‘Alfa Kendo Omega’ En Ng’a?

TUGE

Dwoko ma Muma chiwo

‘Alfa kendo Omega’ en Jehova, Nyasaye Manyalo Duto. Wechego yudore nyadidek e Muma.—Fweny 1:8; 21:6; 22:13. *

Ang’o momiyo Nyasaye luongore ni ‘Alfa kendo Omega’?

Alfa gi omega gin nyukta mokwongo gi mogik e dho Grik, ma en dhok ma nondikgo Muma Manyien moriwo nyaka bug Fweny. Kuonde moketie nyuktago e alfabet mag dho Grik nyiso ni Jehova kende e chakruok kendo en e giko. (Fweny 21:6) Osebedo ka en Nyasaye Manyalo Duto, kendo pod obiro dhi nyime bedo Nyasaye Manyalo Duto nyaka chieng’. En kende e “Nyasaye ma nyaka nene kendo nyaka chieng’.”—Zaburi 90:2.

Ng’ano ma en ‘mokwongo kendo mogik’?

Muma tiyo gi wechego kowuoyo kuom Jehova Nyasaye kod Wuode ma Yesu, kata kamano, tiend wechego opogore kaluwore gi kama otiye kodgi. Ne ane ranyisi ariyogi.

E ndiko mar Isaya 44:6, Jehova wacho niya: “An e mokwongo kendo an e mogik. Onge Nyasaye moro mak mana an.” E ndikono, Jehova nyiso ni en e Nyasaye madier kendo ma nyaka chieng’; onge Nyasaye moro machielo. (Rapar mar Chik 4:35, 39) Kaluwore gi ndikono, weche motigo ni ‘mokwongo kendo mogik’ tiendgi chal achala gi ‘Alfa kendo Omega.’
E wi mano, wach motigo ni “Jal Mokwongo [pro’tos, to ok alfa] kendo Mogik [e’skha·tos, to ok omega]” yudore e Fweny 1:17, 18 kod 2:8. Weche molworo ndikogo, nyiso ni ng’at miwuoyo kuome ne otho kae to bang’e nobedo mangima kendo. Omiyo, ndikogo ok wuo kuom Nyasaye nikech Nyasaye pok othoga nyaka nene. (Habakuk 1:12) Yesu to notho kendo nochiere. (Tich Joote 3:13-15) En e dhano ma nokwong chier e del mar roho. Koro ok onyal tho, kendo odak e polo “nyaka chieng’.” (Fweny 1:18; Jo-Kolosai 1:18) Bang’ chierne, en e ma koro en gi migawo mar chiero ji. (Johana 6:40, 44) Omiyo, en e ng’at mogik ma Jehova nochiero achiel kachiel. (Tich Joote 10:40) Nikech mano, inyalo luong Yesu ni “Jal Mokwongo kendo Mogik.”

Be Fweny 22:13 nyiso ni Yesu e ‘Alfa kendo Omega’?

Ooyo. Ng’at ma wuoyo e Fweny 22:13 ok ong’ere. Nitie ji mang’eny ma wuoyo e sulano. Ka ne Profesa William Barclay wuoyo e wi ndikoni, nowacho niya: “Ok ochan gik moko e yo moro sie; . . . kendo tek ahinya fwenyo ng’at ma wuoyo.” (The Revelation of John, Volume 2, Revised Edition, ite mar 223) Omiyo, nenore ni ‘Alfa kendo Omega’ miwuoyoe e Fweny 22:13 bende e Ng’at miwuoyo kuome e ndiko mamoko manie bug Fweny. En Jehova Nyasaye.

^ par. 1 E King James Version oyudore bende e Fweny 1:11. Kata kamano, ng’eny loko mag Muma ma kindegi ogolo wachno nikech ok oyudre e kitepe machon mag dho Grik, kata obedo ni bang’e nomede e Ndiko moko.