Ne Jo-Galatia 3:1-29
3 Yaye un Jo-Galatia ma onge rieko! Un ma oselernu ayanga wach Yesu Kristo ma ne ogur e yath,+ en ng’a mosewuondou marach kama?+
2 Adwaro ng’eyo wach achielni kuomu: Be ne uyudo roho maler kokalo kuom luwo chik, koso ne en nikech yie ma ne un-go kuom weche ma ne uwinjo?+
3 Kare uonge rieko mana kama? Ka ne uchako, ne uwuotho ka roho maler tayou, ang’o momiyo koro utieko e yor ringruok?+
4 Be ne ukalo e sand mang’eny kamano mana kayiem nono? An gadier ni ne ok en kayiem.
5 Kuom mano, be jal ma miyou roho kendo ma timo tije madongo+ e kindu timogi nikech nuluwo chik koso nikech ne uyie kuom weche ma ne uwinjo?
6 Mana kaka Ibrahim “noketo yie kuom Jehova,* kendo ne okwane kaka ng’at makare.”+
7 Kuom adier, ung’eyo ni jo ma makore gi yie gin nyithind Ibrahim.+
8 Koro nikech Ndiko noneno chon ni kokalo kuom yie Nyasaye ne dhi kwano ji moa e ogendni kaka jo makare, mi nolando ne Ibrahim motelo wach maber niya: “Ogendni duto ibiro guedh kokalo kuomi.”+
9 Omiyo, jo ma makore gi yie iguedho kanyachiel gi Ibrahim jal ma ne nigi yie.+
10 Jogo duto momakore gi chik ni e bwo kuong’, nikech ondik kama: “Okuong’ ng’ato ang’ata ma ok luw weche duto mondik e buk modol mar Chik.”+
11 E wi mano, nenore maler ni kokalo kuom chik, onge ng’at mikwano kaka ng’at makare e wang’ Nyasaye+ nimar “ng’at makare nobed mangima kokalo kuom yie.”+
12 Koro Chik ok otenore kuom yie. Kar mano, “ng’at ma timo gigi biro rito ngimane.”+
13 Kristo nong’iewowa+ mi nogonyowa+ a e kuong’ mar Chik ka nobedo ng’at mokuong’ e lowa, nikech ondik niya: “Ng’at molier e yath, en ng’at mokuong’.”+
14 Mano ne en ni mondo gueth ma ne osing ne Ibrahim ochop ne ogendni mamoko bende, kokalo kuom Kristo Yesu,+ eka kokalo kuom yiewa, wayud roho maler ma ne osingi.+
15 Owetena, awuoyo ka atiyo gi ranyisi mar gima jatimore e ngima dhano: Ka nitie singruok ma ji osewinjoree, kata ka dhano e ma otimo kamano, onge ng’at ma kethe kata ma medoe wach moro.
16 Koro singo ne ochiw ne Ibrahim kod kothe.+ Singono ok wach ni, “gi kothene,” ka gima ging’eny. To owuoyo mana kuom achiel ni, “gi kothi,” ma en Kristo.+
17 E wi mano, awacho kama: Chik ma nobetie higni 430 bang’e,+ ok keth singruok ma Nyasaye nosetimo motelo, kendo ok oruch gima ne osingno.
18 Nimar ka pok ma Nyasaye chiwo iyudo kokalo kuom chik, mano miyo koro ok otenore kuom singo; to Nyasaye osemiyo Ibrahim pokno e yo mang’won, kokalo kuom singo.+
19 To kare Chik en mar ang’o? Ne omede mondo richo onenre ayanga+ nyaka bang’ ka kodhi ma ne osingno osechopo;+ kendo Chikno ne ochiw kokalo kuom malaike+ ka gitiyo gi lwet jagach.+
20 Koro jagach ok bedie mana ne ng’ato achiel, kata kamano, Nyasaye to en ng’at achiel.
21 Be mano nyiso ni Chik kwedo singo mag Nyasaye? Ooyo ngang’! Nimar ka chik ne nyalo miyo ji ngima, adier dikoro inyalo kwan ng’ato kaka ng’at makare kokalo kuom chik.
22 To Ndiko noketo gik moko duto e bwo tuech mar richo, mondo singo ma bedoe nikech yie kuom Yesu Kristo ochop ne jo ma nyiso yie.
23 Kata kamano, ka yie pok nochopo, chik e ma ne ritowa, koketowa e bwo tuech, ka warito yie ma nonego oel.+
24 Omiyo, Chik ne obedonwa kaka jarit ma tayowa nyaka ir Kristo,+ mondo eka okwanwa kaka jo makare kokalo kuom yie.+
25 To nikech sani yie osechopo,+ koro ok wan e bwo jaritno.+
26 Adier, uduto un nyithind Nyasaye+ kokalo kuom yie kuom Kristo Yesu.+
27 Nimar uduto ma nobatisu e Kristo, userwakoru gi kido kaka mag Kristo.+
28 Kuom mano, onge pogruok e kind Ja-Yahudi gi Ja-Grik,+ bende e kind misumba gi ng’at man thuolo,+ kata e kind ng’at ma dichwo gi ng’at ma dhako,+ nimar uduto un e winjruok achiel gi Kristo Yesu.+
29 E wi mano, ka un mag Kristo, to adier un koth Ibrahim+ kendo un jo ma biro yudo pok ma ne osingi.+
Weche Moler Piny
^ Som Apendiks A5.
