Muma wuoyo e wi wachni dichiel kende e ndiko mar Tim Jo-Lawi 19:28, ma wacho niya: “Kik uket kido moro kuomu.” Nyasaye nomiyo oganda mar Jo-Israel chikni mondo gibed mopogore gi joma ne olworogi ma ne ndiko nyinge nyisechegi kata goro sanamu mag nyisechego e dendgi. (Rapar mar Chik 14:2) Kata obedo Jokristo ok nie e bwo Chik ma ne omi Jo-Israelni, puonj ma wayudo e ndikono en gima onego onon matut.

Be Jakristo Onego Ogor Tattoo e Dende?

Ndiko maluwogi nyalo konyi ng’ado paro:

• ‘Mon onego obidhre gi lewni . . .  ma ok okalo tong’.’ (1 Timotheo 2:9) Mano en puonj ma chwo bende onego oluw. Kik warwakre e yo ma chwanyo jomoko kata mamiyo giketo pachgi kuomwa.

• Jomoko goro tattoo e dendgi mondo ofwenygigo, to jomoko to goro tattoo mondo ginyis ni gin gi ratiro e wi dendgi. Kata kamano, Muma jiwo Jokristo ni, ‘Gichiw ringregi kaka misango mangima, maler kendo ma Nyasaye oyiego, ka gitiyone gi nyalogi mar paro.’ (Jo-Rumi 12:1) Ti gi ‘nyaloni mar paro’ mondo ing’e gimomiyo idwaro goro tattoo e dendi. Kapo ni idwa kete nikech jomoko okete kata idwa nyiso ni in e grup moro, to ng’e ni paro ma in-gono nyalo lokore bang’e. Ka inono matut gimomiyo idwaro goro tattoo e dendi, to ibiro ng’ado paro mariek.—Ngeche 4:7.

• “Ng’at matiyo matek kendo ma chano gik moko mos noyud gik mathoth, to ng’at marikni ok noyud gimoro.” (Ngeche 21:5, The Bible in Luo, 1976) Kinde mang’eny, joma goro tattoo e dendgi gin joma rikni nikech en gima nyalo ketho winjruokgi gi jomoko kendo nyalo monogi yudo tich. Rucho tattoo e del en gima ok yot, okawo pesa mathoth kendo okelo rem mang’eny. Nonro mosetim nyiso ni joma ogoro tattoo e dendgi ywago ang’e bang’e gimomiyo ne gigore.