko chandruogewa duto.
3. Yo ma Yesu nodakgo puonjowa ang’o?
Yesu ne winjoga Jehova e chal moro amora. (Som Johana 8:29.) Kata obedo ni ji ne kwedo Yesu, noluwo kaka Jehova ne chike nyaka e thone. Nonyiso ni en gima nyalore mondo dhano oti ne Nyasaye kata ka weche tek. Omiyo, Yesu noweyonwa ‘ranyisi maber mondo waluw ondamo mage machiegni.’—1 Petro 2:21.
TIM NONRO
Non ane kaka Yesu nolando wach maber kendo timo honni.
4. Yesu nolando wach maber
Yesu ne wuothoga wuoth ma rabora e nderni motimo buru mondo oland wach maber ne ji mang’eny kaka nyalore. Som Luka 8:1, kae to uwuo e wi penjo ma luwogi:
-
Be Yesu ne puonjoga mana joma ochokore mondo owinje?
-
Ang’o ma Yesu ne otimo mondo oyud ji mang’eny?
Nyasaye ne okoro ni Mesia ne dhi lando wach maber. Som Isaya 61:1, 2, kae to uwuo e wi penjo ma luwogi:
-
Ere kaka Yesu nochopo weche ma ne okorgo?
-
Be iparo ni joma odak e kindewagi onego owinj wach maberno?
5. Yesu ne puonjo adiera madongo
Mopogore gi lando wach maber mar Pinyruoth, Yesu bende ne opuonjo ji adiera moko madongo ma ne nyalo konyogi. Ne ane moko kuomgi e twak ma ne ogolo e wi got. Som Mathayo 6:14, 34 kod 7:12, kae to uwuo e wi penjo ma luwogi:
-
Gin puonj mage mabeyo ma Yesu nochiwo e ndikogo?
-
Be iparo ni puonjgo pod nyalo konyo e kindegi?
6. Yesu notimo honni
Jehova nomiyo Yesu teko mar timo honni mang’eny. Mondo ine achiel kuom honnigo, som Mariko 5:25-34 kata tug VIDIO, kae to uwuo e wi penjo ma luwo.
-
Dhako ma tuono ne nigi adiera e wi wach mane?
-
Ang’o ma omori e honono?
Som Johana 5:36, kae to uwuo e wi penjo ma luwoni:
-
Honni ma ne Yesu otimo ne “chiwo neno” mane kuome?
Be ing’eyo?
Thoth gik ma wang’eyo e wi Yesu yudore e buge ang’wen mag Injili ma gin: Mathayo, Mariko, Luka, kod Johana. Moro ka moro kuom jandik Injili ne nigi wach moro mopogore ma ne ondiko e wi Yesu. Wechego duto ka oriw nyisowa sigand Yesu e yo mamit.
-
MATHAYO
e ma ne ondiko bug Injili mokwongo. Owuoyo e wi puonj mag Yesu, to ahinya ahinya gik ma ne opuonjo e wi Pinyruodh Nyasaye.
-
MARIKO
e ma nondiko bug Injili machuokie mogik. Weche manie bugno timore piyo piyo kendo gimit somo.
-
LUKA
to wuoyo e wi kaka Yesu nohero lemo kod kaka nomiyo mon luor.
-
JOHANA
fwenyonwa kido ma Yesu nigo ka oleronwa mbekni ma Yesu ne goyo gi osiepene kod jomamoko.
PARO MA JOMOKO NIGO: “Yesu ne en aena ng’at maber.”
-
Iparo nade?
PUONJ MADUONG’
Yesu nolando wach Pinyruodh Nyasaye, notimo honni, kendo nowinjo Jehova e chal moro amora ma ne entie.
Ang’o ma ipuonjori?
-
Tich maduong’ ma Yesu ne timo e pinyka ne en mane?
-
Honni ma ne Yesu otimo ne chiwo neno mane kuome?
-
Gin puonj mage madongo ma Yesu nopuonjo?
MED TIMO NONRO
En wach mane ma Yesu noheroga wuoye?
“Gimomiyo Yesu Nokawo Pinyruodh Nyasaye Kaka Gima Duong’ Ahinya” (Ohinga mar Jarito, Oktoba 1, 2014)
Ne ane gimomiyo wanyalo bedo gadier ni Yesu notimo honni.
“Gik Minyalo Puonjori Kuom Honni ma Yesu Notimo” (Ohinga mar Jarito, Julai 15, 2004)
Som sula ma luwoni mondo ine kaka ngima ng’at moro ne olokore ka nopuonjore kaka Yesu ne dewo jomamoko.
“Ne Adich Mana gi Ngimana Awuon” (Ohinga mar Jarito, Oktoba 1, 2014)
Ne ane gik madongo ma Yesu notimo koyalo, kochan-gi kaluwore gi kinde ma ne gitimoree.
“Gik Madongo ma Notimore e Ngima Yesu e Pinyka” (Muma Maler—Loko mar Piny Manyien, Apendiks A7)
a Sula mar 31-33 biro medo wuoyo e wi Pinyruodh Nyasaye.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
