Dala mar Bethania ne ni kilomita 3 kiwuok Jerusalem. (Johana 11:18) Nitie masira moro ma ne otimore e dalano jumbe matin kapok Yesu otho. Achiel kuom osiepe Yesu miluongo ni Lazaro nobedo matuwo apoya nono mi otho.

Kane Yesu okwongo winjo wachno, ne onyiso jopuonjrene ni Lazaro ne nindo kendo ni ne odhi chiewe. (Johana 11:11) To jopuonjrene ne ok owinjo tiend gima Yesu ne wacho, omiyo Yesu ne onyisogi ayanga niya: “Lazaro otho.”—Johana 11:14.

Ndalo ang’wen bang’ yik Lazaro, Yesu nodhi Bethania mondo oho Maritha, nyamin Lazaro. Maritha nowacho niya: “Ruoth, ka da yandi in ka, ominwa di ne ok otho.” (Johana 11:17, 21) Yesu nowachone niya: “An e chier, kendo an e ngima. Ng’a ma yie kuoma, kata otho nodok mangima.”—Johana 11:25.

Mondo Yesu onyis ni mago ne ok gin mana weche manono, ne odhi machiegni gi bur ma ne oyikie Lazaro mokok niya: “Lazaro, wuog oko!” (Johana 11:43) Mano kaka joma ne ni kanyo ne obwok neno ka ng’ama ne otho wuok e bur kama ne oyikee!

Motelo ne mano, noyudo Yesu osechiero jomoko ariyo. Achiel kuomgi ne en nyar Jairo. Matin nono kapok ne Yesu ochiero nyakono, nowacho ni nyakono ne nindo aninda.—Luka 8:52.

Ne ni sama Yesu ne wuoyo e wi tho mar Lazaro kata e wi tho mar nyar Jairo, ne owacho ni joma otho chalo mana joma nindo. Mano en ranyisi mowinjore ndi. Nikech ang’o? Nikech sama ng’ato nindo, onge gima ong’eyo, oonge rem, kata chandruok moro amora. (Eklesiastes 9:5; ne  wich ma wacho ni,  “Tho Chalo gi Nindo Matut.”) Jopuonjre mokwongo mag Yesu nong’eyo maber gima timore ne ng’ato ka otho. Buk miluongo ni Encyclopedia of Religion and Ethics wacho ni “jolup Yesu ne puonjo ni jogo motho ka gin Jokristo tho ne chalo mana gi nindo, to bur miyikoe ng’ato ne en mana kar yueyo.” *

Ng’eyo ni jomotho yueyo e bur kendo ni ok gisandre e yo moro amora, hoyowa ahinya. Omiyo, wang’eyo gima timore ka watho kendo onge gima onego waluorne tho.

Kata obedo ni nindo mit gotieno, en ng’ano ma diher ni onind aninda nyaka chieng’? En geno mane ma wan-go ni joma nindo e liete biro chier mana kaka nochier Lazaro kod nyar Jairo?

Ayub miwuoye e Muma, nopenjo penjo ma chalo kamano kane ochiegni tho. Nopenjo niya: “Ka dhano otho, nobed mangima kendo koso?”—Ayub 14:14.

Kowuoyo gi Nyasaye Manyalo Duto, Ayub nodwoko penjone owuon kowacho niya: “Diluong nyinga eka daduoki wach: Chunyi doher tich mar lueti.” (Ayub 14:15) Ayub ne ni gadier ni Jehova gombo chiero jatichne. Be mano ne en gima Ayub gombo agomba to kare onge? Ooyo ngang’.

Joma ne Yesu ochiero e yor hono nyiso maler ni Nyasaye nomiyo Yesu teko mar tieko tho. Kendo Muma wacho ni sani Yesu nigi “rayaw mar tho.” (Fweny 1:18) Kuom mano, mana kaka Yesu ne nigi teko mar chiero Lazaro, teko ma kamano ema biro miyo ochier ji e kinde mabiro.

Muma wuoyo kuom geno mar chier nyadinwoya. Malaika moro nosingo ne janabi Daniel niya: ‘Ndalo ma wechegi nogikie nochopi; nikech iniyuwe, eka inichungi e kari ka ndalo ogik.’ (Daniel 12:13) Yesu nonyiso jotend Jo-Yahudi miluongo ni Jo-Saddukai ma ne ok oyie kuom chier niya: “Ubayo yo, nikech ok ung’eyo weche manie Ndiko, kata teko mar Nyasaye.” (Mathayo 22:23, 29) Jaote Paulo nowacho niya: “An gi geno kuom Nyasaye, . . . . ni nobedie chier mar jo makare kod jo ma ok kare.”—Tich Joote 24:15.

Chier mar joma kare gi mar joma ok kare miwuoyoe e ndikono, notimre karang’o? Malaika nonyiso Daniel ni Daniel nochier “chieng’ giko.” Maritha bende ma ne nyamin Lazaro, nong’eyo ni owadgi “nochier e chier chieng’ giko.”—Johana 11:24.

Muma wacho ni ‘chieng’ gikoni’ otudore gi loch mar Pinyruodh Kristo. Paulo nondiko niya: ‘Nikech Kristo onego olochi nyaka oket wasike duto e bwo tiende. To jasigu machien mibiro tiek, en tho.’ (1 Jo Korintho 15:25, 26) Mani jiwowa mondo wamed lamo mondo Pinyruodh Nyasaye obi kendo dwaro mar Nyasaye otimre e piny. *

Mana kaka Ayub nong’eyo, Nyasaye biro chiero jomotho. Ka chieng’no ochopo, Nyasaye biro tieko tho chuth. Onge ng’ama nopenjre kendo ni ‘Be tho e giko dhano?’