Tich Joote 13:1-52
13 Koro ne nitie jonabi kod jopuonj e kanyakla man Antiokia.+ Ne gin: Barnaba, gi Simeon ma ne iluongo ni Rateng’,* gi Lukio ma Ja-Kurene, gi Manaen ma osomo gi Herode ma jaloch mar alwora Galili, kod Saulo.
2 Ka noyudo gitiyo ne Jehova* kendo gitueyo chiemo, roho maler nowacho kama: “Walnauru Barnaba gi Saulo+ ne tich ma aseluongonegi.”+
3 Bang’ tueyo chiemo kendo lemo, ne giketo lwetgi kuomgi kae to ne giweyogi mondo gidhi.
4 Omiyo, roho maler noorogi mi ne gilor nyaka Seleukia. Ne giwuok kanyo mi giidho yie nyaka Saipras.
5 Ka ne gichopo Salamis, ne gichako lando wach Nyasaye e sunagoke mag Jo-Yahudi. Johana bende ne ni kodgi kaka jakonygi.+
6 To ka ne gisewuotho e chulano duto nyaka Pafo, ne giromo gi Ja-Yahudi moro miluongo ni Bar-Yesu ma ne en ajuoga kendo janabi mar miriambo.
7 Ne oyudo en gi Sergio Paulo ma ne en jatelo kendo ng’at mariek. Sergio Paulo noluongo Barnaba gi Saulo ire nikech nodwaro ahinya winjo wach Nyasaye.
8 To Elima (tiend nyingno en ajuoga), nochako kwedogi kotemo geng’o jatelono mondo kik orwak yie.
9 Eka Saulo, ma bende iluongo ni Paulo, ne opong’ gi roho maler mi nochomo wang’e tir kuome
10 mowachone kama: “Yaye, in jal mopong’ gi kit miganga duto kod richo duto, in wuod Jachien,+ in jasik gik makare duto, ang’o momiyo igwenyo yore makare mag Jehova?*
11 Lwet Jehova* ni kuomi, ibiro bedo muofu kendo ok inine wang’-chieng’ kuom kinde.” Gikanyono, ong’ueng’o gi mudho mandiwa noumo wang’e, kendo nowuotho koni gi koni kotemo manyo ng’at ma ne nyalo mako lwete mondo otaye.
12 Ka jatelono ne oneno gima ne otimoreno, ne orwako yie nimar ne ohum gi puonj mag Jehova.*
13 Koro Paulo gi jo ma ne en-go noidho yie ka giwuok Pafo mi gidhi nyaka Perga e Pamfulia. To Johana+ noweyogi modok Jerusalem.+
14 Kata kamano, gin to ne giwuok Perga mi gidhi nyaka Antiokia man Pisidia. Ne gidonjo e sunagogi+ chieng’ Sabato mi gibet piny.
15 Ka ne osesom Chik+ kod weche Jonabi, jotelo ma tayo e sunagogi nokwayogi niya: “Owete, ka un gi wach moro amora ma unyalo jiwogo ji, wacheuru.”
16 Kuom mano, Paulo ne oa malo mi nofwayo bade kowacho niya:
“Un Jo-Israel kod un jomamoko moluoro Nyasaye, winjuru.
17 Nyasach Jo-Israel noyiero kwerewa, kendo nokonyogi ka ne gin jodak e piny Misri, mi nogologi kuno gi tekone maduong’.+
18 Kendo ne onano kodgi e thim kuom higni ma dirom 40.+
19 Ka noseketho ogendni abiriyo e piny Kanaan, nochiwo pinygi mondo obed pok mar Jo-Israel.+
20 Mago duto notimore kuom kinde ma dirom higni 450.
“Bang’ mano, nomiyogi jong’ad bura nyaka e kinde janabi Samuel.+
21 To bang’e, ne gikwayo ni omigi ruoth,+ eka Nyasaye nomiyogi Saulo wuod Kish, ma noa e dhood Benjamin,+ kuom higni 40.
22 Bang’ gole, ne ochungonegi Ruoth Daudi,+ jal ma Nyasaye nowacho kuome niya: ‘Aseyudo Daudi wuod Jesse,+ jal ma chunya ohero;+ obiro timo gik moko duto ma adwaro.’
