Be Ing’eyo Nyasaye?

INYALO dwoko penjono nade? Kuonde duto, ji ong’eyo kendo oyie ni Nyasaye nitie, omiyo gichiworene kendo gimiye luor. Kata kamano, ji mang’eny ok ong’eye e yo matut. Kapo ni in giyie kuom Nyasaye, inyalo dwoko penjo man piny kaegi nade?

1. Be Nyasaye en ng’ato madier?

2. Be Nyasaye nigi nying’?

3. Be Yesu e Nyasaye Manyalo Duto?

4. Be an awuon Nyasaye dewa?

5. Be Nyasaye oyie gi kit lamo duto?

Kapo ni ipenjo jomoko penjogi, inyalo yudo dwoko mathoth mopogore opogore. Kuom mano, ok kawwa gi wuoro, ni sigendini kod paro maok kare mawuoyo kuom Nyasaye osesieko.

Gimomiyo Ng’eyo Dwoko mag Penjogi Dwarore Ahinya

Kane owuoyo gi dhako moro ma ne nigi yie kuom Nyasaye ma noromogo e soko mar pi, Yesu Kristo nojiwo gimomiyo dwarore mondo ng’ato ong’e adiera e wi Nyasaye. Dhakoni ma ne en chi Samaria, ne oyie ni Yesu ne en janabi.  Kata kamano nitie gima ne chando pache. Din ma Yesu ne lemoe ne opogore gi mare. Kane owuoyo kuom wachno, Yesu ne owachone ratiro kama: “Un ulamo gi ma ok ung’eyo.” (Johana 4:​19-​22) Kuom adier, wanyalo neno maler ni Yesu nopuonjo ni ok ji duto ma lamo Nyasaye, ong’eyo Nyasaye kuom adier.

Be weche ma Yesu nowachogo nyiso ni onge ng’ato manyalo ng’eyo Nyasaye? Ooyo. Yesu ne odhi nyime wacho ne dhakono kama: “Jo ma lemo adier ginilam Wuoro e chuny, kendo e adiera, nikech Wuoro dwaro jo ma kama mondo gibed jo ma lame.” (Johana 4:​23) Be in achiel kuom jogo malamo Nyasaye “e chuny, kendo e adiera”?

Dwarore ahinya mondo ibed gadier kuom dwoko mar penjono. Nikech ang’o? Yesu nojiwo gimomiyo dwarore bedo gi ng’eyo makare kane olemo kama: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.” (Johana 17:⁠3) Ee, geno mari mar dak e ngima mabiro otudore ahinya gi ng’eyo adiera e wi Nyasaye!

Be en gima nyalore mondo ng’ato ong’e adiera e wi Nyasaye? Ee, nyalore! To kare ere kaka inyalo yudo adierano? Yesu nowacho kama kuome owuon: “An e yo, kendo an e adiera, kendo an e ngima; ng’ato ok bi ka Wuoro ma ok okadho kuoma.” (Johana 14:⁠6) Bende nomedo wacho kama: ‘Onge ng’ama ong’eyo Wuoro ni en ng’a, to mana Wuowi e mong’eye, kendo ng’at ma Wuowi dwaro oelone.’—Luka 10:⁠22.

Omiyo yo maduong’ mar ng’eyo Nyasaye yudore kuom puonj mag Yesu Kristo, ma e Wuod Nyasaye. Kuom adier, Yesu singonwa kama: “Un kusiko e wachna, eka unubed jopuonjrena adier. Kendo unung’e adiera, kendo adiera nomiu bedo thuolo.”—Johana 8:​31, 32.

Kuom mano, Yesu ne nyalo dwoko nade penjo abich ma nopenji moteloka?

[Picha manie ite mar 4]

Be ilamo Nyasaye to kuom adier ok ing’eye maber?