Injili mar Johana 12:1-50
12 Ka ne odong’ ndalo auchiel to Pasaka chakore, Yesu nochopo Bethania, dalagi Lazaro+ ma nosechiero.
2 Omiyo, ne giloso ne Yesu nyasi kuno, kendo Maritha ne tiyonegi,+ to Lazaro ne en achiel kuom jo ma nobet e mesa kode.
3 Eka Maria nokawo chupa* moting’o mo ma nigi suya mamit, mor nad madier, ma en mo ma nengone tek gilala, kendo noolo morno e tiende Yesu mi noyweyo gi yie wiye. Such morno nosaso odno.+
4 To achiel kuom jopuonjrene ma nyinge Judas Iskariot,+ ma ne chiegni ndhoge, nowacho kama:
5 “Donge mo ma nigi suya mamitni dine ous dinari* 300 mondo omi jo ma odhier?”
6 Kata kamano, nowacho mano ok nikech nodewo jo ma odhier, to nikech ne en jakuo kendo en e ma norito sandug pesa, to ne ojakwalo pesa moket ei sandugno.
7 Eka Yesu nowachonegi niya: “Wereuru kode mondo otim mano ka oika ne chieng’ yikna.+
8 Nimar kinde duto un gi jo ma odhier,+ an to ok ubi bedo koda kinde duto.”+
9 Gie kindeno, Jo-Yahudi mang’eny nofwenyo ni ne en kanyo, kendo ne gibiro mondo gine Yesu gi Lazaro ma nosechiero.+
10 Koro jotend-jodolo noriwo paro mondo gineg Lazaro bende
11 nikech en e ma ne omiyo Jo-Yahudi mang’eny ne dhi kuno kendo keto yie kuom Yesu.+
12 Kinyne, oganda mang’ongo ma nosebiro e sawono nowinjo ni Yesu biro Jerusalem.
13 Omiyo, ne gikawo bede othidhe kendo wuok mondo giromne, mi ne gichako kok niya: “Rese, wakwayi! Ng’at moguedh en ng’at ma biro e nying Jehova*+ Ruodh Israel!”+
14 Ka ne Yesu oyudo nyathi punda moro, nobet kuome+ mana kaka ondik niya:
15 “Kik ibed maluor, in nyar Sayun. Ne! Ruodhi biro ka oidho nyathi punda.”+
16 Kar chakruok, jopuonjrene ok nong’eyo tiend wechego, to bang’ ka nosemi Yesu duong’,+ ne giparo ni gigo nondik kiwuoyo kuome kendo ni ne otimne gigo.+
17 Koro oganda ma ne ni kode sa ma noluongo Lazaro mondo owuog oko e liel+ kochiere, ne siko ka chiwo neno.+
18 Mani bende e gimomiyo ogandano nodhi romone, nikech ne gisewinjo ni notimo hono maduong’no.
19 Omiyo, Jo-Farisai nowacho e kindgi niya: “Wachandore nono. Neuru! piny duto luwo bang’e.”+
20 Koro ne nitie Jo-Grik moko e kind jo ma nobiro lemo e sawono.
21 Omiyo, jogo nodhi ir Filipo+ ma ne a Bethsaida man Galili, kendo ne gichako kwaye niya: “Jaduong’, wadwaro neno Yesu.”
22 Filipo nodhi mowacho ne Andrea. Andrea gi Filipo nodhi mi giwacho ne Yesu.
23 Yesu nodwokogi kama: “Sa osechopo ma Wuod dhano onego omi duong’.+
24 Adier, adier, awachonu ni, ka koth ngano ok olwar e lowo mi otho, osiko mana kodhi achiel; to ka otho,+ bang’e onyago olemo mang’eny.
25 Ng’at mohero ngimane ahinya biro wite, to ng’at mosin gi ngimane+ e pinyni, norit ngimaneno nyaka chop oyud ngima ma nyaka chieng’.+
26 Ka ng’ato dwaro tiyona, to mondo oluwa, kendo ka ma antieree, kanyo bende ng’at ma tiyona nobedie.+ Ka ng’ato dwaro tiyona, Wuora biro miye duong’.
