Mar Ariyo ne Jo-Korintho 6:1-18
6 Ka watiyo kanyachiel gi Nyasaye,+ wakwayou bende ni kik urwak ng’wono mogundho mar Nyasaye kae to wiu wil gi gimomiyo ne ochiwe.+
2 Nimar owacho kama: “Ne awinjou e kinde ma ayiego, kendo e chieng’ warruok, ne akonyou.”+ Neuru! Sani e kinde moyiego moloyo. Neuru! Sani e chieng’ warruok.
3 Ok watim gima nyalo chwanyo ng’ato e yo moro amora mondo kik yudie ketho moro e tijwa;+
4 to e yore duto, wanyiso ratiro ni wan jotich Nyasaye,+ kuom nano e gik mang’eny, kuom masiche, kuom ndalo mag chando gik moko, kuom gik matek,+
5 kuom gocho, kuom tuech e jela,+ kuom oganda ma achach, kuom tich matek, kuom fuwo nindo, kuom ndalo ma ne onge chiemo;+
6 kuom dak e ngima maler, kuom timo kaluwore gi ng’eyo, kuom horuok,+ kuom ng’wono,+ kuom roho maler, kuom hera ma onge wuondruok,+
7 kuom wacho weche madier, kuom teko mar Nyasaye;+ kokalo kuom gik lweny makare+ ma wating’o e bedewa korachwich* gi koracham,*
8 kokalo kuom duong’ gi achaya, kokalo kuom weche maricho gi mabeyo ma ji wacho kuomwa. Ji kawowa kaka jowuond to wan jo adier,
9 kaka jo ma ji ok ong’eyo to koni ong’ewa, kaka jo mowinjore gi tho, to neuru! eri wangima,+ ikumowa to ok chiwwa e lwet tho,+
10 wachal jo mokuyo to wail kinde duto, wachal jo ma odhier to koni waloko ji mang’eny jomwandu, wachal jo ma onge gimoro to koni wan gi gik moko duto.+
11 Waseyawonu dhowa mondo wawuo kodu* un Jo-Korintho, to chunywa bende waseyawonu mobedo thuolo.
12 Ok wapandonu herawa,+ to un ok upandonwa herau.
13 Koro e yor chulowa—aloso kodu kaka dalos gi nyithinda—un bende yawuru chunyu.+
14 Kik utueru e jok achiel gi jo ma ok ni e yie.+ Nikech en lalruok mane ma nitie e kind tim makare kod ketho chik?+ Koso, en winjruok mane ma nitie e kind ler kod mudho?+
15 E wi mano, en winjruok mane ma nitie e kind Kristo kod Belial?*+ Bende, en ang’o ma riwo ng’at manie yie kod ng’at ma ok ni e yie?+
16 Kendo en winjruok mane ma nitie e kind hekalu mar Nyasaye kod sanamu?+ Nimar wan hekalu mar Nyasaye mangima;+ mana kaka Nyasaye nowacho niya: “Anadag e kindgi kendo anawuoth e diergi,+ mi anabed Nyasachgi, to ginibed joga.”+
17 “Jehova* owacho niya: ‘Kuom mano, auru e kindgi, kendo upogru kodgi, kendo weuru mulo gima ok ler’”;+ “‘mi anarwaku iye.’”+
18 “Jehova* Manyalo Duto owacho kama: ‘Kendo anabed wuonu,+ to unubed yawuota kod nyiga.’”+
Weche Moler Piny
^ Samoro mondo otigo e monj.
^ Samoro mondo otigo e geng’ruok.
^ Kata, “wawuo ma ok wapandonu gimoro.”
^ E dho Hibrania, tiend nyingni en “Gima Nono.” Itiyo kode kiwuoyo kuom Satan.
^ Som Apendiks A5.
^ Som Apendiks A5.
