JONATHAN, Ja-Korea ma ne onyuol Amerka ne ibuono ka pod otin nikech oganda ma ne owuokie. Kane obedo maduong’, ne omanyo kama nonyalo dakie ma ji ne ok dhi buone nikech ogandane. Ne obedo laktar e taon moro Alaska, e piny Amerka, kama thoth joma nothiedho ne gin joma chalre kode. Noneno ni kata obedo ni Alaska ne en kama ng’ich ahinya, dak kuno ne ber moloyo. Nogeno ni koro ne oringo chuth ngima ma ne ibuonee.

Ne ofwenyo ni weche ne ok dhi bedo kamano kane chieng’ moro othiedho miyo moro ma jahigni 25. Miyono ne ohewore ahinya, to kane pache oduogo mita ogo wang’e kuom Jonathan, ne ojare koyanye gi ayany moro ma ne nyiso kaka ne osebedo kochayo Jo-Korea ahinya a e tinne. Gima lit ma ne otimoreno nonyiso Jonathan ni kare kinda duto ma ne osetimo mar dhi dak kamachielo  kendo temo bedo kaka jogo, ne ok okonye yombo buon ma ne ji osebedo ka buonego.

Gima ne otimore ne Jonathan nyiso ayanga chal moro malit mantie. Ibuono ji kamoro amora e pinyni. Nenore ni kamoro amora ma ji nitie, nyaka buono ji bedie.

Kata obedo ni buono ji en gima onya ahinya, ji mang’eny kwedo timno. Gima nyalo mako dho ng’ato en ma: Ere kaka gima ji kwedo kamano nyalo nya e okang’ ma kamano? Nenore ni mano timore nikech jomang’eny makwedo tim buono ji bende buono ji maok ging’eyo. Be dibed ni in achiel kuomgi?

Pile ok yot mondo ng’ato ofweny ni en ng’ama buono jomoko. Muma lero gimomiyo en kamano kowacho niya: “Chuny dhano otimo wuond motamore nono.” (Yeremia 17:9) Omiyo, pachwa nyalo wuondowa ni wan ok wabuon ji. Kata pachwa nyalo wuondowa ni kata obedo ni nitie jogo ma wabuono, ok watim kamano nono.

Mondo wang’e kabe wabuono jomoko, par ane ranyisini: Iwuotho kendi e yo moro gotieno. Idhi romo gi rowere moko ariyo mikia. Achiel kuomgi chal ka gima oting’o gimoro e lwete.

Be gima biro e pachi en ni ginyalo hinyi? Samoro gik ma osetimoreni e ngima miyo iwinjo kiluor. Kata kamano, be mano koro nyiso ni rowerego gin jomaricho madwaro hinyi? Penjo maber manyalo konyi nonori kabe ibuono ji en ma; Sama ne ikwongo neno rowerego, ne iparo ni giwuok e oganda mane? Kaka idwoko penjono nyalo konyi fwenyo gima nie chunyi. Dwokoni nyalo nyiso ni kare in be ibuono ji e okang’ moro.

Ka ok wawuondre, wabiro neno ni waduto wabuono ji e okang’ moro e yore mopogore opogore. Kata Muma bende nyisowa yo moro ma ji buonogo ji ahinya kowacho niya: ‘Dhano ng’iyo kit nenruok ma oko.’ (1 Samuel 16:7) Nikech wachni omako dhano duto—to kinde mang’eny okelo mana hinyruok—be nitie geno ni chieng’ moro wabiro loyo kata tieko chuth kido marachni? To be nitie kinde ma tim buono ji ok nobedie e piny duto?