27 Sani chunya chandore,+ to awach ang’o? Wuora, resa kuom sa mosechoponi.+ Kata kamano, mano e momiyo asechopo e sechegi.
28 Wuora, mi nyingi duong’.” Eka dwol moro+ nowuok e polo ka wacho niya: “Asemiye duong’, kendo abiro miye duong’.”+
29 Oganda ma ne ochung’ kanyo nowinjo dwolno mi giwacho ni polo omor. Jomoko ne owacho niya: “Malaika moro owuoyo kode.”
30 Yesu nodwoko kama: “Dwolno osewinjore, ok nikech an, to nikech un.
31 Koro nitie bura ming’ado ne pinyni, kendo jaloch mar pinyni+ ibiro wit oko.+
32 To e ma bang’ koseng’awa malo aa e piny,+ abiro ywayo kit ji duto ira.”
33 Kuom adier, nowacho mano mondo onyisgo kit tho ma nochiegni thogo.+
34 Eka oganda nodwoke kama: “Ne wawinjo e Chik ni Kristo siko nyaka chieng’.+ Ere kaka inyalo wacho ni Wuod dhano nyaka ng’aw malo?+ Wuod dhanono to e ng’a?”
35 To Yesu nokonegi niya: “Ler biro dhi nyime bedo e kindu kuom ndalo matin. Wuothuru sa ma pod un gi ler, mondo mudho kik lou. Ng’at ma wuotho e mudho ok ong’eyo ka ma odhiye.+
36 Ka pod un gi ler, nyisuru yie kuom ler, mondo eka ubed nyithind ler.”+
Yesu nowacho wechego kae to nowuok modhi pondonegi.
37 Kata obedo ni nosetimo honni mang’eny ahinya e nyimgi, ne ok giket yie kuome,
38 mondo eka wach janabi Isaya ochop ma nokoro niya: “Jehova,* ng’ano moseketo yie kuom gima walando?+ To lwet Jehova* osefwenyore ne ng’a?”+
39 Gimomiyo ne ok ginyal keto yie en ni, Isaya nokoro bende kama:
40 “Osedino wengegi kendo osemiyo chunygi obedo matek, mondo kik ginen gi wengegi mi chunygi winj tiend wach, kendo kik gilokre mi achanggi.”+
41 Isaya nokoro wechego nimar noneno duong’ mar Kristo, kendo nowuoyo kuome.+
42 To adier, kata mana jotelo mang’eny noketo yie kuome,+ to ne giluoro Jo-Farisai. Omiyo, ne ok gihul mano ayanga nikech ne inyalo riembgi e sunagogi.+
43 Ne gihero duong’ moa kuom dhano moloyo duong’ mar Nyasaye.+
44 Kata kamano, Yesu nokok niya: “Ng’at ma keto yie kuoma, ok oket yie kuoma kende, to oketo yie bende kuom Ng’at ma ne oora;+
45 kendo ng’at ma nena, oneno bende Ng’atno ma noora.+
46 Asebiro kaka ler e piny,+ mondo ng’ato ka ng’ato ma keto yie kuoma kik sik e mudho.+
47 To ka ng’ato winjo wechenagi to ok oritgi, ok ang’adne bura; nimar nabiro, ok ni mondo ang’ad ne piny bura, to mondo ares piny.+
48 Ng’at ma chaya kendo ma ok rwak wechenagi, en gi gima ng’adone bura. Wach ma asewacho e ma biro ng’adone bura e chieng’ giko.
49 Nimar pok awuoyo kuom dwacha awuon, to Wuora ma ne oora e ma osemiya chik kuom gima onego awachi kod gima onego apuonji.+
50 Kendo ang’eyo ni chikne en ngima ma nyaka chieng’.+ Kuom mano, weche ma awacho, awachogi mana kaka Wuora osewachona.”+
Weche Moler Piny
^ Tiende ni, chupa ma ting’o gram 327 kama. Som Apendiks B14.
^ Som Apendiks B14.
^ Som Apendiks A5.
^ Som Apendiks A5.
^ Som Apendiks A5.
