Ne apon Turku, taon ma ne odhier ma ne nitie e dho nam. Wuonwa ne piem e tuke adhong’ kata ngum, kendo an gi owadwa matin ne wabedo jo adhong’. Kinde ma ne an e skul, ne athoro gora gi ng’ato ang’ata motugo koda lweny. Kane abedo rawera, ne adonjo e grub jonjore kendo mano nomiyo amedo donjo e timbe gero moloyo. Ne achako hero thumbe mag koko kendo ne agombo bedo jathum mang’ula.

Ne anyiewo gige thum moko kendo ne aloso band. Mapiyo nono, an e ma ne ang’era ahinya e bandno. Kane awer, ne ahero timora magala gala. Nikech jobandwa ne gin joma gere kendo ne rwakore e yo magala gala, ne wang’ere ahinya. Ne wachako goyo thum e nyim ji mang’eny kendo ne waloso wende ma moko kuomgi ne jofwamb weche opako. Ka higni mag 1980 ne dhi rumo, ne wadhi wer Amerka mondo bandwa ong’ere kuno. Ne wawer matin New York koda Los Angeles, kendo kapok wadok Finland, ne waloso tudruok gi joma timo ohand thum kuno.

Kata obedo ni ahero bandno, ne pod awinjo ni aremo gimoro e ngimana. Ne aol gi piem gi gero ma ne nitie e ohand thum kendo chunya be ne ojok gi kaka ne atiyo gi ngimana mana e manyo mor. Ne ang’eyo ni an ng’at marach, to ne ok adwar ni owang’a e mach maok tho. Omiyo, ne atemo nono buge mag dinde mopogore opogore kendo ne akwayo Nyasaye mondo okonya kata obedo ni ne aneno ni ok anyal more kata atim ang’o.

Ne ondika e posta. Chieng’ moro ne afwenyo ni achiel kuom jotich wetena ne en Janeno mar Jehova. Ne apenje penjo modhuro. Dwokone ma ne winjore maler kendo mowuok e Ndiko ne omora ahinya kendo ne omiyo ayie mondo opuonja Muma. Bang’ puonjruok Muma kuom jumbe matin, bandna ne oyudo thuolo mar dhi wer Amerka kendo mano ne dhi kelonwa ohala maber. Ne aneno ni ma e thuolo ma ne asebedo ka arito e ngimana duto.

 Ne anyiso Janeno ma ne puonjore koda ni ne adwaro ni awer dichiel mogik kae to aket pacha duto e luwo puonj mag Muma. Ne ok ochiwo pache, to ne onyisa mana ni asom weche Yesu mayudore e Mathayo 6:24. Ndikono wacho niya: “Onge ng’ato ma nyalo tiyo ni ruodhi ariyo.” Dhoga ne omoko kane afwenyo tiend weche ma Yesu nowachogo. To bang’ ndalo matin, japuonjna e ma ne dhoge omoko! Nanyise ni nikech ne adwaro luwo Yesu, ne ang’ado mar weyo bandno!

Muma ne chalona mana ka kiyo ming’iruokie manyisa kama onego alosi. (Jakobo 1:22-25) Ne an ja mahundu. Ne asungora kendo gombona mar yudo duong’ ne okalo tong’. Ne ayenyo kendo ne ahero goruok. Ndawa gi kong’o ne amadho nyamin anega. Kane afwenyo kaka kit ngimana ne obalo gi chike Muma, ne aneno ni ago le e kidi. Kata kamano, ne aikora timo lokruok.—Jo Efeso 4:22-24.

Kane eka achako puonjora, chunya ne chandore ahinya kuom gik maricho ma ne atimo e kinde mokalo. Kata kamano, Janeno ma ne puonja Muma ne okonya ahinya. Nonyisa gima Muma wacho e bug Isaiah 1:18: “Kata richou obet makwar ahinya, ginidok matar kaka theluji.” Ndikoni kaachiel gi mamoko nomiyo aneno ni Wuonwa me polo en jang’wono kendo odwaro ni joma olokore moweyo richo ma ne gitimo chon, okuo.

Kaka ne amedo ng’eyo Jehova kendo here, ne adwaro chiwone ngimana. (Zaburi 40:8) Nobatisa e higa mar 1992 e chokruok moriwo pinje mar Joneno mag Jehova ma ne otim St. Petersburg, Russia.

Asebedo gi osiepe mang’eny e kind joma lamo Jehova. Kinde ka kinde, wajoromo mondo wago thumbe mabeyo, to mano miyowa mor nimar thum en achiel kuom mich mabeyo ma Nyasaye omiyowa. (Jakobo 1:17) Gimoro machielo mosebedona gweth, en jaoda miluongo ni Kristina. Wasekadho kode e mor kod pek mag ngima, kendo enie osiep chunya.

Ka dine ok an Janeno mar Jehova, dikoro asetho. Chon ne asiko anyumora e chandruok moro bang’ machielo. Sani to koro ang’eyo kama ngimana ochomo kendo amor gi kaka ngimana dhi.