Barua mar Ariyo mar Petro 3:1-18
3 Un jo mahero, ma en barua mar ariyo ma andikonu, to mana kaka e mokwongocha, daher paronu wechegi mondo achiewgo nyalou mar paro,+
2 mondo upar weche ma jonabi maler nokoro chon kod chik ma Ruoth kendo Jawar nochiwo kokalo kuom jooteu.
3 Mokwongo tiktik, ng’euru ni e ndalo mag giko, jojar ji nobinu mondo gijaru, ka kiluwo gombogi giwegi+
4 kendo giniwach niya: “Ere wach ma ne osing e wi kinde ma biro yudo ka koro entie?+ Nimar nyaka ne kwerewa tho, gik moko duto dhi nyime mana kaka gisebedo a chakruok mar chuech.”+
5 Gitamore goyiem wach mong’ere, ni chakre chon, wach moa e dho Nyasaye nomiyo polo kod piny ma ne ochung’ motegno koa ei pi kendo e dier pi obetie.+
6 Gigo e ma ne okethgo piny ma ndalono. Mano ne otimore kane ataro mar pi opong’o piny.+
7 To kokalo kuom wach achielno, polo kod piny ma nitiere sanigi osekan ne mach, kendo okan-gi nyaka chop chieng’ bura kendo nyaka chieng’ mibiro kethie jo ma ok oluoro Nyasaye.+
8 Kata kamano, un jo ma ahero, ng’euru ni e wang’ Jehova,* odiechieng’ achiel chalre gi higni aluf achiel, to higni aluf achiel gin kaka odiechieng’ achiel.+
9 Jehova* ok dhi mos kuom wach chopo singone+ kaka jomoko paro ni odhi mos, to ohore kodu nikech ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo.+
10 To odiechieng Jehova*+ nobi kaka jakuo,+ kendo polo nokadh+ gi koko ma riadore, to gik manie polo gi piny nobed maliet ahinya mi ginileny nono, kendo piny kod tije man e iye ibiro el.+
11 To nikech ibiro leny gigo duto e yo ma kamano, koro uparo ni onego ubed jo ma chalo nade? Onego ubed gi timbe maler kod timbe ma nyiso ni uluoro Nyasaye,
12 ka urito kendo uketo pachu kuom kinde ma biro yudo ka koro odiechieng Jehova* nitie,+ ma en chieng’ ma ibiro kethie polo+ gi mach, kendo gik manie polo gi piny biro leny nono nikech liet mager!
13 To kaluwore gi kaka nosesingo, warito polo manyien gi piny manyien,+ ka ma tim makare nobedie.+
14 Kuom mano, un jo ma ahero, nikech sani urito gigo, timuru kar nyalou mondo gikone jalo onwang’u ka uonge chilo kata ketho, kendo onwang’u ka un gi kuwe kode.+
15 E wi mano, kwanuru horuok mar Ruodhwa kaka gima kelonu warruok, mana kaka Paulo owadwa ma wahero bende nondikonu kaluwore gi rieko ma nomiye,+
16 kowuoyo e wi wechego mana kaka ojatimo e barupene duto. Kata kamano, nitie weche moko e barupego ma winjo tiendgi tek, kendo jo ma kia gi jo ma ok ochung’ motegno gwenyo wechego mana kaka gitimo bende gi Ndiko mamoko, ka mano kelonegi kethruok giwegi.
17 Kuom mano, un jo ma ahero, nikech koro useng’eyo mano motelo, beduru motang’ mondo jo ma ketho chik kik mi ulal, mi un bende uwe chung’ motegno.+
18 To kar mano, dhiuru nyime dongo e ng’wono mogundho mar Nyasaye kod ng’eyo e wi Ruodhwa kendo Jawarwa Yesu Kristo. Mad obed gi duong’ sani kendo nyaka chieng’. Amin.
