Ne apon kama iluongo ni Puerto Limón, ma en taon manie e dho wath e piny Costa Rica. Ne wan nyithindo aboro to ne an nyathi mar abiriyo. Babawa ne otho ka ajahigni aboro. Kuom mano, mamawa e ma ne opidhowa.

Ne ahero tugo baseball * ahinya. Mano e tugo ma ne ahero ka ne an nyathi. Ka ne an rawera ne atugoga e tim manie gweng’wa. Ka ne atugo e timno ka ajahigni 20 kama, achiel kuom joma manyo jotugo ma inyalo nyiew ne openja ka be ne anyalo dhi tugo ne tim moro maduong’ e piny Nicaragua. Kata kamano, nikech mamawa ne tuore to an ema ne arite, ne ok adwar dhi Nicaragua. Omiyo, ne akwero ng’atno ni ok nyalre. Bang’e, ng’at machielo ne ochako openja ka be anyalo tugo e tim mar pinywa ma Costa Rica ka wan gi jotugo mamoko ma bende ne oyier mondo otugi. Ne ayie timo kamano. Ne atugo ne pinywa chakre higa mar 1949 nyaka 1952, to bende natugo e pinje mopogore opogore kaka Cuba, Mexico, kod Nicaragua. An ema ne an jang’wech kendo ne aringo e tuke 17 ma ok aketho kata achiel. Winjo kaka ji ne kok gi nyinga ka gipaka ne mora matek!

Gima lit en ni ne adonjo e chode. Kata obedo ni ne an gi osiepna achiel ma nyako, pod ne amako osiep gi nyiri mamoko mang’eny. Mer bende ne amerga matek. Chieng’ moro ne amer matek ma ka ne achiewo gokinyi ne akiya kata kaka ne achopo e ot! E wi mano, ne atugoga tuke mag loyo mich mag pesa.

Ka ne pod atimo timbego, mamawa ne obedo Janeno mar Jehova. Ne otemo nyisa gik ma ne opuonjore en mana ni ne ok aluwo puonjgo nikech pod ne ahero tugo baseball. Sama ne an e pap ka atimo tiegruok ne ok awinjga kata ka kech kaya ka jomoko to chiemo! Pacha duto ne aketo e tugono. Ne ahero tugo baseball moloyo gimoro amora!

Kata kamano, ka ne ajahigni 29, ne ahinyora marach ka ne  atemo mako opira e pap sama ne watugo. Ka ne achango, ne aweyo tugo e tim mar pinywa. Ne achako tiego jotugo e tim matindo tindo ma ne ni machiegni gi korwa.

E higa mar 1957, ne adhi e chokruok maduong’ mar ndalo adek mar Joneno mag Jehova ma ne otim e pap moro ma nasetugega baseball. Ne aneno pogruok maduong’ ahinya e kind Joneno mag Jehova kod joma ne biroga pakowa sama ne watugo. Joneno mag Jehova ne gin joma ohero kuwe to joma ne pakowa nohero koko kod timbe ma oyombre. Gima ne aneno e chokruogno ne omiyo achako puonjora Muma gi Joneno mag Jehova kendo ne achako lemo kodgi.

Gik ma ne apuonjora e Muma ne mora malich. Kuom ranyisi, Yesu nokoro ni e ndalo mag giko, jopuonjrene ne dhi lando wach maber mar Pinyruodh Nyasaye e piny mangima. (Mathayo 24:14) Ne apuonjora bende ni Jokristo madier ok puonj ji wach Nyasaye mana ni mondo ochulgi. Yesu nowacho niya: “Nuyudo nono, omiyo chiwuru nono.”—Mathayo 10:8.

Sama ne apuonjora Muma, ne atemo rango ahinya ka be Joneno mag Jehova timo gik ma Muma puonjo. Ne amor ahinya gi kinda margi mar lando wach maber mar Pinyruodh Nyasaye e piny mangima. Naneno ka gin gi chuny mar chiwo ma Yesu nowacho ni Jokristo onego obedgo. Omiyo, ka ne asomo Mariko 10:21 kama Yesu wachoe ni, ‘Bi ibed jalupna,’ ne adwaro bedo Janeno.

Ne okawa kinde mondo abed Janeno. Kuom ranyisi, ne asebedo ka atugo tuke mag loyo mich juma ka juma. Kata kamano, ne apuonjora e Muma ni Nyasaye kwedo joma lamo nyiseche manono kaachiel gi joma igi lach. (Isaiah 65:11; Jo-Kolosai 3:5) Kuom mano, ne aweyo tuke mag loyo mich. Ka ne aseweyo tugono, Jumapil ma noluwo, namba ma ne atugogago ema ne olocho! Ji nojara nikech ne ok atugo jumano kendo ne gitemo chuna mondo atug kendo to ne adagi. Ne aweyo tugono chuth.

E odiechieng’ ma ne obatisa e chokruok maduong’ mar Joneno mag Jehova, ne aromo gi tem moro ma ne dhi nyiso ka be adier ne aserwako “dhano manyien.” (Jo-Efeso 4:24) Chieng’no godhiambo ka ne adok e otel ma ne aninde, ne ayudo osiepna machon ma nyako ka rita e dhoot. Ne onyisa niya, “Sammy bi mondo wacham ngima.” Kata kamano, ne akwere kanyo gi kanyo ni, “Ok nyalre!” Ne anyise ni aluwo puonj mag Muma. (1 Jo-Korintho 6:18) Nokok matek niya: “Be wiyi ber?” Ne ojaro puonj mag Muma ma wuoyo e wi terruok kae to onyisa ni wabed osiepe kendo. Ne aweye kanyo kae to adonjo ma achiego dhoot. Sani amor ahinya ni chakre abed Janeno mar Jehova e higa mar 1958, pok adok e timbe modwanyore ma ne aseweyo.

Aneno ni anyalo ndiko buk ma wuoyo e wi ber mathoth ma aseyudo nyaka ne achak luwo puonj mag Muma! Moko kuom ber ma aseyudo en ni sani an gi osiepe migeno, atiyo gi ngimana e yo maber, kendo an gi mor madier.

Pod ahero tugo baseball, en mana ni ok en gima duong’ ahinya e ngimana kaka chon. E kinde ma ne atugo baseball, ne ayudo huma kod pesa, en mana ni gigo ne ok osiko. Kata kamano, winjruok maber ma an-go gi Nyasaye, kaachiel gi owete to biro siko nyaka chieng’. Muma wacho kama: “Piny kadho gi gombone, to ng’at ma timo dwach Nyasaye siko nyaka chieng’.” (1 Johana 2:17) Sani ahero Jehova Nyasaye kod jotichne moloyo gimoro amora!