Nyasaye dwaro ni ji odag e piny ka gimor. Ne ochueyo pinyni kaachiel gi gik moko duto ma ni e iye nikech ohero dhano. Machiegnini, obiro kawo okang’ mondo omi ji modak e pinje te ngima maber. Obiro tieko gik makelo chandruok ne dhano.​—Som Jeremia 29:11.

Onge sirkal mosetieko mahundu, tuoche, kata tho. Kata kamano, nitie wach maber. Machiegnini, sirkal mar Nyasaye biro kawo kar sirkande duto mag dhano. Joma biro dak e bwo sirkandno biro yudo kuwe kod ngima ma onge tuoche.​—Som Isaya 25:8; 33:24; Daniel 2:44.

Chandruok biro rumo mana ka Nyasaye otieko jo maricho e pinyni. (Zefania 2:3) Mano biro timore karang’o? Wach Nyasaye ne okoro gik ma sani timore ma keto ngima dhano ka marach. Gik maricho matimore sani nyiso ni kinde ma Nyasaye biro kawoe okang’ koro okayo machiegni.​—Som 2 Timotheo 3:1-5.

Onego wapuonjre e wi Nyasaye ka watiyo gi Wachne ma en Muma. Muma en kaka barua mowuok kuom wuoro ma jahera. Muma nyisowa kaka wanyalo bedo gi ngima maber gie sani, kendo kaka wanyalo bedo gi ngima mochwere e piny ka kinde ma biro. En adier ni jomoko ok bi mor neno ni ikonyi winjo tiend weche ma ni e Muma. Kata kamano, ngima mochwere en gima kende ma ok onego obayi.​—Som Ngeche 29:25; Fweny 14:6, 7.