WACH MADUONG’ MA GASET WUOYOE | KAKA WANYALO KEDO GI PARRUOK MAG NGIMA
Parruok Chando Ji Mang’eny!
“Ne adhi nyiewo chiemo e duka, ma ayudo mana ka biskut kende e ma odong’ e dukni, kendo ne iuso biskudego e nengo mohingo mapile nyadi 10,000. Kinyne ne onge chiemo moro amora e dukni te.”—Paul, ma wuok e piny Zimbabwe.
“Chieng’ moro chwora ne oketa piny, monyisa ni oweyowa. Ne adhi nyagora nade gi tim andhogano? Ne adhi pidho nyithinda nade?”—Janet, ma wuok e piny Amerka.
“Samoro amora ma alam oywak, aringoga madhi kama dapondie, kendo ajanindo piny auma sama gik moko muoch. Kata bang’ ka piny osekuwe, pod ajawinjo ka aluor ahinya.”—Alona, ma wuok e piny Israel.
Wadak e kinde “matek ahinya,” kendo ma parruok ng’enyie. (2 Timotheo 3:1) Gik machando ji ahinya gin kaka pek mag yuto, kend ma kethore, lwenje, tuoche malich, kod masiche. E wi mago, nitie weche moko ma nyalo chando chuny ng’ato kaka: ‘Be nyalo bedo ni gima okuodo dendani nyiso ni an gi kansa?’ ‘Ngima nyikwaya biro chalo nade e kinde ma biro?’
Nitie weche moko ma ok rach bedo gi parruok kuomgi. Ng’ato nyalo winjo koluor sama odhi timo penj moro, kata sama odhi timo gimoro e nyim ji. Bedo maluor nyalo konyowa geng’o gik ma nyalo hinyowa, mana kaka ngero moro wacho ni otoyo maluor e ma dak aming’a. Kata kamano, bedo gi parruok ahinya nyalo hinyo ng’ato. Nonro ma nyocha otim ne ji mokalo 68,000 nonyiso ni kata mana parruok matin, nyalo nego ng’ato. Mano e momiyo Yesu nopenjo kama: “Ng’ano kuomu ma kuom parruok nyalo medo bor mar ngimane kata mana gi bat achiel?” En adier ni, parruok ok nyal medo bor mar ngima ng’ato. Kuom mano, Yesu nonyisowa kama: “Weuru bedo gi parruok.” (Mathayo 6:25, 27) Be ng’ato nyalo dak ma onge parruok?
Adier, ng’ato nyalo dak ma onge parruok kotiyo gi rieko makare, kobedo gi yie kuom Nyasaye, kendo kobedo gi geno makare kuom kinde ma biro. Kata kapo ni gie sani onge gima miyowa parruok mang’eny, samoro ngima nyalo lokore e kinde ma biro. Wanon ane kaka weche adekgo osekonyo Paul, Janet, kod Alona ma a owuo kuomgi e chak sulani.
