Ne apon e taon matin miluongo ni Warialda mantie New South Wales. En kama oting’o joma opogore opogore ma gin jopur mabende pidho rombe gi dhok. En taon maler kendo timbe mahundu nokie.

Ne wan nyithindo apar e odwa, to an ema an kayo. Omiyo, nachako tich ka an jahigni 13 mondo akony joodwa. Nikech somba ne tin, tije puodho ema ne anyalo yudo. Ne achako tij boyo kata chiko farese kane an jahigni 15.

Konchiel, tiyo e puothego ne berna. Gima ne amorgo ne en alwora majaber ma ne atiye. Kinde moko gotieno, ne anyalo ng’iyo malo kendo neno dwe koda polo mopong’ gi sulwe. Yamo bende ne kutho kuno mamit. Aparo maber ka awacho e chunya kindego ni nyaka bed ni nitie Nyasaye ma nochweyo gik mabeyogo duto. To komachielo, tiyo e puothego nomiyo adonjo e timbe maricho. Jotich wetena ne siko tiyo gi weche maricho to ndawa bende ne yudore mayot kuno. Matin nono, madho ndawa kod yenyo nobedo kit ngimana.

Kane achopo jahigni 18, nadar adhi dak Sydney. Ne atemo mondo ondika e lweny, kata kamano nikech somba ne tin, ne ok okawa. Ne ayudo tich moro Sydney ma adak kuno kuom higa achiel. Mano e kinde ma nakwongo romoe gi Joneno mag Jehova. Ne adhi e achiel kuom chokruogegi kendo nafwenyo dichiel ni gipuonjo adiera.

Kata kamano, matin bang’e nang’ado mar dok tiyo e puothe. Ne adhi Goondiwindi, Queensland. Nayudo tich kuno ma achwe akendo. Gima rach en ni kuno bende ema ne achako madhoe kong’o mokalo tong’.

 Ne wayudo nyithindo ariyo ma yawuowi. Bang’ bedo gi nyithindogo, nachako paro matut kama ngimana nochomo. Ne aparo puonj ma ne awinjo e chokruok mar Joneno ma ne adhiye ka an Sydney, kendo nang’ado mar kawo okang’.

Ne ayudo gaset machon mar Watchtower moting’o adres mar ofis mar Joneno mag Jehova e piny Australia. Ne aoronegi barua mondo gikonya winjo tiend Muma. Ne giorona Janeno moro mang’won kendo ma jahera. Mapiyo nono, nochako puonja Muma.

Kaka ne adhi nyime puonjora Muma, e kaka ne amedo neno ni ne dwarore ni atim lokruoge madongo e ngimana. Ndiko achiel ma nomula ahinya ne en 2 Jo Korintho 7:1. Ndikono jiwowa mondo “walwokre a e chido mar ringruok.”

Nang’ado mar weyo madho ndawa kendo weyo mer. Timo lokruogego ne ok yot, nikech ne gin gik ma ne asebedo ka atimo kuom kinde malach. Kata kamano, nang’ado mar dak e ngima mamoro Nyasaye. Gima nokonya moloyo ne en tiyo gi puonj mayudore e ndiko mar Jo Rumi 12:2: “Kik uluw tim pinyni, to lokreuru ka parou doko manyien.” Nafwenyo ni mondo alok timbena, ne nyaka alok parona kendo asin gi timbego mana kaka Nyasaye osin kodgi. Kokalo kuom kony ma Nyasaye chiwo, naweyo madho ndawa kod mer.

Gima nochanda ahinya ne en weyo tiyo gi weche maricho. Ne ang’eyo gima Muma wacho e ndiko mar Jo Efeso 4:29: “Wach moro marach kik owuog e dhou.” Kata kamano, weyo tiyo gi weche mochido nokawa kinde. Gima nokonya ahinya ne en paro matut kuom weche mondik e bug Isaiah 40:26. Ndikono wuoyo kuom gik mayudore e kor lwasi kowacho niya: “Ting’uru wang’u malo, une ng’a mosechweyo magi, magolo ogandagi kokwano kar rombgi: oluongogi gi duto gi nying’; kuom duong’ mar tekone, kendo ni kech tek to tek, onge moro ma onge.” Ne awacho e chunya ni, ka Nyasaye nigi teko mogundho mar chweyo piny gi polo ma ne gin gik malombo wang’a ahinya, onge kiawa ni nonyalo miya teko mar timo lokruoge madwarore mondo atim dwache. Mosmos, kuom lemo kod timo kinda, ne aweyo tiyo gi weche mochido.

Kane atiyo e puothe, ne ok ahiny yudo thuolo mar goyo mbaka nikech ji manok ema ne odak e puothego, kendo mano nomiyo ok nalony e wuoyo gi ji. Kata kamano, kokalo kuom tiegruok ma Joneno mag Jehova chiwo e chokruogegi, asepuonjora wuoyo gi ji. Tiegruokno bende osekonya wuoyo gi ji e wi wach maber mar Pinyruodh Nyasaye.—Mathayo 6:9, 10; 24:14.

Kuom higni mogwaro, asebedo ka atiyo kaka jaduong’-kanyakla. Amor ahinya timo duto ma anyalo mondo akony Jokristo wetena. To gweth maduong’ moloyo ma asebedogo en tiyo ne Jehova ka an kaachiel gi chiega ma ahero kod nyithindwa.

Aduoko ne Jehova erokamano ahinya kuom puonja kata obedo ni ne somba tin. (Isaiah 54:13) Ayie chutho gi weche mondik e bug Ngeche 10:22, mawacho ni: “Hap Jehova e mokelo mwandu.” An kaachiel gi jooda wang’ado mar dhi nyime puonjruok e wi Jehova kendo tiyone nyaka chieng’.