Michelle: Kjimi,Sofía. Ri mⱥkjø ri zɇnguatsʼꞹ na yeje.

Sofía: Xo ri mⱥkjø ri jantrʼkʼa.

Michelle: Kʼꞹ paa ke ro e̱kjø ro ñabi ja ga søø Mizhokjimi ma janrrgaji ke ri supjreji. a Nutsʼkʼe bi mama ke ante ke in nana ro kjogꞹ ne accidente mi kjage ne tʼønꞹ. Por cierto, in nana, ¿bʼꞹbʼꞹ na joo?

Sofía: Bʼꞹbʼꞹ paa ke dya søø na joo, pe nudya bʼꞹntjo na joo.

Michelle: Me na joo. Bʼꞹma me na sʼɇzhi ri zɇchibi ne ndumꞹ nu i kjogebi.

Sofía: Ja̱a̱, bʼꞹbʼꞹ paa ke ri øntsʼegø janzi paa xi ra supjregobʼe.

Michelle: Ri tendiogø pjenga gi søge akjanu. Bʼꞹma xi gi mbeñe kʼꞹ tʼønꞹ kʼꞹ ro kjakʼꞹ kʼe paa ke ro ñabi, ¿pjenga e Yose jɇzi ke ra supjreji ma angeze pɇsʼi poder para kjuatꞹ yo na sʼoo.

Sofía: Ja̱a̱, ri mbeñe.

Michelle: Ante ke ra nubi jaga trjꞹrꞹ nu tʼønꞹ ne Biblia, ra mbeñebi kʼo ro ñabi kʼꞹ paa ma ro e̱kjo.

Sofía: Na joo.

Michelle: Ro nubi ke na bʼɇzo mi jingua mi matʼꞹ e Yose, angeze mi øntsjɇ pjenga e Yose jɇzgiji ra supjreji, pe e Yose dya go guɇnchʼi ni xi go xipji ke a bi bʼɇzhi in fe.

Sofía: Dya mi pa̱rgøyo.

Michelle: Xo ro nubi ke e Jehová dya søʼø na joo ma ri supjreji. Ne Biblia mama ke mi jingua o jñiñi e Yose mi kjogꞹji nrrumꞹ, “ke ma angezeji mi supjreji [...] e Yose xo mi supjre”.  Me na joo ri pa̱ra̱ji ke ma ri supjreji, e Yose xo supjre, ¿eko ja̱a̱?

Sofía: Po ja̱a̱.

Michelle: Y ro mamabi ke ngextjo e Diosi søø ra kjuatꞹ nu supjrimiento nangeje angeze me na zɇzhi.

Sofía: Nge yo dya ri tendiogø na joo. ¿Pjenga e Yose sido jɇzi ke ra kjogꞹ texe yo na sʼoo ma angeze søø ra ngꞹsʼꞹ?

Michelle: Otʼꞹ ra nubi pje mama ne Biblia kja Génesis. ¿A bi dyⱥrⱥ kʼo o tsjabi e Adan ñe e Eva ko ne lulu ke bi xipjibi e Diosi dya ro sibi?

Sofía: Ja̱a̱, go jitsʼkøji kja ne catecismo. E Diosi go xipjibi ke dya rgo sigui ne lulu pe angezebi dya go dyⱥrⱥbi.

Michelle: Na joo, pe ra nubi pje go kjogꞹbi ante ke ro sigui ne lulu, nujyo me ni mubi pa ra pa̱ra̱ji ja ba mbꞹrꞹ ne supjrimiento. ¿I nee ri zopjꞹ Génesis, capítulo 3, yo versículo 1 al 5?

Sofía: Ja̱a̱, mama: “Nudyakʼua nu kʼijmi xe nda mi trjꞹmbeñe ke na ngeje texe kʼo ñaja animale kʼo bi dyⱥtʼⱥ e Mizhokjimi Jehová kja ne xoñijomꞹ. Nukʼua kʼe kʼijmi bo dyønꞹ e ndinxu: ‘¿Ix na kjuana o xitsʼkʼebi Mizhokjimi ke dya søø ri sibi texe yo lulu yo kisʼi kja yo zaʼa kja ne jardín?’. O ndꞹrꞹkʼua kʼe ndinxu o xipji kʼe kʼijmi: ‘Søø ra sibʼe yo kisʼi kja yo zaʼa kja ne jardín, ngextrjo ne zaʼa nu neʼe a ndee kja ne jardín, nu o xitsʼibʼe Mizhokjimi: “Dya ri sigebi yo kisʼi kja ne zaʼa; iyo, dya ri chjørꞹbi ngekʼua dya ri chu̱bi” ’. Nuʼma, kʼe kʼijmi o xipji nu ndinxu: ‘Ix na kjuana dya ri chu̱bi. Nange e Mizhokjimi pa̱ra̱ na joo ke ma ri sibi yo kisʼi kja ne zaʼa, ra xogꞹ in chøgebima ñe ri pjɇzhibi nzakja Mizhokjimi, ri pa̱ra̱bi kʼo na joo ñe kʼo na sʼoo’ ”.