23 Kaluwore gi singone, Nyasaye osekelo ne Israel jawar, ma en Yesu, moa e anyuola mar Daudi.+
24 Ka pok jalo nochopo, Johana noyalo ne Jo-Israel duto mondo obatisgi eka ginyis ni giloko chunygi.+
25 To ka Johana ne chiegni tieko migape, nowachonegiga kama: ‘Ok an ng’at ma uparono. Kata kamano, nitie ng’at ma biro bang’a ma ok awinjora gonyo tond wuochene.’+
26 “Owetena, un ma un koth Ibrahim kod jomamoko manie kindu moluoro Nyasaye, wach mar warruokni oseornwa waduto.+
27 Nimar jo ma nodak Jerusalem kod jolochgi ne ok ofwenyo jalni, to ka ne ging’adone bura, ne gichopo gik ma ne okor e weche Jonabi,+ ma gin weche misomo ne ji gi dwol maduong’ e sabato ka sabato.
28 Kata obedo ni ok ne giyudo wach moro amora kuome ma dimi onege,+ pod ne giramo ni Pilato ogol chik mondo onege.+
29 To ka ne gisechopo weche duto ma ne ondik kuome, ne gigole e yath kendo ne gikete e liel.+
30 Kata kamano, Nyasaye ne ochiere,+
31 kendo jo ma nowuok kode Galili modhi kode Jerusalem ne onene kuom ndalo mang’eny. Jogo e ma sani chiwo neno ne ji e wi wachne.+
32 “Omiyo, sani walandonu wach maber e wi wach ma ne osing ne kwerewa.
33 Kuom chiero Yesu,+ Nyasaye osechopo singono ne wan nyithindgi; mana kaka ondik e zaburi mar ariyo niya: ‘In wuoda; kawuononi, asebedo wuoru.’+
34 To nikech Nyasaye ne ochiere mondo kik obed gi ringruok ma tow kendo, nowacho kama: ‘Ananyisu hera mosiko ma ne osing ne Daudi, ma en hera minyalo gen.’+
35 Omiyo, owacho bende e zaburi machielo kama: ‘Ok iniwe ng’at momakore kodi mondo ringrene otow.’+
36 Kata kamano, Daudi notiyo ne Nyasaye e tieng’ne mi ne otho moyike gi kwerene, kendo ringrene ne otow.+
37 Mopogore gi mano, jal ma Nyasaye nochiero, ringrene ne ok otow.+
38 “Kuom mano, owetena, wachni mondo ong’erenu, ni kokalo kuom jalno, wach weyo ne ji richo sani ilandonu,+
39 kendo ni kuom gik moko duto ma Chik Musa ne ok nyal ketoue jo makare,+ ng’ato ang’ata moyie, ikete ng’at makare nikech jalni.+
40 Omiyo, beduru motang’ mondo gik ma ne okor e weche Jonabi kik bi kuomu, niya:
41 ‘Neuru, un jojero, wuoruru wachno mi ulal nono, nimar sani achopo tich moro e ndalou, ma en tich ma ok ubi yie ngang’ kata ka ng’ato oleronugo adimba.’”+
42 Koro sa ma ne giwuok e sunagogino, ji nosayogi mondo giduog gipuonjgi wechego e Sabato ma luwo.
43 To ka chokruok mar sunagogi noserumo, thoth Jo-Yahudi gi jo ma nolokore modonjo e din mar Jo-Yahudi ma ne lamo Nyasaye, noluwo Paulo gi Barnaba ma ne jiwogi mondo gisik e ng’wono mogundho mar Nyasaye.+
44 E Sabato ma noluwo, chiegni jodalano duto ne ochokore mondo giwinj wach Jehova.*
45 Ka Jo-Yahudi noneno oganda mang’ongono, nyiego nomakogi ahinya mi ne gichako kwedo gik ma Paulo ne wacho.+
46 Eka Paulo gi Barnaba nowachonegi gi chir niya: “Ne en gima dwarore ni un e ma okwong yalnu wach Nyasaye.+ To nikech utamoru wachno kendo useng’ado ni ok uwinjoru gi ngima mochwere, koro neuru, wadhi ir ogendni mamoko.+
47 Nimar Jehova* osechikowa niya, ‘Aseketou kaka ler ne ogendni, mondo uter warruok nyaka e tung’ piny.’”+
48 Ka jo ma ne oa ogendni mamoko nowinjo mano, ne gibedo mamor kendo pako wach Jehova.* Kuom mano, ji duto ma chunygi ne ni kare ne ngima mochwere norwako yie.
49 E wi mano, wach Jehova* ne ilando e pinyno mangima.
50 To Jo-Yahudi nosemo mon moko ma ne nigi huma kendo ma ne oluoro Nyasaye, kod jodongo mag dalano, kendo ne gimiyo osand+ Paulo gi Barnaba, mi ne oriembgi e dalano.
51 Kuom mano, ne giteng’onegi buch tiendgi mi gidhi nyaka Ikonio.+
52 Kendo jopuonjre nopong’ gi mor+ kod roho maler.
Weche Moler Piny
^ Grik, “Niger.”
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
^ Som Apendiks A5.
