CHIENG’ moro minwa nopenja niya, “Ang’o momiyo ok idwar lamo kwereni machon? Ikia ni gin e momiyo ingima? Ok inyal kata goyonegi erokamano? Ere kaka inyalo jwang’o chike ma wasebedo ka waluwo kuom tienge mang’eny? Tamruok nyiso kwerewa luor nyiso ni ikawowa ni wafuwo kendo ichayo lamo marwa bende.” Bang’ mano minwa nochako mana ywak.

Yo ma minwa nowuoyogono nomako dhoga. Kiweyo mano, en e ma nochano mondo achak puonjora Muma, kata obedo ni notimo kamano kobadhorego mondo kik opuonjre. Nasebedo kawinje kinde duto, mak mana ni gie kindeno nayudo ka tekna luwo gima nonyisa. Nochuna weyo winje mondo amor Jehova. Ka dine Jehova ok omiya teko, to ok danyalo chung’ motegno.

Mana kaka thoth ji e piny Japan, wan bende ne wan e din mar Buddha. To bang’ puonjore Muma gi Joneno mag Jehova kuom dweche ariyo, nabedo gadier ni Muma wacho adier. Bang’ fwenyo ni an gi Wuonwa modak e polo, ne an gi siso mar ng’eye. Ne wawuoyoga gi minwa e wi gik ma ne apuonjora ka wamor. Nachako dhi e chokruoge ma Jumapil e Od Romo. Kaka namedo ng’eyo adiera, nanyiso minwa ni adwaro wera gi luwo timbe kod kweche mag jo Buddha. Apoya nono, pache nolokore. Nonyisa niya: “Bedo gi ng’ato e ot ma ok ohero kwerewa machon en wich kuot.” Nokwera ni awe puonjora Muma kendo kik adhi e chokruoge. Pok naparoga ni minwa ne nyalo nyisa gima chalo kamano! Ok nochalna minwa ma nang’eyogacha.

Bug Jo-Efeso sula mar 6, nokonya ng’eyo ni Jehova dwaro ni awinj jonyuolna. Baba nodok kor mama. Mokwongo, naparo ni ka awinjogi, to gin bende ne gidhi winja kendo ni mano ne dhi duogo kuwe e odwa. Mopogore gi wachni, penj ma ne dhi miyo wadonj e sekondar ne ni nyime, omiyo nyaka ne aikra maber. Kuom mano, ne ayie timo kaka ne ginyisa kuom dweche adek, to nasingo ne Jehova ni nabiro chako dhi e chokruogego kendo ka dweche adekgo oserumo.

Paro ma ne ang’adono ne rach e yore ariyo. Mokwongo, naparo ni dweche adekgo tin ma ok nyal loka e yo moro amora. Kar mano, nafwenyo  mapiyo ni riyo ma ne an-go ne wach Nyasaye ne dok chien, to mano nomiyo amedo bedo mabor gi Jehova. Mar ariyo, kar mondo warom e diere gi mama gi baba kaka naparo, ne gimedo thung’a mondo awera gi gimoro amora motudore gi lamo madier.

Kinde ma ne adhiga e Od Romo, naromoga gi ji mathoth ma ne yudoga akwede kowuok kuom joodgi. Ne gijiwa ka ginyisa ni Jehova biro tega. (Mat. 10:34-37) Ne giwachona ni an e ma ne anyalo konyo joodwa oyud warruok. Omiyo nachako lemo gi kinda mondo amed geno Jehova.

Nayudo akwede e yore mopogore opogore kowuok kuom joodwa. Minwa ne temoga saya konyisa gimomiyo onego awera gi Joneno. Kinde mang’eny ne aling’ga aling’a. Kane atemoga wuoyo, iwa ne jawang’ nikech ng’ato ka ng’ato kuomwa ne dwaro ni en e ma mondo owinje. Kare ne ok onego acha kaka minwa ne winjo e chunye kod gik ma noyiego, samoro mano ne nyalo kueyo weche. Jonyuolna nomedona tije ot mondo abed modich ma kata sa mar wuok oko obed ma onge. Seche moko ne iloronaga oko to seche moko ne ok wenaga chiemo.

Minwa nochako manyo joma ne nyalo riwe lwedo. Nowuoyo gi japuonjwa e skul, to japuonjwano nodagi riwe lwedo. Minwa nokawa motera ir jatende kar tich mondo owuo koda konyisa ni dinde duto ok kony. Ka wan ot, nogoyoga simu ne wedewa mopogore opogore koywaknegi malich mondo gikonye. Mano ne chando chunya ahinya, kata kamano ka nadhiga e chokruoge jodongo ne jiwaga ni atem ane paro ni gin ji adi ma minwa ne chiwonegi neno.

 Bang’e, wach dhi e yunivasiti nosieko. Jonyuolna nochano tera e yunivasiti nikech ne gineno ni mano ne dhi miyo abed gi ngima maber kinde mabiro. Ne gigeno ni adhi yudo tich maber. Ne ok wanyal wuoyo e wi wachno e yo mamuol, omiyo ne andiko ne mama gi baba barupe mogwaro kaleronegi gik ma nachano timo e ngimana. Mirima nomako baba mokona niya: “Kiparo ni inyalo yudo tich, amiyi kiny kende mondo iyud tijno, ka ok kamano to iwuog e dalana.” Nanyiso Jehova wachno e lamo. Kinyne kane an e tij lendo, nyimine ariyo nopenja ka be anyalo puonjonegi nyithindgi. Wachno ok nomoro wuonwa omiyo noweyo wuoyo koda kendo ne ok odewre koda kata matin. Mamana nonyisa ni ne nyalo bedo maber kabedo jamahundu kar bedo Janeno mar Jehova.