Michelle: Pøkjꞹ. Ra nubi pje nee ra mama yo versículo. Otʼꞹ mama ke na kʼijmi o ñaa ko e Eva. Xo bʼꞹbʼꞹ na parte kja ne Biblia ke mama mi nge nu Diablo o Satanás ke bo ñaa, bo usa na kʼijmi. b Angeze cgo dyønꞹ e Eva pjenga e Yosi o unꞹbi kʼe mandamiento kʼꞹ dya ro sigui kʼꞹ lulu. ¿Pje bo xipji e Diosi e Adán ñe e Eva ke ro kjogui ma dya ro dyⱥtⱥbi?

Sofía: Ke ro nrru̱bi.

Michelle: Nge a kjanu. Nakʼua nu Diablo o xospꞹ na mbɇchjine e Yose. Jñanda pje go mama: “Ix na kjuana dya ri chu̱bi”. ¡Go mama ke e Yose na mbɇchjine!

Sofía: Dya mi ⱥrⱥgøyo.

Michelle: Ma de Satanás o mama ke e Yose nge na mbɇchjine, o ngejme na trʼønꞹ ke ro mezhe ro ndꞹrꞹji. ¿I pa̱rge pjenga?

Sofía: Mmm... Iyo, dya ri pa̱rgo.

Michelle: Ra mamabi na ejemplo. Mbeñege ke na paa ra e̱kjø y ra xitsʼi ke nutsʼkʼø más na zɇtsʼkø ke nutsʼkʼe. ¿Pje ri tsjage ngekʼua ra ñetsʼe ke dya ri mamagø kʼo kjuana?

Sofía: Bʼꞹma na joo ra kjabi na prueba kjo nge kʼꞹ más na zɇzhi.

Michelle: Ja̱a̱. Søø ra jodʼꞹbi pje ra jñusʼꞹbi ngekʼua ra ñetsʼe kjo nge kʼꞹ más na zɇzhi.

Sofía: A ro tendiotsʼꞹ.

Michelle: Pero ma kjo kʼo ra xikʼø ke ngetsʼkʼe dʼa ntee deshonesta, nukʼo dya chjenjui ke ra nuji kjo nge kʼꞹ más na zɇzhi, ¿eko ja̱a̱?

Sofía: Ja̱a̱, na kjuana dya chjenjui.

Michelle: Ma kjo kʼo ngeje honesto dya søø ra ñetsʼe janzi ri nuji ko nu prueba de fuerza.

Sofía: Ja̱a̱, na kjuana.

Michelle: Ngekʼua para ke yo ntee ra unꞹji nguenda ke ngetsʼkʼe na ntee honrada, ni jyodʼꞹ ra kjogꞹ yo paa ngekʼua ra nuji ma ri tsjage na joo o kʼo dya joo.

Sofía: Ja̱a̱, na kjuana.

Michelle: Ra yepe ra nuji kʼo mama kja Génesis ¿O mama ne Diablo ke más na zɇzhi angeze ke e Yose?

Sofía: Iyo.

Michelle: Pa e Yose dya ma sʼɇzhi pje ro tsjaa ngekʼua ro ñetsʼe ke dya ma kjuanakʼo. E Satanás o mama ke e Yose mi nge deshonesto. Nzakja ke o xipji e Eva: “E Yose mama mbɇchjine; nutsʼkʼø ri xitsʼi kʼo na kjuana”.

Sofía: Dya mi pa̱rgoyo.

Michelle: E Yose mi pa̱ra̱ pje ro tsjaa ngekʼua ro ñetsʼe kjo ngeje kʼꞹ mi mama kʼo na kjuana, ngekʼua o jyɇzi ro kjogꞹ yo kjɇɇ. Akjanu ro pa̱ra̱ji kjo nge kʼꞹ bo mama mbɇchjine.

