NU TEMA NU NI MBꞸRꞸ
Ne Biblia xi bʼꞹbʼꞹdya zø ya kjogꞹ na punkjꞹ kjɇɇ
KʼO BO NEE RO TSJAPꞸJI. Kʼo bo dyꞹsʼꞹji y kʼo bo xⱥkⱥji nu Biblia, bo opjꞹji kja papiro ñe pergamino a (2 Timoteo 4:13). ¿Pjenga nujyo material rgo søø rgo tsjapꞹ rgo trjeze nu Biblia?
Ne papiro xꞹtrʼꞹtrjo, ga bʼɇzhi i color ñe nrre tsʼikʼe ga trjeze. “Ma kjogꞹ yo kjɇɇ, nu papiro jmanchʼa ga trjeze asta ma ra mbɇzhi xijomꞹ”,—eñebi yo egiptólogo Richard Parkinson ñe Stephen Quirke—. Ma kjo kʼo ra mbɇsi na rollo de papiro, ma ra kjogꞹ yo kjɇɇ ra pøxtrⱥ y ra tsjapꞹ ra yaʼa. Ma tʼøgꞹ nge yo ngo̱o̱, yo uyi o yo xa̱nkjꞹ yo ra zapꞹji. Ma o chøtrʼꞹji janzi papiro o mbⱥsʼⱥji nu ja me ma kʼaa kjana ñe o patrʼꞹ e jyarꞹ ngekʼua dabadiji go sʼodʼꞹ.
Ne pergamino xenrra mezhe ke nu papiro, pe xo ra trjeze ma dya ra mbørꞹji na joo o ma me na kʼaa nu ja pⱥsʼⱥji ñe ma patrʼꞹ e jyarꞹ. b Xo søø ra zaa yo uyi. Ngekʼua, nu obra Everyday Writing in the Graeco-Roman East (Kʼua ja ma opjꞹji kja nu Oriente Grecorromano) mama “na sʼɇzhi ke yo manuscrito kʼo mi bʼꞹbʼꞹ mi jingua xi ra bʼꞹbʼꞹtrjodya”. Ma rgui kjogꞹyo ko nu Biblia, a ro bʼɇzhi trenxe kʼo mamanu.
PJENGA XI BʼꞸBʼꞸDYA NE BIBLIA. Nu ley ke bo unꞹji yo israelita, mi mama ke texe yo rey a Israel ni jyodʼꞹ ro xⱥkⱥji nu ley ke mi ngeje yo otrʼꞹ tsichʼa libro de nu Biblia (Deuteronomio 17:18). O bʼꞹbʼꞹ bʼɇzo kʼꞹ o xⱥkⱥji na punkjꞹ manuscrito de yo Escritura, ke kja nu primer siglo mi søø ro chøtrʼꞹji kja texe yo sinagoga a Israel jesta me ma je̱e̱ nzakja a Macedonia (Lucas 4:16, 17; Hechos 17:11). ¿Ja gua søø o mezhe janzi manuscrito asta yo padya?
Yo manuscrito ke xiji Rollos del mar Muerto, ya mezheji na punkjꞹkjɇɇ kja yo xⱥjnⱥ kʼꞹ mi pɇsiji kja yo pogꞹ (cueva) o kja na lugar ke me na dyotrʼꞹ
Naja bʼɇzo ke me pa̱ra̱ nu Nuevo Testamento ke ni chju̱u̱ Philip Comfort mama: “Ri pa̱rgoji ke yo judío mi pɇsiji yo rollo nu ja mi ju̱sʼꞹ yo Escritura kja yo xⱥjnⱥ ngekʼua dya ro sʼodꞹji”. Je gua kjanu bo tsjaji yo cristiano. Ngekʼua ya chøtrʼꞹji janzi manuscrito de nu Biblia kja yo xⱥjnⱥ, kja yo cuarto nu ja dya ngichʼi sibi, kja yo pogꞹ (cueva), ñe kja yo lugar ke me na dyotrʼꞹ.
KʼO NA JOO KʼO YA KJOGꞸ. Na punkjꞹ tsʼiperaso yo manuscritode nu Biblia —janziyo ya mezheji más de yeje mil kjɇɇ— xe bʼꞹnji asta nu padya. Dya bʼꞹbʼꞹ ni ri dʼa skuama kʼꞹ pɇsʼi na punkjꞹ manuscritos kʼꞹ ya me mezheji.
a Mi jingua mi opjꞹji kja nu papiro ke ngeje dʼa planta ke bʼꞹn kja nrreje. Xo mi opjꞹji kja pergamino ke mi ⱥtrʼⱥji ko yo xipjadʼꞹ yo animale.
b Nge kʼo ya kjogꞹ ko nu acta original de la Declaración de Independencia de los Estados Unidos ke bo dyꞹsʼꞹji kja pergamino. Dya bʼe ba kjogꞹ doscientos cincuenta kjɇɇ y dya kja ñetsjɇ na joo yo mamanu.