Seche moko ne awuoroga ka Jehova ne dwaroga ni kik atim dwach jonyuolna e okang’ ma weche nosechopeno. Kata kamano, medo lemo kendo paro matut hera mar Jehova kaka Muma wacho nokonya neno akwede e yo makare, kendo fwenyo ni nyalo bedo ni jonyuolna ne kwedaga kamano nikech ne gidewa. Jehova nokonya mondo abed gi paro mowinjore kendo noyawonaga yore. E wi mano, kaka namedo dhi lendo e kaka namedo hero tijno. Omiyo, naketo chenro mar bedo painia.

Kane nyimine moko ong’eyo ni nadwaro bedo painia, ne ging’adona rieko ni awe komondi nyaka chuny jonyuolna opie. Nalemo mondo ayud rieko, natimo nonro, anono paroga, kendo nawuoyo gi owete gi nyimine motegno. Naseng’ado mar moro Jehova. E wi mano, digni chako tij painia ne ok nyis ni jonyuolna ne dhi loko pachgi.

Nachako tij painia e higa mogik ka an e sekondar. Bang’ bedo painia kuom kinde, ne an gi chenro mar dhi lendo kuonde ma jolendo dwarore ahinya. Kata kamano, jonyuolna ne ok dwar ni awuog dala. Omiyo, narito nyaka achopo higni 20. Mondo minwa kik bed gi luoro mathoth, nakwayo ofis mondo omiya migawo yo milambo piny Japan kama wedewa moko ne nitiere.

Kane an e migawono, namor neno moko kuom joma napuonjorago Muma ka ibatiso. Gie kindeno bende, napuonjora dho Kisungu ka an gi paro mar lendo e okang’ momedore. Ne nitie owete moko ariyo ma ne gin jopainia makende e kanyakla ma ne adhiyeno. Naneno kinda ma ne gin-go kod kaka ne gikonyo jomoko. Omiyo, naketo chenro mar bedo painia makende. E kindego bende, mama ne tuwo ogoyo matek diriyo. Kane tuwo ogoye mokwongo, nadhi rite, mar ariyo be kamano. Nowuoro ahinya wachno, kendo chunye nochako gonyore.

Bang’ higni abiriyo, nayudo barua moro moa kuom Atsushi ma ne en achiel kuom painia makendeka. Nonyisa ni oparo wach kendo, omiyo nogombo ng’eyo pacha kod chalna. Paro moro amora ni anyalo hero Atsushi ne pok abedogo, kendo aparo ni en be chon noonge gi paro ma kamano. Bang’ dwe achiel nandikone barua kanyise ni naikora mondo wamed ng’ere. Ne wafwenyo ni wan gi chenro mathoth ma chalre, ka waduto ne wadwaro tiyo ne Nyasaye gi thuolowa te e migawo moro amora. Bang’ kinde ne wakendore. Ne amor ahinya neno ka minwa gi wuonwa, kod wedewa mamoko obiro e aruswa.

Ka pok obudho ahinya ka wan jopainia mapile, ne opwodh Atsushi obed jakony jarit-alwora.  Mapiyo nono, gueth mamoko noluwo. Ne oketwa wabed jopainia makende kae to bang’e jaoda nobedo jarit-alwora. Bang’ limo kanyakla duto ma ne ni e alworawa dichiel, nogonwa simo kowuok e ofis. Penjo ne en niya, ‘Be ne wadhi yie dhi Nepal mondo jaoda obed jarit-alwora kono?’

Napenjora ni jonyuolna ne dhi neno nade dhi mabor kamano. Omiyo nagonegi simo. Wuonwa nodwoko konyisa niya: “Kama udhiyeno ber.” Juma motelo ne mano, osiepne moro nomiye nyabuk ma wuoyo e wi piny Nepal, kendo nosechako paro kaka limo pinyno nyalo bedo gima ber.

Jo Nepal nohero ji. E kinde ma ne wan kodgi, ne wayudo kendo gueth machielo. Alwora ma ne onego wadhiye noriwo Bangladesh. Ne en kama chiegni to nopogore gi kuonde mamoko. Tij lendo kono ne opogore ahinya. Bang’ higni abich, ne oduokwa Japan, kama sani pod wadhi nyime gi tij limo kanyakla mopogore opogore.

Dak Japan, Nepal, kod Bangladesh nopuonja gik mathoth e wi Jehova! Moro ka moro kuom pinjego nigi kitgi kod timbegi. Kendo e piny ka piny ng’ato ka ng’ato opogore gi jowetene e yore makende. Aseneno kaka Jehova rito ng’ato ka ng’ato, kaka oyie kodgi, okonyogi, kendo oguedhogi.

An awuon, Jehova oseguedha komiya thuolo mar ng’eye, omiya tich matimo, kod dichwo maber ma en Jakristo. Nyasaye osetaya ma atimo yiero makare, kendo sani koro an gi winjruok maber kode, kaachiel gi joodwa bende. Aduoko ne Jehova erokamano ni an kaachiel gi minwa wan osiepe kendo. Amor sidang’ ni naloso winjruokna gi Nyasaye kod minwa bende.