Sofía: Pe ma bo nrru̱u̱ e Eva, go ñetsʼe ke e Yose bi mama kʼo na kjuana ¿eko ja̱a̱?

Michelle: Ja̱a̱, pe xi bʼꞹbʼꞹ más mbɇchjine kʼo o mama e Satanás, yepe ri jñanrra kja ne versículo 5. ¿Pje mbe kʼo xi go xipji ne Diablo e Eva?

Sofía: Ke ma ro zii kʼo lulu kʼo mi kisʼi kja kʼꞹ zaʼa ro xogꞹ in chøjima.

Michelle: Ja̱a̱, y ke ma ro zii kʼꞹ lulu ro mbɇzhi nzakja Mizhokjimi y ro mba̱ra̱ kʼo na joo y kʼo na sʼoo. Ko yo jñayo, e Satanás mi mama ke e Yose dya nee ke yo ntee ra mbɇsʼiji kʼo na joo y ke ra minji na joo.

Sofía: A ro unꞹ nguendadya.

Michelle: Y nujyo nge na tʼambɇchjine.

Sofía: ¿Pjenga? Dya ri tendio.

Michelle: Chjaa, ne Diablo o xipji e Eva —ñe a texe yo ntee⁠— ke ro minji na joo ma ro mandatsjɇji, ke dya mi jyodʼꞹji ro dyⱥtⱥji Mizhokjimi. E Jehová go jyɇzi ke ro kjogꞹ yo paa ngekʼua ro ñetsʼe ma ne Diablo mi mama kʼo na kjuana. Na kʼua e Yose go jyɇzi ke e Satanás ro manda kja Xoñijomꞹ yo kjɇɇ yo ri bʼꞹnji. Ngekʼua bʼꞹbʼꞹdya na punkjꞹ supjrimiento: nangeje kʼꞹ mandao kja xoñijomꞹ nge ne Diablo, dya nge e Yose.  Pe ne Biblia mama jñaa kʼo me na joo.

Sofía: ¿A ja̱a̱?

Michelle: Ja̱a̱, ne Biblia jitsʼkøji kʼo me na joo de e Mizhokjimi. Mama ke e Jehová dya bʼꞹbʼꞹ na je̱e̱ de nutsʼkoji ma ri supjreji. Nzakja ra nuji kʼo o dyꞹsʼꞹ kʼꞹ rey David kja ne Salmo 31: ⁠7. Angeze ⁠me ko supjre, pe jñanrra k’o o xipji angeze e Mizhokjimi. ¿I nee ri zopjꞹ ne versículo?

Sofía: Ja̱a̱, mama: “Me ra mⱥkjø kʼꞹ in sʼiya dya kjuarꞹ, nangeje nutsʼkʼe a bi jñanrra yo ri supjregø, gi unꞹ nguenda texe yo kjaa kʼꞹ me ra zichʼi in mꞹbʼꞹ”.

Michelle: Zø e David o supjre na punkjꞹ, o mbeñe ke e Jehová bo jñanrra texe kʼo bo kjogꞹ y nukʼo o tsjapꞹ ro søʼø na joo kja o mꞹbʼꞹ. ¿Ja gi søgedya ke i pa̱rge ke e Jehová janrra texe kʼo ri supjreji, jesta ma pje kʼo na ꞹꞹ a mboo kja in mꞹbʼꞹji y ke yo dyaja ntee dya søø ra tendioji ja ga søgøji?

Sofía: Nujyo kjakꞹ ra søgø na joo.

Michelle: Ne Biblia xo mama ke e Jehová dya ra jɇzgiji ra supjreji texe yo paa. Xo mama ke angeze ra nguarꞹ ko nu gobierno e Satanás y ke ra ngꞹsʼꞹ texe yo na sʼoo ke bʼꞹbʼꞹdya y ra chjotꞹ nu supjrimiento ke i kjogebi. ¿I nee ke ra nzhogo kʼꞹ ngoʼo kʼꞹ ba e̱je̱? Ri nee ra jitsʼi pjenga ri jichijme ke a bʼɇxtjo tsʼikʼe ma e Yose ra kjuatꞹ texe nu supjrimiento. e

Sofía: Ja̱a̱, na joo.