Zo bʼꞹbʼꞹ paa ma nutsʼkʼe ñe in pjamilia ri bʼꞹnkʼeji na joo, xo ra bʼꞹbʼꞹ paa ma ra kjogꞹtsʼꞹji kʼo na sʼoo (Eclesiastés 9:11). Ma ra kjogꞹkʼo e Mizhokjimi ra mbøxkʼꞹji, kja ne Biblia xitsʼiji pje ri tsjageji. Ma nutsʼkʼe ñe in pjamiliage ri tsjageji kʼo mamanu, ra mbøxkʼꞹji ri sɇchiji yo nrrumꞹ yo me na sʼoo.

NE BIBLIA MAMA GA KJABA: “Texe kʼo i mbeñeji, ri xipkʼeji Mizhokjimi. Nange angeze me mbentsʼeji ga mbøkʼꞹji” (1 Pedro 5:7). Dya ngeje Mizhokjimi kʼꞹ kjakʼꞹ ri supjre (Santiago 1:13). Mizhokjimi pa̱ra̱ ja rga mbøsʼꞹ yo ntee, ngekʼua na joo kʼꞹ ri dyøtꞹ ra mbøxkʼꞹ (Isaías 41:10). Angeze nee ke ri xipji ma pje gi nee ke ra mbøxkʼꞹ (Salmo 62:8).

Mꞹ pama pama ri xørge ne Biblia ra mbøxkʼꞹ na punkjꞹ, nunu mama ke e Jehová “me juetsʼ[ko]ji ma pje kʼo ri supjregoji, [...] kjakꞹji ra mⱥjⱥji” (2 Corintios 1:3, 4; Romanos 15:4). E Mizhokjimi “ra tsjakʼꞹji ra soya in mꞹbʼꞹgeji kʼꞹ dya pje ri tsjijñiji” (Filipenses 4:6, 7).

TSJAGE KʼO MAMABA:

• Ri dyøtꞹ e Jehová ko texe in mꞹbʼꞹ ra mbøxkʼꞹ ri soge na joo, ra mbøxkʼꞹ ri pa̱ra̱ pje ri tsjage

• Ma ri ñabi ri mangebi pje søø ri tsjagebi, nza texe yo ya gui mangebi, ñugebi pje nge kʼꞹ xe nda na joo kʼꞹ ri tsjagebi

NE BIBLIA MAMA GA KJABA: “Kʼe ntee kʼꞹ me pa̱ra̱ na punkjꞹ xe ra nee ra pjechi pje ra tsjaa, xo akjanu yo ntee yo me pa̱ra̱, ⱥrⱥji kʼo ñaji kʼo ñaja ntee ngekʼua xe nda ra pjechiji” (Proverbios 18:15). Ngekʼua na joo ke ri dyønbʼꞹ ja ga zoji yo in chʼige ñe ni suge, ri dyⱥrⱥ na joo yo ra xitsʼiji (Proverbios 20:5).

¿Pje ri tsjage ma ra ndu̱u̱ naja in pjamiliage? Dya ri tsjeje ri guɇge nzakja e Jesús kʼꞹ “o guɇɇ” (Juan 11:35; Eclesiastés 3:4). Mꞹ ri soyage na tsʼinrrajme o ri i̱ji̱ me ri soge na joo (Eclesiastés 4:6). Mꞹ ri tsjagekʼo ra mbøxkʼꞹge ri sɇchi.

TSJAGE KʼO MAMABA:

• Na joo ke pama pama ri dyønbʼꞹ nzi na in pjamilia pje mbeñeji ñe ja ga zoji, ga kjanu ma ra sⱥjⱥ nu paa ke ra kjogꞹji kʼo na sʼoo ma ri dyønbʼꞹ ja ga zoji ra xitsʼiji

• Mꞹ gi pa̱rge na ntee kʼꞹ ya kjogꞹ kʼo na sʼoo ri dyønꞹ ja ba zoʼo ñe pje go mbøsʼꞹ ro sɇchi

NE BIBLIA MAMA GA KJABA: “Kʼe ntee ke me ki jobige ñe me netsʼe nge kʼꞹ dya jɇtsʼkʼi, pjøxkʼꞹ ma i kjogꞹge kʼo na sʼoo” (Proverbios 17:17). Bʼꞹma yo ntee yo i pa̱rge ñe yo i jobi ra nee ra mbøxkʼꞹge, pe dya pa̱ra̱ji pje ra tsjaji, ngekʼua ma ra dyønkʼꞹ pje ni jyonkʼe dya ri tsjeje ri xipji ja rga mbøxkʼꞹge (Proverbios 12:25). Jyodʼꞹ na ntee kʼꞹ pa̱ra̱ pje mama ne Biblia, angeze ra xitsʼi ja rga mbøxkʼꞹ kʼo mama ne Biblia (Santiago 5:14).

Na joo ke ri jyodʼꞹ ri ñage ko yo ntee yo pa̱ra̱ji ne Biblia ñe enchʼeji kja o mꞹbʼꞹji kʼo ra tsjaa e Mizhokjimi ga ma axojñi, angezeji ra mbøxkʼꞹji. Xo ri soge na joo mꞹ ri pjøsʼꞹge yo ntee kʼo dya bʼꞹnji na joo, xipjige ja ga mbøxkʼꞹ e Jehová ñe nu kʼo ya gui pjechige kja ne Biblia kʼo ra tsjaa e Mizhokjimi ga ma axojñi. Pama pama ri jyodʼꞹ ja rgi pjøsʼꞹ yo in minte, sido ri jobi ko yo ntee yo me sʼiyatsʼꞹ ñe yo nee ra mbøxkʼꞹ ma gi pɇsʼi nrrumꞹ (Proverbios 18:1; 1 Corintios 15:58, NTD).

TSJAGE KʼO MAMABA:

• Ri jyodʼꞹ na ntee kʼꞹ i jobige ri xipji ja gi soge, angeze ra mbøxkʼꞹge

• Ri xipji pje gi nestage, akjanu angeze ra mba̱ra̱ ja rga mbøxkʼꞹ