Joodwa nodak e gweng’ moro mantie France miluongo ni Tellancourt. Wuonwa en ja France, to minwa en nya Italy. Ka ne ajahigni aboro, ne wadar mwadhi e gweng’ moro modhier mantie e dala mar Rome e piny Italy. Ngima ne tek ahinya kuno. Jonyuolna ne siko ka dhawo nikech pek mag yuto.

Ka ne ajahigni 15, minwa nochako jiwa ni ane kaka anyalo wuok odwa mondo amanyie osiepe. Omiyo, mosmos nachako budho oko ahinya. Mapiyo nono namako osiep gi jomaricho. Chieng’ moro, dichwo moro nobiro kama ne antie. Nomiya yedhe mamero ji, kendo ne akawogi nikech ne adwaro ni ji onena kaka ng’at maduong’. Nachako tiyo gi yedhe mamero ji kendo nadonjo e chode. Kinde mang’eny, ji nohero timona timbe modwanyore mag nindruok. Ne ochopo kama ne ok ane ngima kaka gima duong’. Ne awinjo mana ka an kenda. Kane ajahigni 16, natemo dera. Namadho chupa achiel mar kong’o kae to anyumora e nam. Mano nomiyo pacha olal kuom ndalo adek.

Ne achako neno ngima kaka gima duong’, to podi nahero timbe gero kod wuondo ji. Ne an jachode, to ka ng’ato noyie dhi nindo koda e ode, ne amiye yedhe mamero, kae to akwalo gimoro amora maber ma ne en-go. Grube madongo mag jonjore nohero tiyo koda e tero yedhe mamero kuonde mopogore opogore e piny Italy. Polise ne siko ka maka kinde ka kinde. Ne aonge gi geno moro amora. Kata kamano, pod ne an gadier ni nitie gimomiyo ne ochueya. Ne alemo ka akwayo Nyasaye ni mondo omiya kata mana higa achiel ma anyalo dakie gi kuwe.

Ka ne ajahigni 24, ne ang’ado ni adar mondo adhi adag e piny England. Ngimana ne ni kama rach nikech ne asemakora gi joma uso yedhe mamero ji. Ka ne pok adar, ne alimo minwa. Ka nachopo nabwok ahinya neno jal moro miluongo ni Annunziato Lugarà ka wuoyo gi minwa e wi Muma. * Luoro nomaka ka nanene kanyo nikech nang’eyo ni ne en janjore, omiyo, napenje gima notimo kanyo. Nonyisa kaka nosetimo lokruoge madongo e ngimane mondo obed achiel  kuom Joneno mag Jehova, kae to nokwaya ni mondo asingrane ni ka adhi England to abiro manyo Joneno mag Jehova. Ne anyise ni abiro timo kamano. Kata kamano, mapiyo bang’ chopo kuno ne adok e ngimana machon.

Chieng’ moro ne aromo gi Janeno mar Jehova moro kachiwo gasede mag Ohinga mar Jarito kod Amkeni! e achiel kuom nderni mag London. Ne aparo kaka ne asingora ne Annunziato, omiyo nakwaye konyalo puonja Muma.

Weche ma ne apuonjora e Muma nomako dhoga ahinya. Kuom ranyisi, Ndiko mar 1 Johana 1:9 nojiwa ahinya. Owacho kama e wi Nyasaye: “Ka wahulo richowa, to obiro weyonwagi, kendo obiro pwodhowa.” Ndikono nokonya ahinya nikech naneno ni achido ahinya kaluwore gi kit ngima ma nadakie. Ne achako dhi e chokruoge mag Joneno mag Jehova e Odgi mar Romo. Ne girwaka gi mor. Ka naneno kaka gin gi hera madier ma be e gima nasegombo kuom higni mathoth, nang’ado mar bedo achiel kuomgi.

Ne ok tekna weyo tiyo gi yedhe mamero kaachiel gi weyo ngima mar chode, to gima nayudo ka tekna moloyo ne en weyo kido maricho ma ne an-go chon. Ne apuonjora ni dwarore mondo ami jomoko luor kendo adewgi gadier. Kuom adier, pod anyagora mondo awe kido moko maricho. To Jehova osekonya ahinya, kendo asetimo dongruok mabeyo. Bang’ puonjora Muma gi Joneno mag Jehova kuom dweche auchiel, ne obatisa ma abedo achiel kuomgi. Mano notimore e higa mar 1997.

Bang’ ka nosebatisa, ne akendo nyako moro ma nyinge Barbara ma bende ne eka oa batis mobedo Janeno mar Jehova. Ka ne achiel kuom osiepena machon oneno lokruoge ma ne asetimo, en bende nochako puonjore Muma. Bang’ kinde en kaachiel gi nyamin-gi ne gibedo Joneno. Bang’e, nyamin dawa ma ne jahigni 80 nochako puonjore gi Joneno, kendo nobatise kapok otho.

Sani an jaduong’-kanyakla kendo an kaachiel gi jaoda watiyo tij lendo kuom thuolowa duto, ka wapuonjore Muma gi joma wacho dho Italia modak London. Kinde moko chunya nyosorega ka aparo kit ngimana machon, kata kamano, Barbara konyaga ahinya, to moloyo e kinde ma kamago. Aseyudo gik ma nagombo ahinya kaka bedo gi joot mamor kod Wuoro mohera gadier. Nakwayo mondo Nyasaye omiya kata mana higa achiel mopong’ gi kuwe, to osemiya mang’eny moloyo gik ma nakwaye!