E higa 1985 ka an mana jahigini apar, naneno kikelo nyithindo mowuok e piny Kambodia e skundwa man Columbus, Ohio, U.S.A. Achiel kuom yawuowigo nong’eyo dho-Ingresa e okang’ moro matin. Nogoro pichni mopogore opogore, mondo onyisago timbe malich ma ne timore e pinygi kama ne giaye. Timbego ne gin kaka sando ji, nek koda gik ma ji ne timo mondo gitony. Seche moko ne ajaywak gotieno kaparo chal ma nyithindogi ne nitiere. Ne agombo ahinya nyisogi geno mar dak e Paradis kaachiel gi geno mar chier, kata kamano ok ne ginyal winjo dhok ma nawacho. Kata obedo ni pod ne an mana wuowi matin, nang’ado mar puonjora dho-Kambodia mondo apuonj nyithi skul wetenago wach Jehova. Ok nang’eyo kaka paro ma ne ang’adono ne biro mulo ngimana e kinde mabiro.

Puonjruok dho-Kambodia ok yot. Nitie kinde moko ariyo ma chunya nonyosore maparo mondo awe puonjora dhokno, kata kamano Jehova nojiwa kokalo kuom jonyuolna. Bang’ kinde bende, jopuonj kaachiel gi nyithindo wetena e skul nochako jiwa mondo aluw somo mabiro miya tich maber ma nigi chudo mamalo. An awuon chunya ne gombo ahinya bedo painia, omiyo nayiero tiegora e kos mabiro miyo ayud tich makonya chopo gombona mar bedo painia. Bang’ ae skul, ne ajalendo kanyachiel gi jopainia moko. E wi mano, nachiwora puonjo nyithindo moko mane gombo puonjore dho-Ingresa—to gima natimono nokonya ahinya bang’e.

Kane an gi higini 16, nawinjo ni nitie grup moro e alwora mar Long Beach e taon mar California Amerka, mawacho dho-Kambodia. Ne adhi limbe kuno machako puonjora kaka isomo dho-Kambodia. Bang’ tieko skul, nabedo painia ma adhi nyime lendo ne oganda mar Jo-Kambodia ma nodak machiegni gi dalawa. Ka nachopo higini 18, koro naparo mar dar mondo adhi e piny Kambodia. Kambodia pod ne en kama rach kata kamano, nang’eyo ni ji matin kende kuom dhano milion apar modak e pinyno ema nosewinjo wach maber mar Pinyruoth. E kindego, ne nitie mana kanyakla achiel kende moting’o jolendo 13 e pinyno mangima. Limbena mokwongo e piny Kambodia natimo ka an jahigni 19. Bang’ higini moko ariyo, koro nang’ado mondo adhi adag kuno. Nayudo tij loko dho-Ingresa kendo puonjo ji dhokno mondo ayud kaka nanyalo konyora e tija mar lendo. Bang’ kinde, naromo gi nyaminwa moro ma chenro mage gi maga e ngima ne chalre chuth, omiyo ne wakendore. Waduto kanyachiel, waseyudo mor kuom konyo Jo-Kambodia mang’eny mondo ochiw ngimagi ne Nyasaye.

Jehova ‘osemiya gima chunya ne dwaro.’ (Zab. 37:4) Timo ji jopuonjre e tich maberie moloyo tich moro amora. Kuom higini 16 masebedogo Kambodia, grup matin ma ne nigi jolendo 13, osedongo masani koro wan kanyakla 12 kod grube 4 man kuonde maboyo!—Kaka iwachonwa gi Jason Blackwell.