Ne Jo-Rumi 2:1-29
2 Kuom mano, ka ing’ado ne ji bura, in bende+ bura oloyi; nimar king’ado ne ng’at machielo bura, to ing’ado bura ne in iwuon, nikech in bende itimo mana gik ma ng’atno timo.+
2 To koro wang’eyo ni bura ma Nyasaye ng’ado ne jo ma timo gik ma kamago en bura madier.
3 To ka ing’ado bura ne jo ma timo gik ma kamago, to in iwuon itimo gigo, be iparo ni ibiro tony ne bura mar Nyasaye?
4 Koso, ichayo ng’wonone mogundho,+ gi sinanine,+ kod horuokne,+ nikech ok ing’eyo ni kokalo kuom ng’wononeno, Nyasaye temo tayi mondo ilok chunyi?+
5 To nikech wiyi tek kendo chunyi otamore lokre, ikano kum ne in iwuon, nyaka chieng’ ma Nyasaye nonyis mirimbe kendo elo burane makare.+
6 Eka enochul ng’ato ka ng’ato kaluwore gi timbene:+
7 ngima ma nyaka chieng’ ne jo ma manyo duong’ gi pak, kod del ma ok tow+ ka ginano e tim maber;
8 to mirima gi gero nobi kuom jo ma nigi chuny mar ywaruok kendo ma ok luw adiera kod tim makare.+
9 Masira gi chandruok malit nobi kuom ng’at ma timo gik maricho, kuom Ja-Yahudi mondi, eka Ja-Grik;
10 to duong’, gi pak, kod kuwe nobi kuom ng’at ma timo gik mabeyo, kuom Ja-Yahudi mondi,+ eka Ja-Grik.+
11 Nimar Nyasaye ok buon ji.+
12 Nikech ji duto ma notimo richo ka gionge gi chik, biro tho ma onge chik;+ to ji duto ma notimo richo ka gin gi chik, chik biro ng’adonegi bura.+
13 Nimar jo ma winjo chik ok e jo makare e nyim Nyasaye, to jo ma luwo chik ibiro kwan ka jo makare.+
14 Nikech sa ma ji moa e ogendni mamoko ma onge gi chik+ timo gik ma chik dwaro, jogi, kata obedo ni gionge gi chik, gitimo gik moko ka gima gin gi chik.
15 Gin e jo ma nyiso ni chik ondik ei chunygi, ka bende nyalogi mar pogo ber gi rach chiwonegi neno, kendo pachgi ng’adonegi bura, kata ketogi thuolo.
16 Mano biro timore chieng’ ma Nyasaye biro ng’adoe bura kokalo kuom Kristo Yesu e wi gik ma dhano opando.+ Mano biro timore kaluwore gi wach maber ma alando.
17 In iluongori ni Ja-Yahudi,+ itenori kuom chik, isungori ni in ng’at Nyasaye,
18 ni ing’eyo dwache, kendo ni iyie gi gik mabeyo moloyo nikech ne opuonji Chik.+
19 Bende, in gadier ni itayo muofni, kendo ni in e ler mar jo ma ni e mudho,
20 jal ma rieyo jo ma parogi ok ni kare, japuonj mar nyithindo matindo, kendo ni Chik osemiyi mise mar bedo gi ng’eyo kod adiera—
21 kata kamano, in mipuonjo ng’at machielo, be ipuonjori iwuon?+ In miyalo kiwacho ni, “Kik ikwel,”+ dibed ni ikwelo?
22 In mipuonjo ni, “Kik ichodi,”+ dibed ni ichodo? In misin gi sanamu, dibed ni ikwelo e hekalu?
23 In misungori kuom chik, dibed ni ichayo Nyasaye kuom ketho Chik?
24 Nimar ondik ni, “nying Nyasaye iyanyo e kind ogendni mamoko nikech un.”+
25 Kuom adier, nyangu+ konyo mana kiluwo gima chik dwaro;+ to ka iketho chik, nyangu moseteri en kayiem nono.
26 Omiyo, ka ng’at ma ok oter nyangu+ luwo gima Chik dwaro, kata obedo ni pok otere nyangu, donge ibiro kwane kaka ng’at moseter nyangu?+
27 Kendo ka ng’at ma ok oter nyangu e ringruok chopo weche mag Chik, obiro miyo onere maler ni iketho chik, kata obedo ni in gi chik mondik kendo oseteri nyangu.
28 Nimar ng’ato ok en Ja-Yahudi mana gi ringruok,+ bende nyangu ok en mana mar ringruok.+
29 To ng’ato bedo Ja-Yahudi gie chunye,+ kendo nyangu ma itere en mar chuny+ kokalo kuom roho, to ok kuom chik moro mondik.+ Pak ma ng’atno yudo wuok kuom Nyasaye, to ok kuom dhano.+
