Nyinge. Nyasaye owuon wacho kama: “An Jehova. Mano e nyinga.” (Isaya 42:8) Nying Nyasaye yudore e Muma nyadi 7,000 kama. Kata kamano, Mumbni mang’eny to osewilo nyingno gi nyinge mag telo, kuom ranyisi, “Ruoth.” Nikech Nyasaye dwaro ni ibed osiepne, ojiwi ni ‘iluong nyinge.’​—Zaburi 105:1.

Nyinge Jehova mag Telo. E Muma iluongo Jehova gi nyinge mamoko bende mag telo kaka, “Nyasaye,” “Manyalo Duto,” “Jachuech,” “Ruoth,” kod “Jaloch.” Nitie lamo mang’eny mondik e Muma ma jotich Jehova noluongee gi nyingene mag telo kanyachiel gi nyinge ma nyinge.​—Daniel 9:4.

 Kaka Ochalo. Nyasaye en roho. (Johana 4:24) Muma wacho ratiro ni “onge dhano moseneno Nyasaye.” (Johana 1:18) Muma nyisowa kaka owinjoga e chunye. Ji nyalo chwanye kata miyo “chunye mor.”​—Ngeche 11:20; Zaburi 78:40, 41.

Kite. Nyasaye ok buon ng’ato ang’ata, bed ni oa e piny mane kata oganda mane. (Tich Joote 10:34, 35) Bende, en “Nyasaye mang’won kendo ma kecho ji, ma iye ok wang’ piyo, kendo mogundho gi hera mosiko kod adiera.” (Wuok 34:6, 7) Kata kamano, en gi kido moko ang’wen madongo.

Teko. Nikech en “Nyasaye Manyalo Duto,” en gi teko mar timo gimoro amora mosingo.​—Chakruok 17:1.

Rieko. Nyasaye nigi rieko ma malo moloyo ng’ato ang’ata. Mano e momiyo Muma wacho ni en kende “e jal mariek.”​—Jo-Rumi 16:27.

Tim Makare. Kinde duto Nyasaye timoga gik makare. “Yorene duto ni kare,” kendo ‘ok onyal timo ne ng’ato gima ok kare.’​—Rapar mar Chik 32:4.

Hera. Muma wacho ni “Nyasaye en hera.” (1 Johana 4:8) Muma ok wach awacha ni Nyasaye nyiso hera kae to oweyo gi kanyo; kar mano, en owuon en hera. Herane e ma tayo gimoro amora motimo, kendo mano kelonwa ber mang’eny.

Nyasaye Nyalo Bedo Osiep Dhano. Nyasaye en Wuonwa ma ni e polo moherowa. (Mathayo 6:9) Ka waketo yie kuome, wanyalo bedo osiepene. (Zaburi 25:14) Parie ni Nyasaye gweli mondo isud machiegni kode kokalo kuom lamo, kendo ‘iket parruokni duto kuome, nikech odewi.’​—1 Petro 5:7; Jakobo 4:8.

Yesu Ok En Nyasaye. Yesu en ng’at makende nikech en kende e ma Nyasaye nochueye achiel kachiel. Mano e momiyo en kende e ma Muma luonge ni Wuod Nyasaye. (Johana 1:14) Bang’ ka Jehova nosechueyo Yesu, notiyo kode kaka “jatich molony” e chueyo gik mamoko duto moriwo nyaka dhano.​—Ngeche 8:30, 31; Jo-Kolosai 1:15, 16.

 Yesu ne ok owacho ni en Nyasaye. Kar mano, nolero ni en notiyo mana e lo Nyasaye. Nowacho kama: “Abiro e loye, kendo Ng’atno e ma ne oora.” (Johana 7:29) Kinde moro ka nowuoyo gi achiel kuom jopuonjrene, noluongo Jehova ni Wuon-gi kendo Nyasache. Nonyiso japuonjreno niya: “Adhi ir Wuora kendo Wuonu, ir Nyasacha kendo Nyasachu.” (Johana 20:17) Ka ne Yesu otho, Jehova nochiere momiye ngima e polo, kendo nokete e bade ma korachwich momiye teko mang’eny.​—Mathayo 28:18; Tich Joote 2:32, 33.

Yesu Kristo Nyalo Konyi Sudo Machiegni gi Nyasaye

Yesu nobiro e piny ka mondo opuonj ji e wi Wuon-gi. Jehova owuon nowacho kama e wi Yesu: “Ma Wuoda ma ahero. Winjeuru.” (Mariko 9:7) Yesu ong’eyo Nyasaye e yo maber moloyo ng’ato ang’ata. Yesu owuon nowacho kama: “Onge ng’at mong’eyo Wuoro, mak mana Wuoyi kod ng’at ma Wuoyi dwaro elone.”​—Luka 10:22.

Yesu nonyiso kido mag Nyasaye e yo makare chuth. Mano e momiyo nonyalo wacho niya: “Ng’at ma osenena, oseneno Wuoro bende.” (Johana 14:9) Yesu nohero ji mana kaka Nyasaye noherogi. Nonyiso mano e wechene kod timbene kendo mano nokonyo jogo sudo machiegni gi Nyasaye. Nowacho niya: “An e yo, kendo an e adiera, kendo an e ngima. Onge ng’at ma biro ir Wuora mak mana kokalo kuoma.” (Johana 14:6) Bende, nowacho niya: “Jo ma lamo gadier biro lamo Wuoro kuom roho kod adiera, nimar jo ma kamago e ma Wuoro manyo mondo olame.” (Johana 4:23) Par ane wachno! Jehova manyo joma chalo kodi ma dwaro ng’eyo adiera e wiye.