Kata obedo ni Muma ok en bug thieth, ochiwoga puonj ma konyo ahinya. Puonjgo nyalo konyo ng’at ma nyagore gi tuoche mag paro. Ne ane ranyisi moko.

“Jo mangima ok dwar laktar, to jo matuo e ma dwaro.”​—MATHAYO 9:12.

Muma nyisowa ni nitie kinde ma nyalo dwarore ni wamany thieth. Ji mathoth oseyudo kony kuom timo nonro e wi tuogi kendo manyo thieth kuom lakteche molony.

“Tiego del konyo.”​—1 TIMOTHEO 4:8.

Timo gik ma tiego dendi nyalo konyi nyagori gi tuo mar parruok. Bedo gi chenro maber mar rieyo dendi, chamo chiemo maber, kod nindo moromo nyalo konyi ahinya.

“Chuny mamor chalo gi yath maber, to chuny monyosore tieko teko ng’ato.”​—NGECHE 17:22.

Somo ndiko ma jiwi kaachiel gi keto chenro minyalo chopoe nyalo miyo ibed gi chuny mamor. Bedo gi paro mowinjore kendo geno ni weche biro bedo maber, nyalo konyi nyagori gi tuoni.

 “Rieko ni kod jo ma obolore.”​—NGECHE 11:2.

Nitie kinde moko minyalo fwenyo ni ok inyal timo gimoro midwaro. Omiyo, yie mondo jomamoko okonyi. Nyalo bedo ni osiepeni gi wedeni diher konyi, to samoro ok ging’eyo kaka ginyalo timo mano. Kuom mano, nyisgi gik moko sie ma diher ni gikonyie, to kik igen ni gibiro timo mang’eny moloyo nyalogi. Gonegiga erokamano kuom kony moro amora ma gimiyi.

“Nachako fwenyo ni nitie gima rach koda, omiyo, nadhi neno laktar. Laktarno nofwenyo tuo ma ne chanda. Mano nokonya yie gi chalna kendo nafwenyo ni nitie yore mopogore opogore mag thieth ma ne nyalo konya rito ngimana.”​—Nicole, a ma nigi tuo mar “bipolar disorder.”

“Asefwenyo ni somo Muma pile ka pile gi jaoda konyaga chako odiechieng’ ka an gi paro mabeyo. To moloyo, e odiechienge ma tuona mar depression oketa piny, timo kamano konyoga yudo ndiko ma nyalo jiwa.”​—Peter, ma nigi tuo mar “depression.”

“Ne tekna ahinya nyiso jomamoko chandruok ma ne akaloe nikech wiya ne kuotga. Kata kamano, nitie osiepna moro ma nohera ahinya kendo nodewa gadier. Nokonya bedo gi paro mokuwe kendo neno ni ok an kenda.”​—Ji-yoo, ma nyagore gi tuo mar “eating disorder.”

“Muma osekonya mondo abed gi paro mowinjore e wi tich kod yueyo. Rieko mochiwo osekonya nyagora maber gi parruok ma chandaga kinde ka kinde.”​—Timothy, ma nyagore gi tuo mar “obsessive-compulsive disorder.”