Sama wan gi Jokristo wetewa, wawinjoga mana kaka Ruoth Daudi nowinjo ka nowacho niya: “Mano kaka ber kendo long’o ka owete odak kanyachiel gi kuwe!” (Zaburi 133:1) Kuwe ma wan-go ok bi abiya kende. Ng’ato ka ng’ato nigi ting’ mar rito kuwe e kanyakla.

1. Gima kende ma pogo jotich Nyasaye gi jomamoko en ang’o?

Ka idhi e chokruok e piny machielo, samoro ok ibi winjo dhok ma giwacho, kata kamano, gibiro rwaki maber kendo ibiro winjo ni in e kind joma oheri. Nikech ang’o? En nikech wapuonjore Muma ka watiyo gi buge ma chalre kamoro amora. Bende, watemo matek mondo waherre. Kata bed ni wadak kanye, waduto ‘waluongo nying Jehova, kendo watiyone ka wan gi winjruok.’​—Zefania 3:9.

2. Ang’o minyalo timo mondo irit kuwe e kanyakla?

“Herreuru gi hera matut, kendo utim kamano gi chunyu duto.” (1 Petro 1:22) Ere kaka inyalo tiyo gi puonj manie ndikono? Kar keto pachi kuom nyawo mag jomamoko, rang kido mabeyo ma gin-go. Kar mako osiep mana gi joma ohero gik mihero, tem ng’eyo owete gi nyimine mopogore opogore. Bende, nyaka watem matek mondo kik wabuon ng’ato ang’ata kata mana e chunywa.​—Som 1 Petro 2:17. a

3. Ang’o monego itim sama ichwanyori gi Jakristo wadu?

Kata obedo ni wan gi winjruok maber e kindwa, pod wan joma orem. Seche moko wachwanyoga jowetewa kata timonegi gik ma nyalo miyo giwinj malit. Omiyo, Wach Nyasaye nyisowa kama: ‘Dhiuru nyime weyoreuru ketho e kindu gi chuny man thuolo.’ Kae to ndikono medo wacho niya: “Mana kaka Jehova bende ne ni thuolo weyonu richou, un bende nyaka utim kamano.” (Som Jo-Kolosai 3:13.) Wachwanyoga Jehova ding’eny, kata kamano, oweyonwaga richowa. Omiyo, odwaro ni wan be wang’won ne jowetewa. Ka ifwenyo ni ichwanyo nyawadu, kaw okang’ mokwongo mar loso weche e kindu.​—Som Mathayo 5:23, 24. b

 TIM NONRO

4. Kik ibuon ng’ato ang’ata

Wagombo ni waher owetewa gi nyiminewa duto. Kata kamano, nyalo bedonwa matek hero ng’at ma waneno ni opogore kodwa. Ang’o ma nyalo konyowa? Som Tich Joote 10:34, 35, kae to uwuo e wi penjo ma luwogi:

• Jehova oyie ni ji mopogore opogore obed Jonenone. Ng’eyo mano miyo wabedo gi paro mane e wi joma wuok e oganda mopogore kodwa?

• Gin yore mage ma ji ohero buonogo ji e alworau monego iwerigo?

Som 2 Jo-Korintho 6:11-​13, kae to uwuo e wi penjo ma luwoni:

• Ere kaka inyalo medo hero owete gi nyimine ma chalgi opogore gi mari?

5. We ne joweteni kethogi gi chuny man thuolo kendo los kuwe

Jehova weyonwaga kethowa gi chuny man thuolo kata obedo ni en to onge chieng’ moro amora ma biro dwarore ni wang’wonne. Som Zaburi 86:5, kae to uwuo e wi penjo ma luwogi:

• Jehova ng’wononwa e okang’ ma romo nade?

• Ang’o momiyo imor ni Jehova nyalo weyoni richoni?

• Gin gik mage ma nyalo ketho winjruok manie kindwa gi jomamoko?

Ere kaka wanyalo luwo ranyisi mar Jehova kendo bedo gi winjruok maber gi jowetewa? Som Ngeche 19:11, kae to uwuo e wi penjo ma luwoni:

• Sama ng’ato ochwanyi, en ang’o minyalo timo mondo kuwe obed e kindu?

 Seche moko wachwanyoga jomamoko. Ka mano otimore, ang’o monego watim? Tug VIDIO, kae to uwuo e wi penjo ma luwo.

• Ang’o ma nyaminwano notimo mondo olos kuwe?

 PUONJ MADUONG’

Inyalo rito kuwe manie kanyakla kuom hero owete gi nyimine kendo weyonegi kethogi.

Ang’o ma ipuonjori?

• Ang’o minyalo timo mondo kik ibuon ng’ato ang’ata?

• Ibiro timo ang’o ka ichwanyori gi Jakristo wadu?

• Ang’o momiyo diher luwo ranyisi mar Jehova mar ng’wono ne jomamoko?