Be Sigu Chieng’ Norum?
Kata ka wagolo sigu e chunywa, mano ok nyis ni wabiro miyo jomamoko bende otim kamano. Joma onge gi ketho pod dhi nyime chandore nikech gik maricho mitimonegi nikech sigu. Kare en ng’a ma biro tieko sigu chuth?
Jehova Nyasaye kende e ma nyalo tieko sigu. Mano e gima Muma singo ni obiro timo.—Ngeche 20:22.
NYASAYE BIRO GOLO GIK MA MIYO JI BEDO GI SIGU
-
1. SATAN JACHIEN. Satan ma en malaika ma nong’anyo ne Nyasaye e ma miyo ji bedo gi sigu e piny sani. Nyasaye biro ketho Satan kod ji duto te moyie mondo Satan ochikgi.—Zaburi 37:38; Jo-Rumi 16:20.
-
2. PINY SATAN MOPONG’ GI SIGU. Nyasaye biro golo gik maricho manie pinyni, moriwo nyaka josiasa ma jo mibadhi kod jotend dinde ma jiwo sigu. Nyasaye biro golo bende jo ohala ma igi lach kendo mopong’ gi mibadhi.—2 Petro 3:13.
-
3. RINGREWA MOREM. Muma wacho ni dhano duto onyuol e richo. (Jo-Rumi 5:12) Omiyo, pachgi kod timbegi opong’ mana gi gik maricho. Achiel kuom gik marichogo en sigu mopong’ e chuny dhano, kod gik ma gitimo nikech siguno. Nyasaye biro tieko richo, kendo obiro konyo dhano mondo ogol gik maricho manie chunygi, to mano biro miyo sigu orum chuth.—Isaya 54:13.
MUMA SINGONWA PINY MABER MA ONGE SIGU
-
1. ONGE NG’ATO ANG’ATA MIBIRO TIMNE GIK MOKO E YO MA OK NI KARE. Piny duto biro bedo e bwo Pinyruodh Nyasaye, ma en sirkal manie polo ma biro siko nyaka chieng’, kendo ma biro timo mana gik mabeyo lilo. (Daniel 2:44) Joma buono jowetegi kod joma ok rwak pach jomamoko ok nobedie. Nyasaye biro tieko gik maricho duto mitimo ne dhano sani.—Luka 18:7.
-
2. JI DUTO BIRO BEDO GI KUWE. Onge ng’ato ang’ata ma biro chandore nikech lwenje kod timbe mag gero. (Zaburi 46:9) Joma ohero kuwe e ma biro dak e piny.—Zaburi 72:7.
-
3. JI DUTO BIRO DAK NYAKA CHIENG’ E PINY MAKARE. Ji duto ma biro dak e piny biro hero jowetegi gadier. (Mathayo 22:39) Onge ng’ato ang’ata ma biro bedo gi parruok, kendo ok gibi paro kata mana gik maricho ma notimorenegi chon. (Isaya 65:17) E kindeno, oganda dhano ma onge sigu ‘nobed mamor ahinya nikech ginidag gi kuwe.’—Zaburi 37:11.
Be igombo dak e piny ma chalo kamano? Kata gie sani, ji mang’eny puonjore golo sigu e chunygi kuom luwo puonj manie Muma. (Zaburi 37:8) Mano e gima Joneno mag Jehova tara gi tara timo e piny ngima. Kata obedo ni gia e pinje mopogore opogore kendo gipon e kit ngima mopogore opogore, giherore kendo gin gi kuwe e kindgi mana kaka joot achiel.—Isaya 2:2-4.
Joneno mag Jehova biro mor ahinya nyisi gik ma gisepuonjore mosekonyogi nyagore gi timbe maricho ma dhi nyime e piny kod timbe mag buono ji. Gik mibiro puonjori biro konyi mondo igol sigu mosmos e chunyi, kendo ibed gi hera. Ibiro puonjori kaka inyalo bedo mang’won gi jomamoko, moriwo nyaka joma ok go erokamano kod joma nigi sigu. Mano biro miyo ibed mamor sani, kendo ibiro bedo gi winjruok maber gi jomamoko. To maduong’ie moloyo, ibiro puonjori gik minyalo timo mondo ibi idag e bwo Pinyruodh Nyasaye, kama sigu ok nobedie nyaka chieng’.—Zaburi 37:29.
Samoro Inyalo Hero Magi Bende
OHINGA MAR JARITO
Ang’o ma Pinyruodh Nyasaye Biro Timo?
Yesu nong’eyo ni Pinyruodh Nyasaye e sirkal kende ma biro tieko gik maricho. Ang’o ma Pinyruodh Nyasaye osetimo ma miyo wabedo gadier ni obiro tieko gik maricho?
